Novyja knihi, dasłanyja ŭ redakcyju
Mahiloŭskaja daŭnina ŭ pytańniach i adkazach / A.Ahiejeŭ, I.Marzaluk, I.Puškin. — 2-je vydańnie, pierapracavanaje j dapoŭnienaje. — Mahiloŭ: Uprava kultury Mahiloŭskaha haradzkoha vykanaŭčaha kamitetu, 1999. — 204 s.: (43) ił. — Nakład 2000 as. ISBN 985-6568-05-6
U knizie šmat dahetul nieviadomych fotazdymkaŭ mahiloŭskich bažnic. Cana ŭ domie knihi «Viedy» — blizu paŭtysiačy rubloŭ.
Apovieść minułych hadoŭ: Staronki letapisu: Dla małodšaha i siaredniaha školnaha vieku / Pierakazaŭ i pierakłaŭ u biełaruskuju movu Ŭ.Jahoŭdzik; Mastak P. Tatarnikaŭ. — Miensk: VTAA «Kavaler pablišerz», 1999. — 64 s.: ił. — Nakład 5100 as. ISBN 985-6427-19-3
Dobraja kniha, ale malunki čamuści vyhladajuć, jak načnyja žachi: słavianskija matyvy źnitavanyja z abliččami zmročnych śviataroŭ uva ŭbrańni armianskich manachaŭ.
Baćkaŭščyna: Zbornik histaryčnaj litaratury: Dla siaredniaha j starejšaha školnaha vieku / Układańnie, pradmova j paślasłoŭje S.Paniźnika; Mastak A.Zvanaroŭ. — Miensk: Junactva, 1999. — 367 s. (8) ark. ił. — Nakład 4000 as. ISBN 985-05-0271-1
Artykuły j litaraturnyja tvory pra dačku vialikaha połackaha kniazia Rahvałoda — słavutuju Rahniedu — dbajna sabranyja pad adnoj vokładkaj. Vydatny źmiest knihi kantrastuje ź nie najlepšym padboram ilustracyjaŭ.
Biełaruskaja encyklapedyja: U 18 t. T.9: Kulibin — Małaita / Redakcyjnaja kalehija: H.Paškoŭ dy inš. — Miensk: Biełaruskaja encyklapedyja, 1999. — 560 s.: ił. — Nakład 10000 as. ISBN 985-11-0155-9 (t. 9) ISBN 985-11-0035-8
Hety tom daviaršaje pałovu 18-tomavaj «Biełaruskaj encyklapedyi». Tut artykuły pra Łatviju j Litvu, Łukašenku j bratoŭ Łuckievičaŭ, Kreva j Lidu dy inšyja matarjały pra krainu j śviet. Cana ŭ kniharni vydaviectva — paŭtary tysiačy.
Biełaja ruś: Historyja Biełarusi ŭ lehiendach i padańniach: Dla dziaciej školnaha vieku / Układalnica M.Zielankova; Mastak P.Tatarnikaŭ. — Miensk: Junactva, 1999. — 303 s.: ił. — Nakład 5000 as. ISBN 985-05-0291-6
Jak budavalisia harady, jak žyli pany j jak ź ich kpili sialanie — adviečny matyŭ biełaruskaje vusnaje narodnaje tvorčaści. Ciapier i dzietki Biełaje Rusi mohuć spaznavać śviet kazak i mitaŭ svaje Baćkaŭščyny. Kniha maje šmat kalarovych ilustracyjaŭ. Cana — 800 rubloŭ.
Biarezinski zapaviednik: Ptuški: Kamplekt paštovak (15). U biełaruskaj i anhielskaj movach. Aŭtar tekstu j fota I.Byšnioŭ. Pierakład u anhielskuju movu M. Fiadosik; Mastak T.Nikicina. — Miensk: Biełaruś, 2000. — Nakład 8500 as.
Kali Vy nia majecie mahčymaści naviedać Biarezinski zapaviednik — pasprabujcie ŭjavić charastvo rodnaje pryrody pavodle novaha kamplektu paštovak, vypuščanaha vydaviectvam «Biełaruś».
Viaśnianka: Apaviadańni, vieršy, kazki biełaruskich piśmieńnikaŭ: Dla małodšaha školnaha vieku / Układalnik M.Zaremba; Mastak T.Mieljaniec dy inš. — Miensk: Junactva, 1999. — 383 s.: ił. — Nakład 4000 as. ISBN 985-65-0377-7
P.Hud. Ad Kaladaŭ da Pakrovaŭ / Pad redakcyjaj Ja.Žuk. — Miensk: vydaviectva TAA «Krasika-prynt», 2000. — 204 s. — (Biełaruś śviatočnaja.) — Nakład 7000 as. ISBN 985-405-032-1
U knizie — tvory biełaruskaha falkloru i prahramy da śviataŭ usich kalandarnych cyklaŭ. Dla supracoŭnikaŭ pazaškolnych i školnych ustanovaŭ, masavaha čytača.
A.Žuk. Nad čystym polem: Apovieść, apaviadańni. — Miensk: Mastackaja litaratura, 1999. — 479 s. — (Biełaruskaja proza 20 st.) — Nakład 2000 as. ISBN 985-02-0495-8
U “załatoj” seryi “Biełaruskaja proza XX st.” vyjšaŭ zbor tvoraŭ aŭtara pierakładu “Majstra j Marharyty” ŭ biełaruskuju movu.
Ziamla Bieraściejskaja: Albom. U biełaruskaj, anhielskaj dy rasiejskaj movach. Aŭtar tekstu i ŭkładalnik H.Tamaševič. Pierakład u anhielskuju movu M.Fiadosik; Mastak A.Ždanoŭskaja. -- Miensk: Biełaruś, 1999. -- Nakład 3000 as. ISBN 985-01-0305-1
Krajavidy siońniašniaje Bieraściejščyny: ad zachavanych pomnikaŭ daŭniny kraju da mituślivaha žyćcia haradoŭ zachodniaha Paleśsia.
H.Kołas. Karani mitaŭ (Žyćcio j tvorčaść Janki Kupały). — Miensk: Biełaruski humanitarny adukacyjna-kulturny centar, 1998. — 348 s. — Nakład 700 as. ISBN 985-6022-56-2
Viadomy krytyk Hieorhi Kołas (1929—1994) — baćka dyrektara Biełaruskaha humanitarnaha liceju Ŭładzimiera Kołasa j vydaŭca dy pierakładčyka Źmitra Kołasa — padsumavaŭ u knizie źbirany ad 1950-ch matarjał pra sprečnyja i tajamničyja momanty bijahrafii Janki Kupały. Kniha vyłučajecca svajoj krytyčnaściu ŭ dačynieńni da inšych teoryjaŭ kupałaznaŭstva j paciešyć amataraŭ detektyŭnaha žanru niečakanymi pavarotami žyćcia aŭtara «Tutejšych». Hetaja kniha nie pastupała ŭ handal ad 1998 h., ale ciapier niekalki asobnikaŭ lažyć u kniharni Pedahahičnaha ŭniversytetu, dzie možna adšukać jašče adnu redkuju navinku, pra jakuju pisała «NN», — knihu V.Vychoty «Niamiecka-biełaruskija moŭnyja paraleli».
Čytaŭ knihi Viktar Muchin
