Novyja imiony ŭ apazycyi
Biełaruskaja intelihiencyja zaklikaje da Ŭsiebiełaruskaha źjezdu
Dniami abvieščanaja novaja inicyjatyva hrupy biełaruskich dziejačoŭ kultury suprać inkarparacyi našaj krainy ŭ skład Rasiei. U zvarocie da hramadztva, u pryvatnaści, havorycca:
«My apynulisia na histaryčnaj miažy, za jakoj — nacyjanalnaja niabytnaść. Tyja, chto imkniecca źlikvidavać našu dziaržaŭnaść, pad chistkaj zasłonaj chłuśni i falsyfikacyjaŭ rychtujuć zdaču suverenitetu krainy. Hety zhubny zdradnicki praces nieabchodna rašuča spynić. Dziela hetaha my źviartajemsia da ŭsich patryjotaŭ Baćkaŭščyny z prapanovaj pravieści ŭ 2000 hodzie Ŭsiebiełaruski źjezd. Meta jaho — zajavić usiamu śvietu, što dziaržaŭnaść i dabrabyt Biełarusi źjaŭlajucca dla nas najvyšejšymi vartaściami.
My zaklikajem nieadkładna stvaryć arhkamitet Usiebiełaruskaha źjezdu. Kali treba baranić niezaležnaść rodnaj dziaržavy, pavinny być adsunuty ŭbok palityčnyja roznahałośsi, zabyty asabistyja kryŭdy».
«Zaŭvažcie, pad zvarotam niama podpisaŭ nivodnaha apazycyjnaha lidera», — padkreślivajuć inicyjatary. Zatoje stajać imiony Radzima Hareckaha i Alesia Razanava, Viktara Skarabahatava i Ŭładzimiera Arłova. Razam ź imi ŭpieršyniu — podpisy aktrysy Stefanii Staniuty dy mastaka Arlena Kaškureviča. Hetak hod pa hodzie da apazycyi pa čarzie dałučalisia Bykaŭ i Baradulin, Dašuk i Bryl... «U źjezdu adzinaja meta — paćvierdzić niezaležnaść Biełarusi. Delehaty na jaho musiać vybiracca pavodle tych ža pryncypaŭ, što i na źjezd 1917 hodu», — deklaruje adzin ź inicyjataraŭ zvarotu, žurnalist Alaksandar Starykievič. I spadziajecca, što «ŭ čas źjezdu ŭ Biełaruś zmoža pryjechać Staršynia Rady BNR Ivonka Surviłła».
Pryhoža napisany zvarot nahadvaje mnohija raniejšyja padobnyja inicyjatyvy, jakija pašumieli dy ablehlisia ŭ cichaj zatocy. Tady taksama padpisvała intelihiencyja, a paśla jaje aŭtarytetam karystalisia nia nadta pryncypovyja funkcyjanery-apazycyjanery, kab stvarać pad siabie čarhovyja małakarysnyja kantorki. Inicyjatary dajuć zrazumieć, što ideja Ŭsiebiełaruskaha źjezdu adroźnivajecca ad papiarednich “kanhresaŭ suprać dyktatury” tym, što na jahonaj asnovie moža paŭstać realny orhan narodnaha pradstaŭnictva Biełarusi, bolš adekvatny struktury siońniašniaha biełaruskaha niezaležnaha hramadztva, čym ciapierašni Viarchoŭny Saviet.
Skazanaja ŭ samych haračych słovach praŭda, na žal, jašče nia siła. Zvarotam nia budzie vidać kanca, pakul kožnaha razu navina akcyi budzie adno ŭ imionach i šyldach, a nia ŭ novych palityčnych technalohijach, bieź jakich, z adnymi tolki ramantyčnymi zaklikami, baranić niezaležnaść u sučasnym śviecie niemahčyma.
Siarhiej Paŭłoŭski
