Viestki ź Litvy

Viestki ź Litvy

Nia budzie prapiski

Dniami Sojm Litvy pastanaviŭ admianić abaviazkovuju prapisku dla žycharoŭ krainy. Adbyłosia toje, pra što kazali i što abiacali jašče ŭ samy razhar harbačoŭskaje «pierastrojki». Ciapier ad 1 vieraśnia hetaha hodu zapis pra miesca žycharstva ŭ litoŭskich pašpartach budzie nieabaviazkovy. Miž tym, sami hramadzianie Litvy nie śpiašajucca pazbycca hetaha taŭra. Dla mnohich taki zapis dadaje psychalahičnaha kamfortu — damaŭłaśniku pryjemna pazirać na adras svaje majomaści va ŭłasnym pašparcie. Praŭda, kab kupić u Litvie žyllo, užo siońnia nia treba ani tutejšaje prapiski, ani tutejšaha hramadzianstva...

U Biełarusi tym časam pryniali novy žyllovy kodeks, pavodle jakoha nia tolki ŭzmacniajecca instytut prapiski, ale j dla žycharoŭ ułasnych kvateraŭ uvodziacca praviły, ničym nie adroznyja ad praviłaŭ pražyvańnia ŭ savieckich internatach. U siabie doma nielha kuryć, sušyć na kuchni bializnu, nia kažučy ŭžo kab mieć ofis. U kožny momant moža pryjści milicyjant i pakarać za parušeńnie.

Biełaruskaje i litoŭskaje zakanadaŭstvy raźvivajucca ŭ procilehłych kirunkach.

Dobrasusiedztva

Letaś Litva pradała za miažu 3,3 młrd kWh elektryčnaj enerhii. Ź ich 1,3 młrd kWh u Łatviju dy 2 młrd kWh u Biełaruś. Heta składaje 31% ad usioj pradadzienaj litoŭskaj elektryčnaści. Ciapier tutejšyja enerhietyki majuć namier zaniacca ekspartam šyrej. Cikavaść da litoŭskaha śviatła majuć Polšča j Estonija. Polski premjer Ježy Buzek vykazaŭ namier nabyć u Litvie 700 młn kWh. A pakolki budavać novyja linii elektrapieradačy zadoraha, dyk polski bok prapanuje skarystacca biełaruskimi dratami. Usio było b dobra i ŭzajemakarysna... Ale voś ža prablema — Biełaruś nia vypłaciła Litvie hrošaj za elektryčnaść. Ciapier ahulny pamier biełaruskaje zapazyčanaści składaje 65 młn. amerykanskich dalaraŭ. I litoŭcy nia chočuć ryzykavać. Kolki b toje ni kaštavała, jany buduć budavać novuju liniju ŭ Polšču. Nam ža nie daviarajuć.

Biełaruskija jełki pad Vilniaju

Dniami ŭ Vilni sustrelisia ministar asiarodździa Litvy Danijus Lihis i ministar lasnoj haspadarki Biełarusi Valancin Zoryn. U vyniku padpisali damovu pra zachady suprać lasnych pažaraŭ albo inšych pryrodnych niaščaściaŭ na Vilenščynie. Ciapier budzie stvoranaja supolnaja systema achovy pryrodnych resursaŭ abapał biełaruska-litoŭskaje miažy. Ź Biełarusiaj miažujuć litoŭski zapaviednik Čapkielaj, Nacyjanalny Dzukijski Park, niekalki rehijanalnych parkaŭ, naprykład, u Dzievianiškach, dy šmat dzie jašče. Biełaruskim leśnikam nieabyjakavy dośvied Litvy, dzie ŭžo 20 hadoŭ dzieić nacyjanalnaja systema ahulnaha dohladu lasoŭ i ich rekanstrukcyi. Biełarusy naŭzajem prapanujuć jałovych sadžancaŭ, kab zasadzić imi ziemli na Vilenščynie. Oj, zahudzie biełaruski les pad Vilniaju!

Lićvin