Novy etap «vajny» pamiž KDB i MUS?

Ź milicyi pastupili, a paźniej byli abvierhnutyja źviestki pra zatrymańnie hrupy supracoŭnikaŭ KDB, jakich padazrajuć u karupcyi. Čym tłumačycca takaja niepaśladoŭnaść? Ci nia śviedčyć heta pra novy etap «viedamasnaj vajny» pamiž KDB i milicyjaj?

11 červienia pra zatrymańnie hrupy supracoŭnikaŭ KDB paviedamiŭ karespandentu ahienctva Interfaks pieršy namieśnik ministra ŭnutranych spravaŭ Alaksandar Ščurko.

«Jany zatrymanyja jak padazravanyja u karupcyi?» —udakładniŭ žurnalist i atrymaŭ ad Alaksandra Ščurko adkaz: «Tak», — pieradaŭ Interfaks.

Paviedamlałasia taksama pra toje, što spravu viadzie hieneralnaja prakuratura Biełarusi. Pry hetym, pavodle ahienctva, u prakuratury źviestki pra zatrymańnie «čekistaŭ» nie paćvierdzili j nie abvierhli.

Supiarečlivaja infarmacyja nakont zatrymańniaŭ pastupała i siońnia, 12 červienia. Kiraŭnik centru hramadzkich suviaziaŭ KDB Valer Nadtačajeŭ admoviŭsia kamentavać źviestki. Heta było apoŭdni:

«A vy čytali, što hetaja infarmacyja źniataja ź Interfaksu? Dyk pačytajcie. Takim čynam, niama čaho mnie kamentavać», — zajaviŭ Nadtačajeŭ.

Adzin z kiraŭnikoŭ biełaruskaj filii ahienctva paćvierdziŭ mnie, što ad svajoj infarmacyi tam nie admovilisia.

U pryjomnym pakoi pieršaha namieśnika ministra ŭnutranych spravaŭ Alaksandra Ščurko złučyć ź im admovilisia. Kiraŭnica presavaj słužby ministerstva Kaciaryna Samusienkava‑Šelehava adkazała za načalnika:

«Jon hetaha nie kazaŭ. Aficyjnaj zajavy nie było, jašče raz paŭtaraju».

Niezaležnyja internet‑medyi jašče na minułym tydni pisali pra «novy vitok vajny» pamiž milicyjaj i KDB.

Pavodle hetych krynicaŭ, zatrymańnie supracoŭnikaŭ KDB milicyjaj stała jaje adkazam na letašni aryšt pałkoŭnika milicyi Ivana Klimiankova, jakoha asudzili za karupcyju. U internecie nazyvali proźviščy supracoŭnikaŭ KDB Miacielicy i Michałapa, jakija nibyta ciapier zatrymanyja milicyjaj za karupcyju.

Adnak paćvierdžańnia z aficyjnych krynic niama. Kiraŭnik pres‑centru hieneralnaj prakuratury Michał Vavuła siońnia paŭtaryŭ: «Źviestak Alaksandra Ščurko nie kamentujem».

Žurnalist internet‑vydańnia ad kamentaru taksama admoviŭsia: «Nas užo papiaredzili, kab nie kranali hetaj temy».

Ci realna, kab siłavyja viedamstvy zvodzili rachunki? Były supracoŭnik KDB Biełarusi Valer Kostka zhadaŭ, jak za časy staršyni KDB SSSR Juryja Andropava milicyjanty zabili majora KDB:

«Reakcyja KDB tady była vielmi mocnaja na hety vypadak. Specsłužba zaŭsiody zmahajecca za svaje kadry, niezaležna ad taho, chto dzie znachodzicca. Jany viaduć takuju kalektyŭnuju abaronu».

Pry hetym Valer Kostka nie vyklučaje, što ŭ šerahi supracoŭnikaŭ KDB prabralisia karupcyjanery:

«Filtry tam zaŭsiody stajali bolš mocnyja. Ale, vidać, ciapier stała ŭsio praściej i tudy taksama prasočvajucca roznyja ludzi».

• 0
• 0
• 0
• 0
• 0
• 0
• 0
• 0