Raman Kardonski. Biełarusy buduć hałasavać za Buša

Biełarusy buduć hałasavać za Buša

U balšyni svajoj biełarusy buduć hałasavać za Buša. Jość šmat pryčyn, čamu jany prahałasujuć mienavita tak. Džordž Buš-małodšy — kandydat Respublikanskaje partyi, ź jakoj u biełaruskaj dyjaspary ZŠA daŭno ŭstalavałasia plonnaje supracoŭnictva. Niejak tak atrymlivajecca — ci nia z toj pryčyny, što demakraty bolš levyja za respublikancaŭ — što administracyi demakrataŭ zaŭsiody zdavalisia emihrantam bolš akreślena maskvafilskimi, u toj čas jak palityka respublikancaŭ była bolš uzvažanaj. Treba taksama pamiatać, što mienavita za respublikancaŭ Rejhana i Buša była razvalenaja Imperyja Zła — Saviecki Sajuz, i Biełaruś atrymała niezaležnaść. Istotnuju rolu ŭ vybary biełarusaŭ maje taksama ekanamičnaja palityka Buša — naprykład, jahonyja plany źmienšyć padatkovy pres, jaki, jak na moj kanadyjski dośvied, choć i lahčejšy za kanadyjski, ale ŭsio roŭna istotny. Darečy, dla biełarusaŭ Ameryki było niepryjemna i ahidna nazirać usie tyja škandały, jakimi vosiem hadoŭ była ŭpryhožanaja “era Klintana”. Ale samym, na moj pohlad, istotnym momantam u vybary biełarusaŭ ZŠA źjaŭlajecca toje, što na praciahu vaśmi hadoŭ administracyja Klintana faktyčna ni razu nia vystupiła ŭ abaronu niezaležnaści Biełarusi. Kab nia ćviordaja pryncypovaja pazycyja Kanhresu ZŠA, dzie, jak viedama, balšynia naležyć respublikancam, to možna było b havaryć ab faktyčnaj kapitulacyi Vašynhtonu pierad Maskvoj u biełaruskim pytańni.

Analityčny artykuł było b napisać šmat lahčej, čymści dać vam kolki pryčyn, čamu biełarusy ZŠA hałasujuć za Buša. Bo tut treba było b pajści ŭ historyju našaje paślavajennaje nacyjanalna śviadomaje chvali emihracyi, historyju dačynieńniaŭ biełarusaŭ z aficyjnym Vašynhtonam. Niejak tak skłałasia, što respublikancy zaŭsiody išli nasustrač biełarusam, było mocnaje supracoŭnictva, asabliva ŭ hady Niksana j Rejhana, kali lidery našaje dyjaspary zaprašalisia ŭ Kanhres ZŠA, a našyja śviatary malilisia ŭ Kanhresie ZŠA za Biełaruś. Možna šmat čaho pryvieści ŭ abhruntavańnie mienavita takoha vybaru biełarusaŭ. Jon zrobleny, z ulikam usiaje historyi dačynieńniaŭ biełaruskaje dyjaspary jak z respublikancami, tak i z demakratami, a zusim nie tamu, što my ŭ takim zachapleńni ad Buša. Darečy, vybar Buša jak kandydata ŭ prezydenty mocna zasmuciŭ biełaruskuju dyjasparu, prynamsi palityčna aktyŭnuju jaje častku. Bo naš kandydat, senatar Makkiejn, na žal, nie prajšoŭ. Ale j za Hora hałasavać niama žadańnia. Viadoma, ciapier medyi stvarajuć jamu dobry imidž. Ale praŭda zastajecca — Hor zusim biezabličny palityk, jaki chavaŭsia ŭ cieni Klintana. Na maju dumku, nakolki niaŭdałym byŭ vybar respublikancaŭ z Bušam u 1988 h., nastolki niaŭdały i siońniašni vybar demakrataŭ z Horam.

Raman Kardonski,
Radny BNR, Staršynia Adździełu Biełaruska-Amerykanskaha Zadzinočańnia
ŭ Novaj Anhlii: