NAVINY ZA TYDZIEŃ

 NAVINY ZA TYDZIEŃ

RefeRendum razam z prezydenckimi vybarami?

Ministar justycyi Hienadź Varancoŭ miarkuje, što ŭviadzieńnie adzinaj hrašovaj adzinki dy adzinaha emisijnaha centru z Rasiejaj supiarečyć biełaruskaj kanstytucyi. Zhodna ź niadaŭna padpisanym pahadnieńniem da ŭvodu adzinaj “sajuznaj valuty” Centrabank Rasiei budzie vałodać vyklučnym pravam emisii hrošaj u našaj krainie, što supiarečyć artykułu 136 biełaruskaj kanstytucyi. Pavodle jaho, takim pravam vałodaje tolki naš Nacbank, a hrašovaj adzinkaj u Biełarusi źjaŭlajecca biełaruski rubiel, i ŭ najaŭnym abarocie mohuć vykarystoŭvacca tolki banknoty, emitavanyja Nacbankam. Miniust miarkuje, što ratyfikavać pahadnieńnie možna tolki pry ŭmovie źmieny kanstytucyi. Heta moža aznačać, što Łukašenka choča sumiaścić prezydenckija vybary z referendumam pra źmienu ŭ kanstytucyi i ŭvachodžańnie ŭ rublovuju zonu, spadziejučysia na hetym kańku pieramahčy kandydata ad patryjatyčna-demakratyčnaha bloku.

Razanaŭ — u Niamieččynie

“Paety źjaždžajuć nadoŭha”, — skazaŭ Aleś Razanaŭ pierad adjezdam u Niamieččynu 10 studzienia. Jaho zaprasiŭ Mižnarodny parlament piśmieńnikaŭ. “Nadoŭha – heta kali paet zastajecca biaz srodkaŭ da isnavańnia”, — dadaŭ novy emihrant. Čaćvierty litaratar z hučnym imiem emihruje z krainy – V.Bykaŭ ciapier u Niamieččynie, U.Niaklajeŭ – u Hielsynkach, S.Aleksijevič – u Italii.

Łukašenka, Pucin i Mackievič

Siońnia Łukašenka sustreŭsia z Pucinym u Maskvie. Tam adkryvajuć dni biełaruskaje kultury, na jakich pakažuć “Pieśniaroŭ” i “Rahniedu”. Pierad vizytam hazeta “Siehodnia”, rupar maskoŭskaj pravicy, nadrukavała infarmacyju pra toje, što specyjalnaja analityčnaja hrupa ŭ Kramli, składzienaja z byłych supracoŭnikaŭ biełaruskaha KDB, zvolnienych Łukašenkam, rychtuje maskoŭski scenar biełaruskich vybaraŭ i byccam by razhladaje kandydaturu Ŭładzimiera Mackieviča, byłoha kiraŭnika biełaruskaha KDB, u jakaści mahčymaj alternatyvy Łukašenku.

Mazaičnaja psychapatyja

“Naša Svaboda” ŭ piatnicu nadrukavała medyčnaje zaklučeńnie pra stan psychičnaha zdaroŭja Łukašenki, padrychtavanaje babrujskim psychijatram Źmitrom Ščyhielskim, jaki ciapier pierabyvaje ŭ Ńju-Jorku. Ščyhielski vystaŭlaje dyjahnaz “pamiarkoŭnaja mazaičnaja psychapatyja ź pieravahaju rysaŭ paranaidalnaha i dysacyjalnaha zabureńniaŭ asoby”, jakaja viadzie da pierabolšanaj prahi ŭłady i schilnaści da masavaha teroru. Čałavieka z takim dyjahnazam pryznali b niahodnym da vajskovaje słužby.

Sam Ščyhielski nikoli Łukašenki nia bačyŭ, a hruntavaŭsia na śviedčańniach medyjaŭ i trecich asobaŭ. Svaim artykułam jon vidavočna parušaje normy medyčnaje etyki. Apraŭdvajecca jon tym, što znachodžańnie niepaŭnavartasnaha čałavieka na vysokaj pasadzie nanosić vialikuju škodu krainie. Kali apanenty režymu skarystali taki sumnieŭny pryjom palityčnaha zmahańnia, možna tolki zdahadvacca, čym adkaža Łukašenka. Prezydenckaja kampanija 2001 h. pačynaje tanuć u brudzie “rasiejskich vybarčych technalohij”.

B.T.

Akcyja na Dzień Śv.Valancina

Kaalicyja moładzi «Pieramienaŭ!» rychtuje hrandyjoznaje śviatkavańnie 14 lutaha, Dnia Śv.Valancina, pad lozunham «Lubovi! Svabody! Pieramienaŭ!». Akcyja pačniecca, jak tradycyjna, ad pł. Svabody, ale pa formie budzie istotna adroźnivacca ad akcyjaŭ papiarednich hadoŭ. Usio skončycca ŭ adnym ź mienskich klubaŭ. Biełaruskaja Muzyčnaja Alternatyva vypuścić da Dnia zakachanych kasetu «Pieśni pra kachańnie» z zapisami biełaruskich hurtoŭ, jakuju buduć razdavać ŭ časie akcyi.

Puškin — u ZŠA

Mastak Aleś Puškin patrapiŭ pad amnistyju napiaredadni Novaha hodu. Byli asudzili jaho na dva hady ŭmoŭna za toje, što vyvaliŭ pierad łukašenkaŭskim pałacam vozik hnoju. Amnistyja była vielmi darečy: niadaŭna mastak staŭ pieramožcam konkursu na afarmleńnie carkvy Žyrovickaje Božaje Maci ŭ Kliŭlendzie ŭ štacie Ahajo.

Taksoŭki padaraželi

Z 10 studzienia padvysili taryfy na pasłuhi taksovak. Dniom kilametar prabiehu dy pasadka buduć kaštavać 275 r. Načny taryf – 410 r. za km. Raniej košt byŭ adnolkavy i nočču, i dniom.

Antyharadzienskija ŭłady

Haradzienskim uładam reža voka staražytny hierb miesta. Sioleta hierb, najchutčej, źmieniać, što dastasujuć da śviatkavańnia 200-hodździa stvareńnia rasiejskim carom Alaksandram I “hrodnienskoj hubiernii”.

Aleś Kudrycki

antalohija biełaruskaha ŭčynku

Vaŭki

Hetaja historyja budzie roźnicca ad tych, što zvyčajna traplajuć u “Antalohiju”. Tut niama nijakich burlesknych abo epičnych momantaŭ, ułaścivych raniejšym historyjam, što ŭvajšli ŭ jaje skład.

Zažorstki vypadak dla biaśpiečnaj i spakojnaj centralnaj častki Biełarusi pačatku XXI st. Zdaryłasia heta za 20 km na paŭnočny zachad ad Miensku, u minułyja vychodnyja, na pravasłaŭnyja Kalady – 7 studzienia.

Chłopiec ź dziaŭčynaj viartalisia z tancaŭ z Daŭhinava dachaty na vysiełki. U lesie na ich napali vaŭki. Apošniaje, što paśpieŭ zrabić junak, — padsadzić siabroŭku na dreva. Sam jon vyratavacca nie paśpieŭ — źviary zahryźli jaho prosta na vačach u dziaŭčyny, psychika jakoj nia vytrymała hetaha vidovišča.

Za tysiačy hadoŭ na hetaj ziamli ničoha nie źmianiłasia: śviet nie zrabiŭsia bolš litaścivy da nas, a našaja “cyvilizavanaść”, jak vyjaviłasia, jość tolki cienkim nalotam, bo, kali žyć zastajecca adnu chvilinu, Mužčyna instynktyŭna, a nie kirujučysia niejkimi nastanovami etykietu, ratuje Žančynu, pradaŭžalnicu Rodu.

My nia možam viedać, jak i kali pojdziem z hetaha śvietu, kolki hadoŭ, dzion, chvilinaŭ zastałosia tut być nam i tym, chto pobač z nami. Zhadajma pra heta, pierš čym złosna lapnuć dźviaryma, pierš čym niespraviadliva pakryŭdzić albo nieabhruntavana pakryŭdzicca, pierš čym dać volu svajmu razdražnieńniu. Moža stacca tak, što rezkaje słova, nieabačliva kinutaje na raźvitańnie, staniecca apošnim, pačutym ad ciabie rodnym čałaviekam. Bo sensam našaha isnavańnia nia jość ni praca, ni hrošy, ni dabrabyt, ale — vy ździviciesia — ščaście pabačyć siabie ŭ čyichści vačoch, mahčymaść addać usiaho siabie darešty j nie paškadavać pra heta ni na chvilinu. Pamiatajma pra heta.

Ihar Niachviedaraŭ