Pradstaŭlajučy novaha kiraŭnika staličnaj vobłaści, Alaksandar Łukašenka pa‑svojmu tłumačyŭ pryčyny zamieny Mikałaja Damaškieviča, jakoha padnačalenyja nazyvali «abłasnym baćkam» — tak padobnyja byli maniera kiravańnia, padychod da ludziej i prablemaŭ. Na dokaz kiepskich vynikaŭ haspadarańnia Damaškieviča načalnik krainy pryvioŭ ličby. Pra dva miljony tonaŭ zbožža była tolki bravada. Na spravie ŭ 2004 hodzie sabrali 1,7, u 2005 hodzie 1,6, a ŭ 2006‑m — 1,5 miljonaŭ tonaŭ. A rentabelnaść sielskaj haspadarki, skazaŭ jon, u vobłaści składaje minus 25 pracentaŭ. Nižejšaja tolki na Viciebščynie — minus 28 pracentaŭ.
Hetyja ŭryŭki z vystupu padało tolki ahienctva «Interfaks», jakoje pracuje na specyfičnuju aŭdytoryju. Ahienctva BiełTA, infarmacyju jakoha pieradrukoŭvajuć masavyja ŚMI, ich, viadoma ž, apuściła.
Ź fiktyŭnymi miljonami tonaŭ zbožža ŭsio jasna. Ale ličby rentabelnaści niečakanyja. Aficyjnaja statystyka daje plusavuju. Pravalnyja ličby minus 25 i minus 28 mohuć vyjści, kali ad prybytkaŭ sielskaj haspadarki adniać ličbu datacyj. U lubym razie, u krainie, akazvajecca, majecca dvajnaja statystyka ŭ vyniku dvajnych metodyk padliku. Uspaminajecca, jak niadaŭna A.Łukašenka byŭ skazaŭ, što na ŭtrymańnie kursu rubla na pačatku hodu vytracili tracinu zołatavalutnaha zapasu. Miž tym, pavodle spravazdačy Nacyjanalnaha banku jon źmienšyŭsia ŭ studzieni‑lutym niaznačna, a ŭ sakaviku vydatki byli całkam kampensavanyja i pačaŭsia rezki rost. A.Łukašenka vinavaciŭ staličnuju vobłaść u prypiskach, ale čym jość padvojnaja statystyka, kali nie tym samym?
Kali peŭnaja sfera pačynaje isnavać pa paniaćciach, a nie pa zakonie, u joj pačynaje razrastacca ŭsiakaja brydota. Heta paćviardžaje prykład takoj specyfičnaj vobłaści, jak sport. U nadzvyčaj ščyrym interviju Ŭładzimier Bieražkoŭ vychodzić za temu matču Biełaruś—Baŭharyja, jaki, mahčyma, byŭ pradadzieny.
Repartaž Iryny Čarniaŭki z kruhłaha stała ideolahaŭ i historykaŭ u Haradzienskim universytecie daje ŭjaŭleńnie pra sutnaść kanfliktu, vyklikanaha pierabudovaj staroj Horadni. Čym dalej, tym bolš ludziej razumieje, što pierabudova była pradyktavanaja nia stolki ekanamičnymi patrebami, kolki imknieńniem źniščyć duch horadu, jaki siłkavaŭ antysavieckija, antyłukašenkaŭskija nastroi, i stvaryć novuju, idealahična sterylnuju haradzkuju prastoru made in RB. Heta vyklikała abureńnie intelihiencyi i studenctva. Kab vypuścić paru, ideolahi sklikali kruhły stoł. U chod pajšli ekanamičnyja arhumenty: patreba «dobraŭparadkavańnia». «Tysiačy pracoŭnych ruk» procistaŭlajucca «studentam», jakija «biazdumna ŭciahvajucca» ŭ hulniu, raspačatuju «destruktyŭnymi elementami».
Nia treba dvaich, kab pačać, kaža prymaŭka.
