14 červienia ŭ budynku Navukova‑daśledčaha instytutu hiematalohii j pieralivańnia kryvi Ihar Kavalenka addaŭ svoj medal «Hanarovy donar Biełarusi» čynoŭnikam.
14 červienia ŭ budynku Navukova‑daśledčaha instytutu hiematalohii j pieralivańnia kryvi Ihar Kavalenka addaŭ svoj medal «Hanarovy donar Biełarusi» čynoŭnikam.
Pryčyny takoha ŭčynku spadar Kavalenka adrazu patłumačyŭ Radyjo Svaboda:
«Bieź dziaržaŭnaj padtrymki, bieź ilhotaŭ i padtrymki donarstva medal — prosta blaška. Heta nie hanarovaja ŭznaharoda, a prosta blaška».
Aficyjnaja statystyka śviedčyć, što kožnamu treciamu žycharu Biełarusi chacia b raz u žyćci spatrebiłasia donarskaja kroŭ.
Dyrektar NDI hiematalohii prafesar Michaił Patapnioŭ kaža, što zapasy kryvi ŭ krainie stvarajuć bolš jak dva miljony dobraachvotnikaŭ:
«Ja razumieju, što biaz donaraŭ maja dziaržaŭnaja słužba ničoha nie kaštuje. I paviercie mnie: ja abaraniaju ichnyja pravy. Viadoma, što emacyjny ŭsplosk jość i budzie. Ale kolkaść donaraŭ zastajecca raniejšaja: u Biełarusi 200—300 čałaviek zdajuć kroŭ štodzionna».
Na siońnia ŭ Biełarusi bolš jak 40 tysiač čałaviek majuć zvańnie «Hanarovy donar». Ciapier u ich zabirajuć źnižki na leki j sanatornyja pucioŭki, dabaŭki da pensii, prava na biaspłatnaje zubapratezavańnie.
20 červienia — papieradžalny strajk
Na znak pratestu donary ŭ Mahilovie zajavili, što źbirajucca spynić zdaču kryvi j plazmy. Siońnia inicyjatar akcyi Ihar Kavalenka nazvaŭ dakładny dzień jaje pačatku:
«20 červienia — papieradžalny strajk. Ale ž užo ŭ Mahilovie haradzkija ŭłady mianie papiaredžvali. Saramacili nibyta. A ja adkazvaŭ im prosta: «Kali donary hety tydzień buduć adpačyvać, to vy, čynoŭniki, budźcie łaskavyja — zdajcie svaju kroŭ, vyratujcie adno‑dva žyćci. Zrabicie heta, kali vy ličycie siabie humannymi ludźmi, a donaraŭ, jakija abjavili papieradžalny strajk, drennymi».
Sa słovaŭ Ihara Kavalenki, zhodu dałučycca da mahiloŭskaha strajku vykazali bolš jak 120 hanarovych donaraŭ, u tym liku i ź inšych rehijonaŭ — Mienščyny, Bieraściejščyny, Viciebščyny.
Kamientary