Aleś Michalevič: “Treba samim być mocnymi”

 Aleś Michalevič:
“Treba samim być mocnymi”

Na pytańni “NN” adkazvaje Aleś Michalevič, kiraŭnik Moładzievaha infarmacyjnaha centru – adzin ź lideraŭ moładzievaha ruchu Biełarusi

“NN”: Jak Vy aceńvajecie pieradvybarny raskład siłaŭ u biełaruskim hramadztvie?

Aleś Michalevič: Sapraŭdny raskład siłaŭ vyjavić zbor podpisaŭ, adnak vidavočna, što Łukašenka i pramaskoŭskija siły zacikaŭlenyja ŭ jaknajbolšaj kolkaści kandydataŭ, jakija buduć raściahvać demakratyčny j nacyjanalna aryjentavany elektarat. Viadziecca praca, kab pieršaje i druhoje miescy zaniali kandydaty ź jaskrava vyjaŭlenymi pramaskoŭskimi pierakanańniami.

“NN”: Jakija pośpiechi j parazy niezaležnaha hramadztva na etapie padrychtoŭki da vybaraŭ ciapier zrabilisia vidavočnymi?

A.M.: Stałasia vidavočnym, što, kali niama adzinaha kandydata ad demakratyčnaj apazycyi, BNF musiŭ vyłučać svajho. Jak minimum, heta była b praca na svoj ruch, na jahonaje ŭzmacnieńnie, na perspektyvu. Abo adziny, abo svoj. Zvyčka značnaj častki elektaratu hałasavać za kandydata ad BNF moža źniknuć. Ničoha dobraha ŭ budučyni heta nam nie pryniasie.

Niazdolnaść vyłučyć adzinaha kandydata ad apazycyi zaśviedčyła niepadrychtavanaść lideraŭ apazycyjnych palityčnych partyjaŭ. Viadomaje pahadnieńnie piaci apazycyjnych kandydataŭ uvohule źviało rolu palityčnych partyjaŭ u pracesie vyłučeńnia adzinaha kandydata da nula. Kali my chočam, kab BNF jak niezaležnickaja palityčnaja siła adradziŭ svoj były ŭpłyŭ, treba vyłučać svajho kandydata ŭ kožnaj vybarčaj akruzie – niezaležna, na vybarach prezydenta, parlamentu ci miascovych savietaŭ. Zrazumieła, kali heta budzie palityčna nieabchodna, možna źniać svajho kandydata na karyść kahości inšaha. BNF źjaŭlajecca najbujniejšaj u Biełarusi palityčnaj partyjaj, dla jakoj sabrać 100 000 podpisaŭ dastatkova prosta. Niezaležniki pavinny pavažać siabie, i tady pačnuć pavažać nas.

“NN”: Hałoŭnaj zadačaj biełaruskaha hramadztva ŭjaŭlajecca hurtavańnie siłaŭ vakoł niejkaha adnaho realna apazycyjnaha kandydata. Vakoł kaho i jak hetaha dabicca?

A.M.: Było spadziavańnie, što prezydenckaja kampanija spracuje na karyść papularyzacyi 2—3 apazycyjnych imionaŭ, na jakija stanuć aryjentavacca ludzi. Naprykład, prapracoŭvaŭsia taki varyjant: kandydat u prezydenty Domaš i jahonyja paplečniki – partyjnyja lidery Viačorka j Labiedźka. Hetaje spadziavańnie nia spraŭdziłasia. Hurtavacca možna było b vakoł kandydata, vyznačanaha KRDS abo, u krajnim vypadku, Kanhresam Demakratyčnych Siłaŭ. Viadoma, što kanhres svoječasova – pry kancy 2000-ha — pačatku 2001 h. – praviedzieny nia byŭ i kandydata nia vyłučyŭ. Razmovy pra toje, što bolšaść udzielnikaŭ Kaardynacyjnaj Rady padtrymali Domaša, źjaŭlajucca tolki razmovami. KRDS, što była stvoranaja dla vyłučeńnia adzinaha kandydata, svajoj zadačy nia vykanała. Siamion Domaš, padpisvajučy pahadnieńnie z Čyhirom, Hančarykam, Kalakinym i Kazłoŭskim, zaśviedčyŭ tym samym, što jon adzin ź piaci, a nie adziny. Va ŭsich demakratyčnych i niezaležnickich partyjach siabry pracujuć na niekalkich kandydataŭ. Nasupierak raspaŭsiudžanamu mierkavańniu, BNF nie vyklučeńnie. Častka siabroŭ Frontu padtrymała vyłučeńnie Zianona Paźniaka, dapamahaje źbirać za jaho podpisy.

Mnie zdajecca, treba abjadnacca vakoł taho kandydata, jaki budzie mieć šancy ŭ zmahańni suprać Łukašenki j pry hetym budzie stajać na niezaležnickich pazycyjach.

Uvohule ž, my čakajem kandydata, jaki nas pryviadzie da ŭłady, tady jak treba samim być mocnymi, razbudoŭvać svaje struktury, upłyvać na hetaje hramadztva. Kali budziem mieć siłu – rana ci pozna atrymajem uładu.

“NN”: Viedaju, što Vy tolki što z Varšavy. Jak tam usprymajucca našy pośpiechi i niaŭdačy?

A.M.: Jak palityčnyja realisty, palaki razumiejuć, što šancy na pieramohu ŭ nas vielmi małyja. Adnak pracesy, jakija iduć u Biełarusi, jany aceńvajuć vielmi pazytyŭna. Na ich dumku, apazycyja pačała vychodzić da ludziej, pierastała chavacca. Stvoranyja ŭmovy dla anhažavańnia novych siabroŭ u niezaležnyja struktury. I ŭsie adnaznačna pahadžajucca, što hetyja vybary zaśviedčać, čaho vartyja biełaruskija palityki.

“NN”: U piatnicu byŭ apiačatany ofis Vašaha Moładzievaha infarmacyjnaha centru. Što heta, na Vašu dumku, aznačaje?

A.M.: Heta aznačaje novy nastup uładnych strukturaŭ na niezaležnaje biełaruskaje hramadztva. Dumaju, my nie źjaŭlajemsia tut arhanizacyjaj unikalnaj, i hetkaja sytuacyja čakaje bolšaść niezaležnickich arhanizacyjaŭ – buduć prychodzić, buduć “najaždžać”, buduć apiačatvać – usio heta budzie ad uładaŭ.

“NN”: A što ŭ Vas tam takoje lažała, što Vas apiačatali?

A.M.: Moža być, heta źviazana z tym, što Moładzievy infarmacyjny centar znachodzicca ŭ hetym pamiaškańni nie zusim lehalna – heta pryvatnaja kvatera. Bo razam z afarmleńniem patrebnych damovaŭ uźnikaje šerah składanaściaŭ.

Hutaryŭ Mikoła