Aryšt Lavonava: aficyjnaja versija

Aryšt Lavonava: aficyjnaja versija

“Spravaj Lavonava” pravaachoŭnyja orhany krainy zajmajucca ŭžo kala hodu. Spačatku raśśledavańnie vioŭ 9-y adździeł UKDB pa Miensku i Mienskaj vobłaści, što adkazvaje za biaśpieku na transparcie. Pytańni ŭźnikli ź pieravozčykami, jakija transpartavali biełaruskija traktary za miažu.

MTZ ekspartuje svaju pradukcyju ŭ dziasiatki krainaŭ, tamu pytańnie ź pieravozčykami dla pradpryjemstva — pieršačarhovaje. Firmy-pieravozčyki ŭsiaho śvietu, u tym liku čyhunačnyja, aŭtamabilnyja i marskija, taksama nia suprać zaklučyć kantrakty z najbujniejšym pradpryjemstvam krainy. Tamu na MTZ byŭ praviedzieny tender na hetyja kantrakty. Na dumku pravaachoŭnych orhanaŭ, pieramahli nia tyja firmy, jakija prapanoŭvali najbolš vyhadnyja dla MTZ umovy, a tyja, što pahadzilisia płacić štomiesiačna chabar kiraŭnictvu zavodu. Pra heta i stała viadoma KDB. I traktarny zavod “uziali ŭ raspracoŭku”.

U prakuratury śćviardžajuć, nibyta na zavodzie nastolki nabralisia nachabstva, što źbirali daninu amal aficyjna. Kožny miesiac niekalki supracoŭnikaŭ adździełu, što zajmajecca kantraktami ź pieravozčykami, brali kamandziroŭku i z valizkami abjaždžali ŭsich-usieńkich dziełavych partneraŭ. U kancy vandroŭki ŭ ich nabirałasia vialikaja suma hrošaj. Kolki ź ich atrymlivaŭ i ci atrymlivaŭ uvohule niepasredna Lavonaŭ, śledztva pakul nia viedaje.

Paśla taho jak supracoŭniki 9-ha adździełu UKDB pa Miensku i Mienskaj vobłaści raskryli hetuju schiemu, spravaj zaniałasia prakuratura Biełarusi. Novyja epizody pačali źjaŭlacca tak chutka, što navat spatrebiłasia ŭzmacnić śledčuju hrupu supracoŭnikami nižejšych padraździaleńniaŭ prakuratury. Što kankretna majuć zaraz na rukach śledčyja, u prakuratury nia kažuć, ale adnaznačna śćviardžajuć, što Lavonaŭ moža trapić u turmu. Pa našych źviestkach, zaraz u spravie naličvajecca kala 15 epizodaŭ, dzie fihurujuć sumy ŭ sotni tysiačaŭ dalaraŭ. Kamitet dziaržkantrolu ŭvohule naličyŭ škody na 4 młn. dalaraŭ, ale jany, fihuralna kažučy, nie dajšli jašče da kryminalnaj spravy. Najbližejšym časam, pavodle źviestak z prakuratury, pačnucca čarhovyja aryšty pa “spravie Lavonava”. Ich budzie nia mienš za piać. Hałoŭnaje dla supracoŭnikaŭ KDB — nie ŭpuścić svaich “klijentaŭ”. Bo ŭcioki Lavonava amal atrymalisia. Uciokami jany nazyvajuć jahonuju pajezdku ŭ Maskvu.

Za Lavonavym było ŭstalavanaje patajemnaje vonkavaje nazirańnie. Jaho “viali” niekalki miesiacaŭ, vyjaŭlali, z kim i kali jon sustrakajecca j ci nie źbirajecca ŭciačy za miažu. Na Kalady Michaił Lavonaŭ z čałaviekam mocnaha ciełaskładu, nibyta hramadzianinam Izrailu, raptam pajechaŭ na čyhunačny vakzał i sieŭ u maskoŭski ciahnik. Z toj pryčyny, što pra takuju pajezdku dyrektara MTZ supracoŭniki KDB nia viedali, jany zapadozryli, što Lavonaŭ z Maskvy ŭ Biełaruś bolej nia vierniecca. Ale ciažkaść była ŭ tym, što specsłužby nie mahli aryštavać dyrektara MTZ biaz sankcyi prakurora. Pakul sankcyju na aryšt padpisaŭ adzin z namieśnikaŭ Šejmana, Lavonaŭ užo paśpieŭ padjechać da Voršy.

U Voršy Lavonava zatrymali supracoŭniki adździełu transpartnaj milicyi, i tolki paśla prybyli pradstaŭniki KDB. Transpartnaja milicyja, zvykłaja łavić tolki “zajcoŭ” dy debašyraŭ, byccam by akazałasia praktyčna nie hatovaja da zatrymańnia takoha važnaha čałavieka. Kali Lavonaŭ raspraviŭ svaje plečy i ŭ mocnych vyrazach daŭ zrazumieć milicyjantam, kaho jany zatrymali, tyja ŭvohule pierapałochalisia. Adnak zatrymanych nie adpuścili. Jak raskazvajuć milicyjanty, kali kamitetčyki pakazali dyrektaru MTZ svaje paśviedčańni i sankcyju na aryšt, toj adrazu źviaŭ, źbialeŭ bialej śniehu. Supracoŭniki prakuratury śćviardžajuć, što ŭ Lavonava znajšli pašpart ź jahonym fotazdymkam, ale zusim inšymi imiem i proźviščam. Mienavita hety dakument daje supracoŭnikam KDB padstavu dumać, što dyrektar zavodu imknuŭsia nielehalna pakinuć krainu.

Pakul niezraźmieła, chto toj čałaviek, jaki supravadžaŭ Lavonava padčas uciokaŭ. Pavodle adnoj infarmacyi, heta jahony asabisty ciełaachoŭnik, jakoha dyrektar naniaŭ paśla niaŭdałaha kantraktu z čačencami. Pavodle druhoj — historyju z čačencami prydumaŭ sam Lavonaŭ, kab patłumačyć prysutnaść pry im achoŭnika. A toj byŭ zusim nie achoŭnikam, a pravadnikom, jaki pavinien byŭ zabiaśpiečyć vyjezd apalnaha dyrektara za miažu. Michaiłu Lavonavu moža być pradjaŭlena abvinavačańnie pa art.428 (“Słužbovaja chałatnaść”) i art.424 (“Złoŭžyvańnie ŭładaj ci słužbovym stanoviščam”) Kryminalnaha kodeksu Biełarusi.

Pavodle Biełorusskoj diełovoj haziety

Aryšt: versija siamji

Hieneralny dyrektar MTZ Michaił Lavonaŭ, jak paviedamlałasia, byŭ zatrymany 8 studzienia. U toj samy dzień supracoŭniki pravaachoŭnych orhanaŭ praviali pieratrusy ŭ jahonaj kvatery, haražy i na leciščy. A 10 studzienia apisali majomaść. Pry hetym abvinavačańnie zatrymanamu dahetul nie pradjaŭlena.

Žonka i advakat M.Lavonava ŭ interviju “Narodnaj voli” tłumačać adjezd Lavonava ŭ Maskvu nieabchodnaściu kansultacyi ŭ daktaroŭ. Pavodle ichnych słovaŭ, nibyta “padrobnyja dakumenty”, ź jakimi jaho zatrymali, heta ŭsiaho tolki bilet na inšaje imia, pakolki kuplaŭ jaho nia sam Lavonaŭ, a šafior jahonaha siabra.

Alena Lavonava, žonka byłoha dyrektara, upeŭnienaja ŭ nievinavataści muža. Pavodle jejnych słovaŭ, Lavonaŭ, zabyvajučy pra siamju, addavaŭ pracy ŭvieś svoj čas, rabiŭ usio, kab sytuacyja na zavodzie była spryjalnaj i ludziam svoječasova vypłačvaŭsia zarobak. Zavod niaspynna praviarali roznyja instancyi. Adnaho razu Lavonaŭ skazaŭ žoncy: “U hetaj krainie mnie tolki dźvie darohi — abo ŭ turmu, abo na mohiłki”.

Asabliva časta prydziracca pačali paśla taho, jak pierad vybarami Michaiła Lavonava zhadali ŭ liku vierahodnych kandydataŭ na pasadu prezydenta Biełarusi — ludziej, jakija svaim rozumam i pracaj zdoleli šmat čaho dasiahnuć. Choć, jak śćviardžaje Alena Lavonava, jaje muž nikoli na hetuju pasadu nie pretendavaŭ.

10 studzienia Lavonavu admovili ŭ vyzvaleńni pad padpisku ab niavyjeździe. Namieśnik hienprakurora paabiacaŭ paŭtorna razhledzieć hetaje pytańnie praź siem dzion.