list u redakcyju
Ruki preč ad Safii!
U šerahu nacyjanalnych symbalaŭ poruč stajać kryž Eŭfrasińni Połackaj i połacki Safijski sabor. Usie jany kožny pa-svojmu symbalizujuć Biełaruś. I zrazumieła, vorahi biełaruščyny i niezyčliŭcy Biełarusi zaŭsiody imknulisia źniščyć, zabaranić ci apahanić ich abo zavałodać, kab prystasavać da svaich patrebaŭ. Niadaŭna Kamitet pa spravach relihii i nacyjanalnych mienšaściaŭ zahadaŭ połackim haradzkim uładam padrychtavać pieradaču chramu Rasiejskaj pravasłaŭnaj carkvie. My ličym taki krok kamitetu nieabdumanym. Dziaržaŭny orhan nia musić iści na pavadku ŭ siłaŭ, jakija chočuć destabilizavać sytuacyju, raspalić u našym hramadztvie mižrelihijnuju varožaść. U 70—80-ch hadach pomniki dojlidztva, a značyć i bažnicy, ratavali ad źniščeńnia biełaruskija patryjoty. Na žal, tady siarod abaroncaŭ Božych chramaŭ nie było vidać anivodnaha pravasłaŭnaha śviatara. Pad naciskam intelihiencyi ŭ 80-ch pačałasia restaŭracyja połackaj Safii. Restaŭracyja praviedzienaja na vysokim uzroŭni, u chramie ŭstalavanyja ŭnikalnyja arhany – honar horadu i krainy. Było pryniataje na toj čas adzina pravilnaje rašeńnie: śviatynia pavinna słužyć nia vuzkamu kołu parafijanaŭ adnoj kanfesii, jana pavinna naležać usiamu narodu. U sabory byŭ stvorany muzej śviatyni i kancertnaja zala. I chram staŭ duchoŭnym zdabytkam usiaje nacyi.
Usio pavinna adbyvacca mirna, z dumkaj pra Biełaruś i biaź źmienaŭ statusu saboru śv.Safii. Prava ažyćciaŭlać svaje nabaženstvy ŭ Chramie pavinny mieć usie chryścijanskija supołki, jakija adradžajuć biełaruskuju duchoŭnaść i karystajucca ŭ nabaženstvach biełaruskaj movaj, što całkam adpaviadaje biełaruskaj taleranckaj tradycyi.
Leanid Akałovič, vykładčyk i śviatar; Ryhor Bakijevič, režyser; Śviatłana Bielskaja, bijolah; Ryhor Baradulin, narodny paet Biełarusi; Janka Bryl, narodny piśmieńnik Biełarusi; Radzim Harecki, akademik NANB; Edvard Zajkoŭski, kandydat histaryčnych navuk; Alaksiej Karol, historyk; Mikałaj Kryžanoŭski, deputat VS CHII sklikańnia; Mikoła Krukoŭski, prafesar; Uładzimier Kułažanka, prafesar; Mikoła Kupava, mastak; Alaksiej Maračkin, mastak; Uładzimier Puzynia, zasłužany dziejač mastactvaŭ Biełarusi; Uładzimier Sodal, litaratar; Viačasłaŭ Čamiarycki, kandydat filalahičnych navuk; Michaś Čarniaŭski, historyk; Jury Chadyka, prafesar
(Ad red.: zvarot padadzieny skaročana.)
Ciapier čytajuć
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary