Biełarusy myjuć hrošy
ad handlu zbrojaj
U polskim tydnioviku “Ŭprost” źjaviŭsia artykuł Jana Čuryłoviča i Vijalety Krasnoŭskaj pra toje, jak Biełaruś pradaje zbroju ŭ roznyja krainy śvietu.
Supastaŭlajučy źviestki z roznych krynicaŭ, žurnalisty prychodziać da vysnovy, što ślady ŭ hetaj spravie viaduć da biełaruskaha KDB. Mienavita hety orhan stvaryŭ cełuju sietku firmaŭ i bankaŭ, jakija nia tolki handlujuć zbrojaj i admyvajuć hrošy, ale j pierapraŭlajuć roznyja tavary ŭ krainy, handal ź jakimi kantralujecca mižnarodnymi arhanizacyjami. Pastaŭkami zbroi i vajennaha ryštunku zajmajecca dziaržaŭnaje pradpryjemstva “Biełźnieštechnika”, a taksama pryvatnaja kampanija “Biełtechekspart”. Suviazi z mahčymymi pakupnikami abiedźvie firmy, mahčyma, naładžvajuć praz zamiežnyja pradstaŭnictvy biełaruskich zavodaŭ — pieravažna MAZu, jaki maje svaje filii ŭ 40 krainach (u asnoŭnym u Siaredniaj Eŭropie i na Blizkim Uschodzie).
U aperacyjach, źviazanych z handlem zbrojaj i inšymi padobnymi tavarami, fihuruje, jak piša “Ŭprost”, “Infabank”, jakim kirujuć blizkija paplečniki Łukašenki i jaki źjaŭlajecca častkaj bankaŭskaha chołdynhu “Infahrup”. “Infabank” — taki sabie kaardynatar i nahladčyk za hetymi aperacyjami. Pieramiaščeńnie kapitałaŭ padčas niezakonnych aperacyj adbyvajecca praz pasiarednictva “Biełmetałenerha” (daččynaja firma “Infabanku”), a taksama kampanij “Kapitał” i “Biznes menedžment SA” ź siadzibaj u Vienie. Z dakumentaŭ, da jakich mieli dostup infarmatary “Ŭprostu”, vynikaje, što ad hetych kampanij srodki pieraciakajuć na rachunki niekalkich socień firmaŭ, zarehistravanych u krainach z spryjalnym padatkovym klimatam, — na Kajmanach, astravach Men, Džersi, Virhinskich vyspach i h.d. Adtul jany pieravodziacca ŭ zamiežnyja pradstaŭnictvy biełaruskich pradpryjemstvaŭ u jakaści płaty za vykanańnie papiarednie atrymanych imi fiktyŭnych zakazaŭ na roznyja tavary i pasłuhi. Bolšaść hetych pradstaŭnictvaŭ nasamreč nie zajmajecca nijakaj haspadarčaj dziejnaściu, śćviardžaje “Ŭprost”. Adna z takich firmaŭ, naprykład, — filija MAZu ŭ polskim Piasečnie, dyrektar jakoj Jury Michajłoŭski nia zmoh adkazać na pytańnie žurnalistaŭ, kolki hruzavikoŭ jany pradali za minuły hod.
Inšaj kampanijaj, što dziejničała ŭ Polščy, była “Interekma”, zasnavanaja Ŭładzimieram Piefcijevym, paźniej adnym sa stvaralnikaŭ “Biełtechekspartu”. Kali dziejnaściu Piefcijeva zacikaviłasia polskaja kontravyviedka, biznesmen viarnuŭsia ŭ Biełaruś, a praź miesiac staŭ šefam filii “Biełtechekspartu” ŭ Budapešcie.
“Paśla šerahu mižnarodnych transfertaŭ praktyčna niemahčyma vyśvietlić, adkul uzialisia “admytyja” srodki. Tym bolš što biełaruskija firmy prajšli staruju škołu savieckaha KHB — jany nie admyvajuć za adzin raz bujnych sumaŭ, pracujuć maksymum ź niekalkimi dziasiatkami tysiač dalaraŭ, nie vyklikajučy padazreńniaŭ u instytutaŭ finansavaha kantrolu. Aperacyjaŭ vielmi šmat, tamu ŭ vyniku admyvajucca sotni miljonaŭ dalaraŭ”, — cytuje “Ŭprost” Džona Hienśli, šefa brytanskaha Biuro kryminalnaj infarmacyi.
Hrošy ad prodažu zbroi mahli b šmatkroć pavialičyć dachody dziaržavy. Adnak jany nie traplajuć u biudžet Biełarusi, a asiadajuć u pazabiudžetnych fondach.
Pavodle “Wprost”
Kamientary