Humar
specyjalny prajekt
analitika
My prybirajem kropki nad “i”
Vy čytajecie novy specyjalny prajekt “Analitika”. Padziei ŭ krainie i śviecie aśviatlajuć urač-futurolah Mikałaj Fiadupa, dyjahnostyk Alaksandar Patulak i frenolah Michaił Patuta. Pakolki naš prajekt pryznačany nia tolki dla biełarusaŭ, ale i dla turkaŭ, jahony zahałovak budzie pisacca z tureckimi “i”. Heta dazvolić nam lepš analizavać samyja vostryja tendencyi palityčnaha žyćcia. Mahčyma, z časam u jahonym zahałoŭku adno ź “i” stanie biełaruskim.
A.P.: Biezumoŭna, hałoŭnaj padziejaj minułaha tydnia na biełaruskaj palityčnaj scenie staŭsia pralot nad hetaj scenaj prezydenta ZŠA Buša ŭ kirunku Rasiei j nazad. Prezydent Pucin, aproč car-zvonu, car-puški i car-bałałajki, pakazaŭ amerykanskamu kalehu i našu susiedniuju paŭnočnuju stalicu ź jejnym universytetam, akcentavaŭšy tym samym uvahu na nieabchodnaści vyrašać blizkaŭschodnija prablemy mirnym šlacham. Ab čym prezydenty havaryli za začynienymi dźviaryma — ciažka skazać, ale bačna było, što, niahledziačy na dasiahnutuju damoŭlenaść, jany chavajuć svaju niezadavolenaść dvuchbakovaściu pieramovaŭ. Cikava, što biełaruski prezydent nia byŭ zaprošany na sustreču i jamu pryjšłosia zrabić vyhlad, byccam jon sam nia zmoh uziać udzieł u sustrečy, bo ŭ hety čas byŭ zaniaty razhruzkaj ešalonu z rajalami, zakuplenymi im dla Biełaruskaj akademii muzyki. Hrupa ŭpłyvovych maskoŭskich analitykaŭ sychodzicca na dumcy, što zaprašeńnie Buša — taktyčny chod Pucina, jaki takim čynam puskaje pył u vočy prazachodnim nacyjanał-demakratam, usie svaje siły tym časam kładučy na macavańnie Damovy ab kalektyŭnaj biaśpiecy.
M.F.: Mušu z vami nie pahadzicca, kaleha. Inšaja ŭpłyvovaja hrupa maskoŭskich analitykaŭ davodzić, što Buš pryjaždžaŭ z metaj uciahnuć Pucina ŭ žydamasonskuju zmovu suprać apošniaha apłotu pravasłaŭja i sabornaści — maleńkaj Respubliki Biełarusi. Jak mnie stała viadoma ź infarmavanych krynic u adnoj ź biełaruskich specsłužbaŭ, našyja spadarožnikavyja systemy źniešniaha sačeńnia za latalnymi aparatami zafiksavali adździaleńnie ad Bušavaha samalota ciomnaha pradmieta i jahonaje padzieńnie na terytoryi Tałačynskaha rajonu. Ja miarkuju, što heta miech z addrukavanaj u Amerycy hatoŭkaj biełaruskaha rubla, što musić stvaryć u respublicy krytyčnuju hrašovuju masu i vyklikać devalvacyju biełaruskaha rubla.
M.P.: Tak, jakraz z metaj praduchileńnia niepažadanych dla słavianskaj idei i dla siabie asabista rašeńniaŭ Pucina biełaruski prezydent ładzić sioleta vučeńni “Biarezina”. Charakterna, što ŭ paraŭnańni ź letašnim “Niomanam” dyjametralna źmianiŭsia kirunak abarončych dziejańniaŭ našych vojskaŭ. Tryma tankavymi dyvizijami siły taktyčnaha praciŭnika buduć uziatyja ŭ kleščy pad Smalenskam i raździelenyja. Častku adcisnuć na Pskoŭščynu i źniščać, a reštu buduć hnać da samaj Klaźmy. U chodzie vučeńniaŭ planujucca navat vučebnyja strelby ź jadravaj zbroi chałastymi. Adpaviednyja bojehałoŭki ŭžo dastaŭlenyja ŭ Voršu.
A.P.: Tym nia mienš, deklaravanaja meta vučeńniaŭ — adpracoŭka baraćby z teraryzmam, niezakonnaj mihracyjaj, narkamafijaj, nimfamanijaj i žydamasonskaj zmovaj. Sioletniaje źmiaščeńnie ź Niomana na Biarezinu — heta, pavodle aficyjnaje versii, adpracoŭka taktyčnaha adstupleńnia sajuznych siłaŭ z metaj zavabić vojski suśvietnaha sijanizmu ŭ načynieny vybuchoŭkaj Miensk i źniščyć, nie puściŭšy dalej pa maskoŭskaj šašy. Što ž da biaschoznaha ešalonu z bojehałoŭkami, dyk jon staić u Voršy z 1514 hodu.
M.P.: Naŭrad ci, kaleha, my ŭ chutkim časie pabačym žydamasonaŭ na našym zachodnim rubiažy. Pavodle infarmacyi, atrymanaj z kampetentnych orhanaŭ kołam ekspertaŭ, blizkim da atačeńnia adnaho z maskoŭskich analityčnych centraŭ, śviet staić na parozie hlabalnaha kryzysu. I toj ciomny pradmiet, skinuty ŭ tałačynskija lasy, byŭ zusim nie ź biełaruskaj hatoŭkaj, a z amerykanskimi dalarami. Hetkim čynam Buš pazbaŭlajecca ad svajoj krytyčnaj masy, pieraduchilajučy devalvacyju...
M.F.: Dziakuj za plonnuju dyskusiju, kalehi. Pa vynikach jaje stała zrazumieła, što sytuacyja Ŭrała Łatypava robicca ŭsio bolš chistkaj z kožnym dniom, miž tym, staŭleniki Ŭładzimiera Zamiatalina znoŭ vysoŭvajucca na klučavyja pasady ŭ dziaržaŭnym aparacie.
Adździeł analitiki
Ad Sabako
U suviazi sa šmatlikimi publikacyjami ŭ “NN”, u jakich i tak, i siak, i hetak pałoščacca majo dobraje imia, mušu zajavić nastupnaje: i pry kulcie, i pry valuntaryźmie, i ŭ časy zastoju, i ŭ epochu ŭskareńnia i pierastrojki, i ŭ paru razhułu demakratyi, i siońnia ŭ pracesie intehracyi ja ŭsimi čatyrma łapami išoŭ i idu ŭ nahu z časam i z maim narodam, dzielačy jaho radaści i niahody. Siońnia ja nijaki vam nie Sabaka, a hraždanin Respubliki Biełarusi, i pa novym pašparcie, i pa ŭbiaždzienijach, – SABAKO! Jak, prykładam, nia Dyńka, a Dyńko, nia Skurka, a Skurko! Zarubicie heta sabie na vašym hluhastym žydamasonskim nosie! I ŭžo kali zaśviarbić vam znoŭ na jaki-niebudź nabrech ci nieprystojny zakid u moj adras, dyk sabludajcie pryličyja tak zvanaj niezaKaścianiełaj presy (chto jak u čym, a naš brat ŭ kaściach raźbirajecca i smak viedaje, na kaściach vyraśli!), inakš i da vas pryjdzie bondar i nabje vam abručy.
I, na dobry kaniec, kab zadać krychu mažoru i praśviatlić Vam maje umanastrajenija, pracytuju apublikavany ŭ hazecie “Źviazda” (14.09.1999) samabytny vierš našaha Baćki i Važdža, jaki i dla mianie – mienifest i ŭ tysiaču razoŭ lepšy za ŭsiu šmatchvalonuju paeziju palicičaski adstałaha Bykava, na jakoj, na žal, i ja koliś vychoŭvaŭsia, choć upłyŭ apošniaj, taksama na žal, mocna adčuvajecca:
“V etot dień my s toboj podružiliś,
Sołncie śvietiło tohda.
Ja nikohda nie zabudu
Etoho jasnoho dnia”.
Nielicapryjatny vam Sabako
P.S.: Haračy pryviet usim boruščymsia z vami narodam i asabista tav. Hraždanu.
