Aksana Novikava: biełaruskaja Navadvorskaja

Aksana Novikava: biełaruskaja Navadvorskaja

Žycharka Miensku pryvatnaja pradprymalnica Aksana Novikava była zatrymanaja ranicaj 17 kastryčnika za raspaŭsiud antyprezydenckich ulotak. Amal sutki jana prasiedzieła ŭ izalatary i ŭviečary 18 kastryčnika była vypuščanaja pad padpisku pra niavyjezd.

Śledčy prakuratury Centralnaha rajonu Maksim Padziarej raspačaŭ kryminalnuju spravu, źvinavaciŭšy A.Novikavu ŭ parušeńni artykuła 367 č.2 KK (paklop na prezydenta Respubliki Biełarusi). Za heta možna atrymać abmiežavańnie ci pazbaŭleńnie voli na termin da 5 hadoŭ. Za apošnija miesiacy pavodle hetaha artykuła byli asudžanyja Pavał Mažejka, Mikoła Markievič i Viktar Ivaškievič.

21 kastryčnika A.Novikava abskar­dziła ŭ Mienskaj haradzkoj prakuratury dziejańni M.Padziareja, jaki źmiaściŭ spn.Aksanu ŭ izalatar, viediučy, što jana adna haduje małuju dačku (hod i 5 miesiacaŭ). Aproč taho, A.Novikava źviarnułasia ŭ sud Maskoŭskaha rajonu z pratestam suprać taho, što ŭ izalatary jaje dahladaŭ mužčyna, a nie žančyna. U sudzie, pavodle słovaŭ spn.Aksany, zajavu pryniać admovilisia: maŭlaŭ, nia ichnaja kampetencyja.

Aksana Novikava tolki try miesiacy tamu viarnułasia z Francyi, dzie pražyła paŭtara hodu. Tamsama naradziła dzicia. Jejnaja dačuška navat nia maje biełaruskaha paśviedčańnia ab naradžeńni - tolki francuskaje. Kabieta paśpiavaje sama hladzieć dzicia, davać rady svajmu biznesu (aptovyja pastaŭki charčovych praduktaŭ) i “zajmacca palitykaj” - nabirać na drukarskaj mašyncy pad kapirku ŭlotki, vystojvać la Administracyi prezydenta, razdajučy ich supracoŭnikam, a ciapier vo jašče - chadzić pa sudoch. Emacyjnyja praklamacyi A.Novikavaj, jakija niaźmienna pačynajucca słovami “Zdravstvujtie, uvažajemyje hospoda!”, nahadvajuć dysydenckija zvaroty savieckich časoŭ. Ulotki rezkija - jany vinavaciać A.Łukašenku ŭ kryminalnych złačynstvach. A.Novikava biare na siabie funkcyi prakurora i suda. Heta vidavočna parušaje zakon. Ale spadarynia Aksana maje svoj pohlad na taktyku palityčnaj baraćby: “Chaciełasia pryciahnuć uvahu hramadztva da 367-ha artykuła Kryminalnaha kodeksu. Usio ž taki “lese-majeste”, “źniavahi Jaho karaleŭskaj Vialikaści” - nie zusim dobry matyŭ dla kryminalnaha pieraśledu. Tak, mahčyma, udasca dabicca admieny hetaha artykułu. Ci chacia b zrabić tak, jak u Kazachstanie, - nie prymianiać jaho...”

“NN”: Heta było pradumanaje dziejańnie ci niejki krok adčaju?

Aksana Novikava: Nijakaha adčaju. Usio było pradumana, asensavana. Heta ŭžo treciaja našaja akcyja. U kastryčniku my ŭžo dvojčy prychodzili pad rezydencyju prezydenta i razdavali tam ulotki. I kožny raz usio skančałasia dobra.

“NN”: Kažacie “našaja akcyja”. Vy ŭvachodzicie ŭ jakuju-niebudź partyju?

A.N.: Nie, u mianie jość znajomcy ŭ AHP, ale hetaksama jość znajomcy ŭ KCHP-BNF. Praŭda, znajomstvam usio i abmiažoŭvajecca. Ja chadžu na ŭsie masavyja akcyi, ale ni ŭ jakuju partyju nie ŭvachodžu. U mianie jość koła adnadumcaŭ. My nikoli nie imknulisia zarehi­stravacca.

“NN”: Jakoj idejaj kirujecca Vaša koła?

A.N.: Saviecki Sajuz razvaliła presa. Kali stali paŭsiudna havaryć pra toje, što rabiłasia ŭ SSSR, jon razvaliŭsia. Kali buduć šyrej havaryć pra toje, što robicca ŭ nas, mnohija zrazumiejuć: być suprać - nia tak i strašna.

“NN”: Vašyja siabry buduć praciahvać takija akcyi?

A.N.: Nia viedaju - vierahodna, buduć. Ale bieź mianie.

“NN”: Vy nie źbirajeciesia źjaž­džać ź Biełarusi?

A.N.: Ja ž tolki-tolki z Francyi viarnułasia...

“NN”: Vy ŭžo vybrali advakata, jaki budzie Vas abaraniać?

A.N.: Nie, na dopycie ŭ mianie byŭ advakat, jakoha pasłała jurydyčnaja kansultacyja. Ale paśla taho ja havaryła z pradstaŭnikami i Biełaruskaha Chielsynskaha kamitetu, i “Viasny-96”. Mnie abiacali dapamohu.

Hutaryŭ Arkadź Šanski