Zornuju Ispaniju ŭ matčy suprać ścipłaha Kaba-Verde spyniŭ 40‑hadovy bramnik pa mianušcy «Babula». Voś što pra jaho viadoma

Da pačatku matča na instahram Vazińji byli padpisanyja 56 tysiač čałaviek. Padčas paślamatčavaha intervju padpisčykaŭ užo było 1,5 miljona, a na nastupny dzień — bolš za 5 miljonaŭ. «Heta varjactva», — skazaŭ ahałomšany bramnik.

Kaba-Verde — debiutant čempijanataŭ śvietu. Adnak ža vychad zbornaj afrykanskaj astraŭnoj dziaržavy ŭ finalnuju častku ČS składana nazvać vypadkovym: u adboračnaj hrupie Kaba-Verde apiaredziła Kamierun na čatyry ački i zabiaśpiečyła sabie pramoje traplańnie na turnir.

Tym nie mienš, zorak u składzie Kaba-Verde niama, i Ispanija pierad matčam pieršaha tura hrupavoha turniru ličyłasia biezumoŭnym favarytam.

Niečakany hieroj matča

Paśla finalnaha śvistka kamiery vychapili bujnym płanam tvar 40‑hadovaha bramnika. Hulnia skončyłasia ź likam 0:0, ispanskija zorki tak i nie zmahli zabić Kaba-Verde. Futbalisty afrykanskaj zbornaj kinulisia abdymać svajho bramnika, jaki atrymaŭ uznaharodu jak najlepšy hulec matča.

Pavialičyć

«Hetaje vystupleńnie — zasłuha kožnaha. Ja — hałoŭny hieroj hulni, ale hetaja ŭznaharoda dla ŭsich maich kaleh, bo bieź ich ničoha nie atrymajecca. I ja budu praciahvać pracavać na karyść kamandy i ludziej», — skazaŭ Vazińja paśla matča.

Na kožnym mundyjali byvajuć svaje hieroi: tak, padčas ČS-2014 bramnik Kosta-Ryki Kiejłar Navas nastolki ŭraziŭ śpiecyjalistaŭ, što byŭ nabyty madrydskim «Reałam». Praz hod Navas staŭ asnoŭnym hałkipieram «Reała» i paśla vyjhraŭ try Lihi čempijonaŭ.

Vazińja z-za ŭzrostu na niešta padobnaje raźličvać nie zmoža. Ale matč suprać Ispanii staŭ pikam jaho ŭ cełym nie nadta ŭražlivaj karjery.

«Babula»

U partuhałamoŭnych krainach, da jakich adnosicca i Kaba-Verde, futbalisty časta vystupajuć pad mianuškami.

Pavialičyć

Nasamreč bramnika zbornaj zavuć Žazimar Dyjas. Jaho nazvali ŭ honar brazilca Žazimara, jaki zabiŭ na ČS 1986 hoda miač u varoty zbornaj Paŭnočnaj Irłandyi — toj hoł pryznali adnym z najpryhažejšych na turniry.

U dziacinstvie da jaho prykipieła mianuška Vazińja (Vozinha) — «babula».

«Ja nikoli nie žyŭ z baćkami. Kali ja naradziŭsia, moj baćka słužyŭ u armii, a mamie zaŭsiody davodziłasia pracavać, tamu ja vyras z babulaj i dziadulem. U našym rajonie inšyja chłopčyki byli našmat starejšyja, i ja pastajanna hulaŭ ź imi na vulicy — i atrymlivaŭ napoŭnicu. Ja dobra hulaŭ i nie lubiŭ prajhravać, mianie časta bili, i ja viartaŭsia dadomu raźjušany. A jany śmiajalisia ź mianie i kazali, što ja pajdu skardzicca babuli i dziadulu», — raskazaŭ Vazińja ŭ intervju dva hady tamu.

Bramnik ciarpieć nie moh svaju mianušku. Ale ŭ vyniku źmiryŭsia ź joj. U 2012 hodzie, kali jamu było 26 hadoŭ, Žazimar Dyjas upieršyniu adpraviŭsia hulać za miežy Kaba-Verde, u anholski kłub «Prahresa». Ale tam užo byŭ inšy hałkipier ź imieniem Žazimar.

«Tamu ja vyrašyŭ, što nie budu pisać na cišotcy «Žazimar II». A pakolki ŭsie ŭ Kaba-Verde viedali mianie jak Vazińju, ja i zastaŭsia pad hetym imieniem», — uzhadvaŭ bramnik.

Pavialičyć

U jaho karjery niama viadomych kłubaŭ. Na słychu chiba što tolki partuhalski «Žył Visente», za jaki Vazińja hulaŭ usiaho tolki adzin siezon, a taksama «Zimbru» z Małdovy. Zaraz jon vystupaje za kłub «Šavieš», jaki zajmaje 9‑ie miesca ŭ druhim dyvizijonie čempijanatu Partuhalii.

Paru hadoŭ tamu Vazińja źbiraŭsia zaviaršać karjeru, ale zbornaja stała nabirać abaroty ŭ adboračnym turniry, i jon vyrašyŭ zastacca, raźličvajučy na cud — mahčymaść zhulać na čempijanacie śvietu.

Cud u vyniku staŭ realnaściu, a Vazińja nie tolki zhulaŭ na nul ź Ispanijaj, ale i ŭstalavaŭ rekord — jon samy ŭzrostavy hulec, jaki debiutavaŭ na ČS.

• 17
• 0
• 0
• 0
• 0
• 0
• 0
• 1