***
Bartkievič za kratami...Jarašuk nia tonie...Paŭłaŭ u planach...Vajtovič suprać...Kraŭčanku viartajuć ź Japonii...Rekord temperatury...Johurty — na čystuju vadu
Bartkievič za kratami
Syn himnastki Volhi Korbut i śpievaka Lavona Bartkieviča Ryčard Bartkievič asudžany amerykanskim sudom na 3,5 hodu turmy za falšavańnie dalaraŭ. Jon taksama musić vypłacić 5 tys. dalaraŭ kramam, u jakija jon paśpieŭ padsunuć falšyvyja hrošy. Bartkievičam dapamahli emihravać amerykanskija biełarusy jašče ŭ 1991 h. Ryčardu ciapier 23 hady, a ŭ momant vyjezdu było 12. Jak paviedamiła radyjo “Svaboda”, Volha Korbut na sud nie pryjaždžała, adno dasłała list padtrymki.
Jarašuk nia tonie
Bolšaściu hałasoŭ rada Biełaruskaha kanhresu demakratyčnych prafsajuzaŭ rekamendavała na post prezydenta hetaj arhanizacyi Alaksandra Jarašuka. Hety dziadźka ŭžo staŭ adzinym demakratyčnym kandydatam i arhanizavaŭ referendum pa demakratyčnym dałučeńni Biełarusi da Rasiei. Ciapier samaja para pakiravać demakratyčnymi prafsupołkami.
Paŭłaŭ u planach
Mienharvykankam planuje za nastupny hod pryciahnuć u haspadarku horadu 480 młn. dalaraŭ zamiežnych investycyj. Kali ŭličyć, što ŭ cełuju krainu stolki nie było investavana za papiarednija 10 hadoŭ, dyk sapraŭdy až duch zajmaje. I nijakaj ironii! Vuń ža paabiacali vijetnamcy kupić motavelazavod. A viečarami jany jašče j cynoŭki na kamvolnym pleści buduć.
Vajtovič suprać
Staršynia savietu respubliki Alaksandar Vajtovič prahałasavaŭ suprać pryniaćcia da viedama prezydenckaha dekretu ab Akademii navuk. Jaho padtrymali jašče dva deputaty. A “za” było 38.
Kraŭčanku viartajuć ź Japonii
Pasoł Piatro Kraŭčanka, eks-ministar zamiežnych spravaŭ, vyzvaleny ad pasady pasła ŭ Japonii. Nie za apazycyjnaść, na žal. Jon adpracavaŭ u krainie “sušy” 4,5 hodu, a zvyčajna pasoł bavić u adnoj krainie nia bolš za try-čatyry hady.
Rekord temperatury
17 listapada ŭ Miensku byŭ pabity temperaturny rekord. A 15-j rtutny słupok dasiahnuŭ adznaki 16 hradusaŭ. Tym samym pieraŭzydzieny pakaźnik 1934 h. — 11,2 hradusa. Ci źviazana heta z praviadzieńniem akcyi ŭ abaronu niezaležnaści, na jakuju sabralisia paŭtary tysiačy čałaviek, synoptyki nie paviedamili.
Johurty — na čystuju vadu
Navukoŭcy z Bastyrskaha ŭniversytetu (ZŠA) zajavili, što reklamnyja abviestki pra karyść žyvych bakteryj u johurtach nie adpaviadajuć rečaisnaści. Jany daśledavali bolš za 20 “iahurtaŭ”, jak lubiać pisać na etykietkach našy niazłomnyja małakazavody, i adkryli, što ŭ bolšaści vypadkaŭ usie karysnyja bakteryi zahinuli. A ŭ šaści ŭzorach byli vydzielenyja mikraarhanizmy, što vyklikajuć rasstrojstvy stravavańnia. Na dumku navukoŭcaŭ, vytvorcy mo i ŭvodziać u johurty bakteryi, dy tamaka ničoha nie zastajecca, pakul pradukt dachodzić da spažyŭca. Kali takoje ŭ Amerycy, dyk pra nas hodzie j kazać.
Samyja razumnyja hiepardy — staryja i małyja
Trahičny vypadak zdaryŭsia ŭ zaaparku niamieckaha Krefeldu. Złamyśniki adamknuli kletku, u jakoj siadzieli hiepardy. 3-hadovaja samka vyrvałasia na volu i zarezała dziesiać kienhuru. Nažerłasia miasa i zasnuła. 7-hadovaha samca znajšli ŭ karčach, jon zabiŭsia tudy i dryžeŭ ad strachu. A stary samiec i maładzieńkaja samica zusim nia vyjšli ź niavoli, niahledziačy na adčynienyja dźviery.
Mikoła Buhaj
