10 studzienia 2003
«Mastoŭski vieśnik» — 100
20 śniežnia pabačyŭ śviet 100-ty numar niezaležnaha biuleteniu «Mastoŭski vieśnik». Vydajecca jon z 1997 h. Infarmacyja «Mastoŭskaha vieśniku» nikoli nia źjavicca ŭ rajhazecie dziela balučaści prablemaŭ, jakija ŭzdymajucca. Dyj źviestak takich nikoli nie zdabuduć dziaržaŭnyja hazetčyki. «Vertykal» śmiećcie z chaty nie vynosić... Zasnavalnik i redaktar haziety Jazep Pałubiatka robić zachady, kab «Vieśnik» vychodziŭ štotydniova.
A.Ł., Horadnia
Raskopki na harodach
Aršanski harvykankam vyrašyŭ pryvieści ŭ naležny stan archiealahičny zapaviednik «Haradzišča». Žycharam 2-ha Zamkavaha zavułku, čyje harody mieściacca ŭ achoŭnaj zonie, prapanujuć uziać ziamlu ŭ inšym miescy. Ubohija aharodžy i pabudovy, jakija psujuć vyhlad zamščyšča, źniasuć. Z dapamohaj haradzkich słužbaŭ žychary troch pryvatnych damoŭ pavinny ŭparadkavać svajo žytło. U perspektyvie i jano budzie źniesiena. Na zamčyščy zastanucca tolki budynki atradu MNS, drukarni dy etnahrafičnaha muzeju «Młyn», jakija źjaŭlajucca pomnikami architektury. U traŭni—lipieni na byłych harodach buduć praviedzienyja archiealahičnyja daśledavańni.
Lenina dałučyli
da Kupały
Napiaredadni novaha hodu kałhas imia Lenina dałučany da kałhasu imia Janki Kupały. Praŭda, i apošni nielha nazvać mocnym. Tolki ŭ rajonny biudžet jon vinien kala 53 młn. rubloŭ. Z dvaccaci kałhasaŭ rajonu nia majuć zapazyčanaści pierad biudžetam tolki dva.
Viktar Lutynski, Vorša
Nadbaŭka za niepaleńnie
Praŭleńnie kałhasu «Radzima» aktyŭna prapahanduje zdarovy ład žyćcia. Tyja z kałhaśnikaŭ, jakija admaŭlajucca ad paleńnia, atrymlivajuć štomiesiac da svaich zarobkaŭ 10% nadbaŭki. Sioleta zdoleli raźvitacca sa škodnaj zvyčkaj tolki dvoje rabotnikaŭ miascovaha žyviołahadoŭčaha kompleksu — technik-asiemianialnik i ślesar.
Babie 114 hadoŭ
1 studzienia 2003 h. žycharcy vioski Asaviec Aŭdoćci Zubryckaj spoŭniłasia 114 hadoŭ. Kabieta miarkuje, što doŭhažycharstvu paspryjała jaje viera ŭ Boha, jakoj anikoli nie vyrakałasia.
Bazyl Lićvinovič, Białyničy
Słucak zastaŭsia biez vajskoŭcaŭ
Niadaŭna sa Słuckaha harnizonnaha špitalu, jaki praisnavaŭ zvyš 70 hadoŭ, byŭ vypisany apošni pacyjent ź liku amal dźviuch tysiačaŭ byłych aficeraŭ, veteranaŭ vajny i adstaŭnikoŭ, što žyvuć u horadzie. Špital začynieny ŭ suviazi z tym, što ŭ horadzie apuścieli amal usie vajskovyja haradki, harnizony jakich u apošni čas byli pieraviedzienyja ŭ inšyja miescy. Dla vyrašeńnia ŭźnikłych u suviazi z hetym prablemaŭ Słucak naviedali ministar abarony Leanid Malcaŭ i pradstaŭniki abłvykankamu. Jany sustrakalisia z «vertykallu», pakryŭdžanymi veteranami, kiraŭnikami terytaryjalnaha medyčnaha abjadnańnia. Prajšła dziełavaja razmova pa pytańniach pracaŭładkavańnia 200 rabotnikaŭ byłoha špitalu i dalejšaha absłuhoŭvańnia jaho kolišnich pacyjentaŭ. Hości zapeŭnili, što miescy ŭ rajonnaj bolnicy i klinicy dla byłych «harnizonnych» medrabotnikaŭ (adnych medsiostraŭ 80 čałaviek) znojducca ŭsim. Ale ŭ heta ciažka vierycca. Zasumavali j adstaŭniki, bo ciapier im daviadziecca vystojvać u doŭhich čerhach na pryjom da lekaraŭ hetak ža, jak i ŭsim inšym pacyjentam. Los kapitalna zbudavanych u 30-ja budynkaŭ špitalu pakul nia vyrašany. Mo vystaviać na aŭkcyjon, kali abłvykankam nie pakładzie na ich uładnuju ruku.
Michaś Tyčyna, Słucak
Adstajali ranišnik
Partyja BNF adstajała biełaruskamoŭnaje navahodniaje śviata ŭ Žodzinskaj biełaruskaj himnazii. Školnyja ŭłady admaŭlalisia rabić navahodniuju jołku, kažučy, što dzieci nie razumiejuć biełaruskaj movy. Tady siabry žodzinskich arhanizacyjaŭ BNF, TBM i HA «Lićviny» admovilisia vieści svaich dziaciej na rasiejskamoŭny ranišnik. Ułady pačali pieramovy. Biełaruskamoŭnaja jołka ŭ Žodzinie adbyłasia 28 śniežnia a 15-j u aktavaj zali Žodzinskaj biełaruskaj himnazii.
Aleś Volny, Žodzina
Łučanok staŭ pravasłaŭnym
Narodnaha artysta Biełarusi kampazytara Ihara Łučanka ŭ subotu chryścili. Cyrymonija adbyłasia ŭ budynku mienskaje mitrapolii. Chrosnym baćkam kampazytara staŭ jahony siabar, były dziaržsakratar pa nacyjanalnaj biaśpiecy i baraćbie sa złačynnaściu Hienadź Daniłaŭ, chrosnaj maci — vykładčyca muzyčnaj škoły z Marjinaj Horki (adkul rodam Łučanok) Taciana Vasiljeva. I.Łučanku, aŭtaru viadomych piesień «Moj rodny kut», «Alesia», «Veranika» i inš., ciapier 64 hady. Chryściŭ jaho asabista mitrapalit Fiłaret.
B.T.; Interfaks
Kabieta byvaje kusačaj
Sud daŭ žycharcy Pinsku hod papraŭčych rabotaŭ za naniasieńnie lohkich cialesnych paškodžańniaŭ padatkovamu inspektaru. Žančyna pakusała inspektara (adkaznaść za ŭkusy čałaviekam u Kryminalnym kodeksie nie praduhledžanaja).
U rajonie Centralnaha rynku horadu padatkovyja inspektary pravodzili mierapryjemstvy pa spynieńni handlu ŭ niedazvolenych miescach. Zatrymali žančynu z dvuma słoikami aleju. Jana i raniej nielehalna handlavała praduktami z Polščy. Pry składańni administracyjnaha pratakołu za niezakonny handal kabieta pavodziłasia spakojna. Kali ž pasprabavali kanfiskavać alej, jana ŭčapiłasia zubami ŭ palcy padatkovaha inspektara, jaki trymaŭ słoiki. Paciarpieły źviarnuŭsia ŭ sudmedekspertyzu — ślady zuboŭ byli zaŭvažnyja jašče praz tydzień.
B.T.; BiełaPAN
