Hieneralny prakuror Viktar Šejman z 19 da 23 traŭnia znachodziŭsia z aficyjnym vizytam u Baŭharyi. Adzin z samych upłyvovych ludziej režymu naviedaŭ krainu, jakaja ŭstupaje ŭ NATO i Eŭraźviaz. Apošnim časam kantakty miž pradstaŭnikami biełaruskaj administracyi i krainami Zachadu pačaścilisia.
Šejmana zaprasiŭ u Safiju baŭharski kaleha Mikoła Fiłčaŭ. Dośvied Šejmana, vidać, uraziŭ haspadaroŭ. Jak piša «Pari», adrazu ž paśla pieramovaŭ u baŭharskaj prakuratury pačalisia pieraŭtvareńni «na biełaruski ŭzor». Tam źjaviŭsia novy adździeł, što maje zajmacca vyklučna karupcyjaj siarod vyšejšych dziaržaŭnych čynoŭnikaŭ. Adździeł baraćby z karupcyjaj isnavaŭ u prakuratury i raniej, ale jaho «klijentami» byli ŭsie hramadzianie krainy, a nia tolki ŭładcy. «Viktar Šejman padvioŭ svajho kalehu da hetaj idei. Biełaruskaja prakuratura daŭno stvaryła taki adździeł. Letaś byŭ aryštavany deputat, što byŭ adnačasova ministram čyhunačnaha transpartu. Sioleta raspačatyja kryminalnyja spravy suprać dvuch deputataŭ, raspavioŭ Šejman. Hieneralny prakuror Biełarusi maje prava sankcyjavać aryšt narodnych deputataŭ, navat nie źviartajučysia da parlamentu», — adznačaje internet-vydańnie «Seha».
Stvareńniem adździełu baŭharski prakuror nie abmiežavaŭsia. M.Fiłčaŭ prapanavaŭ unieści źmieny ŭ sudovaje zakanadaŭstva Baŭharyi, jakija b pašyryli paŭnamoctvy prakuratury dziela «baraćby sa złačynnaściu» i «infarmavańnia hramadzkaści pra dziejnaść prakuratury». Baŭharskaja presa i ŭ hetym bačyć biełaruski śled. «Heta ŭ kaho ž my vučymsia demakratyi!!!» — lamantuje kamentatarka tydniovika «Ctruma». U adkaz u internet-haścioŭni tydniovika niejki čytač adznačaje: a što chacieć ad Fiłčava i kampanii, tavaryšami jakich źjaŭlajucca «sherveni drugari i lainari» ŭsiaho śvietu.
Siarhiej Radštejn
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki33
Kamientary