Pry kancy palityčnaha sezonu hrupa siabroŭ KCHP-BNF padała skarhi ŭ Viarchoŭny Sud na dziejańni A.Łukašenki i dziaržaŭnych orhanaŭ.
Hramadzianskuju inicyjatyvu ab pryznańni niesapraŭdnaj Damovy ad 8 śniežnia 1999 h. ab stvareńni sajuznaj dziaržavy pačali Kastuś Kašel, Siarhiej Papkoŭ, Hienadź Plaško, Aleh Radziuk, Aleś Čacholski i Ŭładzimier Jucho. 22 traŭnia jany padali ŭ sud skarhi na dziejańni «vyšejšaj słužbovaj asoby i dziaržaŭnych orhanaŭ», što parušyli ich pravy, dy pazovy «ab ustanaŭleńni faktu parušeńnia pravoŭ i ŭstanaŭleńni faktu niesapraŭdnaści mižnarodnaje Damovy ab stvareńni sajuznaj dziaržavy».
Damova, na dumku siabroŭ KCHP-BNF, parušaje Kanstytucyju, bo pieratvaraje ŭnitarnuju Respubliku Biełaruś u subjekt inšaj sajuznaj dziaržavy, stvaraje «abjadnanuju vajskovuju hrupoŭku» z usimi nastupstvami i nie harantuje biaśpieki hramadzianam Biełarusi. «Sam Łukašenka ŭ pasłańni parlamentu pryznaŭ, što damova 1999 h. supiarečyć Kanstytucyi», — kaža S.Papkoŭ.
Składać skarhi ŭ Viarchoŭny Sud siabram KCHP dapamahali jurysty-eksperty. Inicyjatary dziviacca, čamu spravu ab niesapraŭdnaści sajuznaj damovy za try hady nie pačali prafesijanały-jurysty, a «ŭsie analityčnyja centry maŭčali da hetaha času». Taki ž zakid možna zrabić i samim palitykam.
KCHP-BNF užo raspačaŭ zbor podpisaŭ pad kalektyŭnaj zajavaj u Viarchoŭny Sud. «Chto ž nas abaronić, dziaciej našych, unukaŭ, našu majomaść, kali nia my sami?» — kaža Papkoŭ. Jon pryznajecca, što vyjhrać spravu nie spadziajecca, bo dobra viedaje našu ŭładu i našy sudy. Asnoŭnaja meta akcyi — zapalić prahaj zmahańnia jak maha bolš hramadzianaŭ, pierakanać ich nia jści na mahčymy referendum. Kali ŭ sudovych instancyjach Biełarusi zajaŭniki buduć mieć admoŭny vynik, jany źviernucca ŭ mižnarodnyja struktury. Praces užo pajšoŭ: papiery siabroŭ KCHP-BNF ź Viarchoŭnaha Sudu «adfutbolili» ŭ Leninski rajonny sud Miensku.
U zvarocie Zianona Paźniaka, začytanym na travieńskim Sojmie partyi, jość takija radki: «My ŭžo vymušanyja zadumvacca ab pieravodzie niekatorych našych tupikovych strukturaŭ, što isnujuć u varunkach akupacyjnych represijaŭ, na inšy ŭzrovień palityčnaje dziejnaści. Nad hetym treba dumać spakojna i śmieła». Mahčyma, inicyjatyva siabroŭ KCHP-BNF — častka novaje stratehii partyi.
Aleh Tačony
