Hulni, u jakija hulaje historyja
Biahučy tydzień bahaty na palityčnyja intryhi. Kreml uzmacniaje psychalahičny cisk na Łukašenku. Kali Hryzłoŭ padlataŭ da Miensku, lidery BNF jechali ŭ Maskvu. (Padrabiaźniej pra heta na staroncy 3.) Łukašenka ž uzmacniaje psychalahičny cisk na Kreml. Dajšło da taho, što pałochaje Rasieju hulniami z apazycyjaj vakoł pasady premjer-ministra i novych vybaraŭ u pałatu pradstaŭnikoŭ. Hulni Maskvy i łukašenkaŭcaŭ z apazycyjaj padkazvajuć, što valutnaje abjadnańnie adkładzienaje na śviatoha Nikoli.
Piacipartyjnaja apazycyja ŭklučyłasia ŭ hulniu, zreahavaŭšy na ruchi łukašenkaŭcaŭ prapanovaj «Kruhłaha stała» ŭładaŭ i apazycyi ŭ vieraśni, z metaj demakratyzacyi vybarčaha zakanadaŭstva. «My spadziajomsia na palityčnuju volu i rozum kiraŭnictva dziaržavy», — svajoj zajavaj u sieradu adzin ź lideraŭ adzinaj apazycyi Siarhiej Kalakin faktyčna praciahnuŭ uładam ruku.
Małaimavierna, kab «demakratyčnaja piaciorka» spakusiłasia prynadami čužych hulniaŭ. Źmienaŭ u palityčnym raskładzie niemahčyma dasiahnuć u adzin krok, što da ich viadzie tolki paśladoŭnaść krokaŭ. Miž tym systema zastyła na «zvažaj». Nivodnaje sutnasnaje kadravaje abo idealahičnaje pieramieny.
Dva hady tamu źjavilisia prykmiety vahańniaŭ, revizii kursu. Za hety čas sytuacyja dehradavała, adbylisia brydoty ź Licejem, movaju, niezaležnymi hazetami. Idealohija i rytoryka łukašenkaŭcaŭ pastupova znoŭ stali raźličanyja na prastoru, bolšuju za Biełaruś. Niby biełaruskaja ŭłady ŭsio jašče čakajuć vychadu na rasiejskaje (i danbaskaje, i prydniastroŭskaje, i abchaskaje, i pročaja i pročaja savieckaje...) pole dy tolki ciahnuć čas da hetaj superhulni, śvistkom da pačatku jakoj stanie čarhovy palityčny kryzys u Rasiei. Usio heta strašenna cikavić peŭnuju vuzkuju hrupoŭku. Ale da nacyjanalnych intaresaŭ heta nia maje nijakaha dačynieńnia.
* * *
Hramadztva rychtujecca da pieršaha vieraśnia. Temaju numaru «NN» stała škoła. Sapraŭdnymi hierojami hetaha vieraśnia buduć, biezumoŭna, liceisty, ichnyja baćki i nastaŭniki.
Kali ja školnikam upieršyniu trapiŭ u stalicu, najbolšym uražańniem dla mianie stała nie metro i nia cyrk, a nadpis siniaj alejnaj farbaj na kamiennym płocie ŭ Vierchnim horadzie pad kamianicaj kontraraźviedki KDB (tady pra haspadara budynku nichto nia viedaŭ, šylda źjaviłasia ŭ postsaviecki čas). Tam było napisana: «Žyvi i pamiataj».
Niešta padobnaje ja pieražyŭ u hetuju niadzielu, kali na ścianie adnaho z damoŭ la Ministerstva zamiežnych spravaŭ ubačyŭ nadpis: «Historyja nia skončyłasia. Liceisty».
U Redakcyju telefanujuć baćki i pytajucca, ci vystaić licej. Dumaju, vystaić.
Mikoła Buhaj
