Čutki, što 6 vieraśnia moža adbycca raskoł ŁDP, źjavilisia napiaredadni źjezdu. Pieršuju parazu Siarhiej Hajdukievič paciarpieŭ na vybarach sakratara źjezdu. Bolšaść delehataŭ prahałasavali za kandydaturu pieršaha namieśnika staršyni Alaksandra Rabataja. Potym inšy namieśnik, Aleh Markievič, źvinavaciŭ Hajdukieviča ŭ aŭtarytarnych metadach kiravańnia, marhinalizacyi partyi, karupcyi i h.d. Straciŭšy kantrol za chodam źjezdu, Hajdukievič syšoŭ z zali i zaklikaŭ prychilnikaŭ pajści razam ź im. Apanenty Hajdukieviča davodziać, što bolšaść zastałasia na źjeździe. Z kim pajšła bolšaść, na praciahu miesiaca pavinien vyrašyć Miniust.
Rešta delehataŭ uniesła źmieny ŭ statut partyi, źniała z pasady staršyni Hajdukieviča, vybrała Vyšejšuju radu ź piaci čałaviek — Aleha Markieviča, Alaksandra Rabataja, Andreja Kursa, Vitala Pryščepava (staršynia Viciebskaj abłasnoj arhanizacyi) i Siarhieja Tałka (kiraŭnik Babrujskaj arhanizacyi). Da sakavika 2004-ha źjezd pieradaŭ Vyšejšaj radzie svaje paŭnamoctvy. Usie hetyja epachalnyja źmieny byli ažyćcioŭlenyja za paŭhadziny, što zastavalisia da skančeńnia terminu arendy pamiaškańnia.
Hajdukievič u paniadziełak ranicaj adpraviŭsia ŭ Miniust, kudy prychapiŭ z saboj piačatku i rehistracyjnyja dakumenty partyi. Tudy ž pajechaŭ i pradstaŭnik novaha kiraŭnictva Alaksandar Rabataj. Ofis na vuł. Płatonava, 22 kantralavali apanenty Hajdukieviča. Sytuacyja tam była nervovaja: chtości raspuściŭ čutki, što mahčymy siłavy zachop ofisu. Na ścienach jašče visieli partrety Hajdukieviča. «Źniać nie paśpieli», — tłumačyŭ Markievič.
Adnak Hajdukievič u paniadziełak u ofis hetak i nie pryjechaŭ, patłumačyŭšy svaju «niadoŭhuju adsutnaść» dniom narodzinaŭ.
Ciapier čytajuć
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy17
Kamientary