4 listapada 2003
Biełaruska-rasiejski słoŭnik: U 3 t.: Bolš za 110000 słovaŭ. T. 1. A—Z, T. 2. Z—P / In-t movaznaŭstva imia Ja.Kołasa NAN Biełarusi; Pad red. A.Padłužnaha. — 3-je vyd. — Miensk: BiełEn, 2003. 3000 as.
Pabačyli śviet dva tamy z akademičnaha trochtamovaha «Biełaruska-rasiejskaha słoŭnika», pieršaje vydańnie jakoha ŭ 1950-ja redahavaŭ Kandrat Krapiva. «U apošnija hady vystaŭka zamienienaja vystavaj, mierapryjemstva — imprezaj, čajnik — imbrykam. Aŭtary, jakija rychtavali słoŭnik da druku, jak praviła, padobnyja leksyčnyja dublety ŭ jaho nie ŭklučali, bo ich užyvańnie vidavočna źviazanaje tolki z peŭnaj hrupaj karystalnikaŭ litaraturnaj movaj i jany ničym nie adroźnivajucca ad dziesiacihodździami zamacavanych», — paznačana ŭ pradmovie.
Hazety Biełarusi: 1776—1975 h.: Biblijahr. pakaźnik / Nac. knižn. pałata Biełarusi. — Miensk, 2003. 700 as.
Cana ŭ kniharniach 29020 rub.
Historyja Biełarusi ŭ kantekście eŭrapiejskaj cyvilizacyi: Dapam. / U.Kaźlakoŭ i inš.; Pad red. Ł.Łojki. — Miensk, 2003. — 348 s. 4000 as.
Prapanavany aŭtarami intehravany kurs padaje biełaruskuju minuŭščynu ŭ śviatle historyi eŭrapiejskaj chryścijanskaj cyvilizacyi. U «Akademknizie» cana vydańnia 7060 rub.
Hrejmas A. Pra bahoŭ i ludziej. U pošukach etničnaj pamiaci / Pier. ź lit. S.Šupy. — Miensk: Encyklapedyks, 2003. — 404 s. 1000 as.
U knizie suśvietna viadomaha francuskaha linhvista j semijotyka litoŭskaha pachodžańnia rekanstrujujecca razburany masiŭ mitalahičnych ujaŭleńniaŭ litoŭcaŭ. Hetaje hruntoŭnaje daśledavańnie, biezumoŭna, šmat daść i dla razumieńnia biełaruskaje tradycyjnaje kultury. U «Akademknizie», dzie manahrafija kaštuje 12320 rub., kažuć, što asnoŭnaja častka nakładu brakavanaja j u prodaž pastupić tolki kala 100 asobnikaŭ.
Dubianiecki E. Kulturalohija: Encykł. daviednik. — Miensk: BiełEn, 2003. — 384 s.: ił. 3000 as.
Upieršyniu ŭ Biełarusi vychodzić maštabnaje daviedkavaje vydańnie, jakoje bolš jak u 800 artykułach aśviatlaje roznyja aspekty teoryi j historyi kultury, raskryvaje asnoŭnyja kulturalahičnyja paniatki dy terminy. Hałoŭnaja admietnaść knihi — suviaź usich materyjałaŭ ź Biełarusiaj. U kniharniach daviednik kaštuje kala 7000 rub.
Ivaška I. Zhuki paranienaj mroi: Druhaja kniha vieršaŭ. — Miensk: Biełaruski knihazbor, 2003. — 204 s. 300 as.
Aŭtar — žurnalist i niastomny vandroŭnik pa Biełarusi — uvaskrašaje sarmackija ideały j apiavaje kolišniuju vieličnaść šlachieckich majontkaŭ.
Miensk. Płošča Pieramohi / Skład. V.Miščanka. — Miensk: Mižnarodny centar kultury knihi, 2003. — 48 s.: ił. 1500 as.
Kniha raspačynaje seryju «Pomnik». U «Akademknizie» kaštuje 5850 rub.
Lindner R. Historyja i ŭłada: Nacyjatvorčy praces i histaryčnaja palityka na Biełarusi XIX—XX st. / Pier. ź niam. Ł.Barščeŭskaha; Nav. red. H.Sahanovič. — Sankt-Pieciarburh: «Nievskij prośpiekt», 2003. — 540 s. — (B-ka časopisu «Biełaruski Histaryčny Ahlad»)
Niamiecki daśledčyk padaje pohlad «zboku» na prablemu ŭzajemadačynieńniaŭ histaryčnaj navuki j palityki. Nazvy raździełaŭ — «Nacyjanalnaja śviadomaść i «biełaruskaja misija», «Centralnaja Eŭropa: historyja jak hieapalityka», «Litva j mit «załatoha vieku», «Zapadno-ruśsizm» i nacyjanalnaja historyja», «Historyki j partyja», «Partyzanski mif u histaryjahrafii j litaratury». Pa-niamiecku kniha pabačyła śviet u Miunchienie ŭ 1999. Pa-biełarusku jaje možna prydbać u šapiku Akademii navuk. Cana 13200 rub.
Płotnikaŭ B. Biełaruskaje słoŭnictva: Vuč. dapam. / Akademija kiravańnia pry prezydentu Resp. Biełaruś. — Miensk, 2003. — 136 s. 100 as.
U vydańni padadzienyja prykłady słoŭnikavych artykułaŭ i charaktarystyka ŭsich typaŭ słoŭnikaŭ — pierakładnych, tłumačalnych, terminalahičnych, linhvistyčnych, dyjalektnych, frazealahičnych. «Biełaruska-rasijski słoŭnik» Ja.Stankieviča nazvany najbolš admietnym i samym «biełaruskim» pierakładnym słoŭnikam paślavajennaha času. Cana ŭ «Akademknizie» — 10370 rub.
Taciana Vabiščevič
