Paśla 14 sakavika zakončycca ramantyčnaja epocha nia tolki va ŭzajemaadnosinach vyšejšych kiraŭnikoŭ Biełarusi j Rasiei. Na źmienu pryjdzie realnaść baraćby nia prosta za suverenitet, a za vyžyvańnie nacyi.
Kali havorać pra biezalternatyŭnaść ciapierašnich prezydenckich vybaraŭ u Rasiei, mižvoli ŭźnikaje pytańnie — a ci byli jany kali-niebudź alternatyŭnymi? 12 červienia 1991 hodu adbylisia ŭsieahulnyja vybary pieršaha prezydenta RSFSR, na jakich z ahromnistym adryvam pieramoh Barys Jelcyn. Chto ciapier pamiataje tahačasnych jaho spabornikaŭ? Ale toje było častkaj hrandyjoznaha prajektu «pierabudova» — prajektu, jaki ŭsiaho praz paŭhodu paśla abrańnia harbačoŭskaha «alter-eha» skončyŭsia raspadam SSSR i źniknieńniem z histaryčnaje mapy samoj nazvy RSFSR. Rasiejcy, praŭda, sami nie pierabudavalisia i, abviaściŭšy svaju krainu prostaj spadkajemcaj Savieckaha Sajuzu, praciahvali žyć tak, byccam imperyja zachavałasia, tolki ŭ krychu źmienšanym varyjancie i pad novaj nazvaj — Rasiejskaja Federacyja. Ale razmova nie pra toje.
U 96-m hałasavać rasiejskamu narodu było prapanavana «sercam». Heta aznačała: albo ty vieryš u toje, što serca Jelcyna vytrymaje prezydenckuju honku, albo nia vieryš. Voś taki byŭ vybar, prynamsi ŭ rasiejskaje elity. Bo realnaj alternatyvaj byłomu kiraŭniku Śviardłoŭskaha abkamu KPSS, kandydatu ŭ siabry palitbiuro byŭ nie kamunist Ziuhanaŭ, a ciełaachoŭniki novaha cara, «śmierdy» Karžakoŭ z Barsukovym, jakija prapanoŭvali vybaraŭ nie pravodzić i takim čynam ździejśnić dziaržaŭny pieravarot.
Poŭny varyjant artykułu hladzicie ŭ hazecie "Naša Niva".
Vital Taras
