Staronka vieršavanaha radka

30 sakavika 2004 h. byli padviedzieny vyniki štohadovaha respublikanskaha litaraturnaha konkursu dla školnikaŭ «Ja maju tvor…», što pravodzicca ŭ ramach akcyi «Dzień Ziamli». U konkursie ŭziali ŭdzieł bolš za dźvie tysiačy aŭtaraŭ. 19 finalistaŭ zaprošany ŭ Miensk, dzie 22—24 krasavika adbuducca majstar-klasy, vystupy j uznaharodžańnie pieramožcaŭ. Źmiaščajem tut vieršy finalistaŭ.

Andrej Chadanovič

Arciom AŁADKA

Limonnaje leta

Ŭ pačatku była ŭ mianie śvietłaja meta —

Znajści siarod skarbaŭ radzimy svajoj

Limonnaje leta, limonnaje leta

Z pryhožaju, śviežaj jaho ciepłynioj.

Błakitnaja chvala pramieńniem sahreta,

Dy ščyruju praŭdu ŭ dušu mnie lije

Limonnaje leta, limonnaje leta…

Voś čajka ab biełym dziacinstvie piaje.

Zialonyja vočy — aziory paeta —

Šukajuć apošniuju kroplu taho

Limonnaha leta, limonnaha leta,

Što nie škadavała kachańnia svajho.

v.Baraŭlany Mienskaha r-nu

Jarasłava ANANKA

* * *

My hetu krepaść

zvajujem bojem.

Ty čuješ, luby, —

biaz strat i bolu.

My hety viečar

raspniom na rostań.

Davoli žvava.

Da śmiechu prosta.

My razmalujem

ścianu na zony.

I ŭ kožnaj zonie

pa parasonie.

My budziem ščaściem

razvodzić plotki.

Hadziny razam

na kadry fotkać.

Ty potym tydzień

prachodziš chvory.

Byvaj, kachany.

Ja jedu ŭ mora.

h.Červień

Alesia BAŠARYMAVA

Prykuty

Što ž zastyŭ ty u niabiosach?

Śnieh asieŭ na kryłach…

I tabie nia tyja słovy

Vosień havaryła.

Havaryła: «Tut nia strašna,

Zastavajsia, druža!»

Potym viecier źnios apošni

Pach źlaciełaj ružy.

Potym doždž prabiŭ svoj choład

Ŭ pierje i pad skuru,

Nu a potym śnieh — vystava

Nearchitektury.

Tolki ŭsio ž ty zaśpiavaješ

Novaju viasnoju,

Bo našto ž tady rabiŭsia

Karabielčyk Nojeŭ?

h.Mahiloŭ

Mikałaj VAŁYNIEC

Ja saromiejusia

Ja saromiejusia.

Saromiejusia pahladu tvajho,

Piaščotnaha i łaskavaha.

Ja saromiejusia.

Saromiejusia zvanka tvajho,

Zdajecca, hučnaha samaha.

Ja saromiejusia.

Saromiejusia serca svajho,

Jakoje tak zdolna kachać.

Saromiejusia ščaścia svajho,

Jakoje chaču spaznać.

Ja saromiejusia.

Saromiejusia sustrecca pahladam

Z vačyma tvaimi sinimi.

I słoŭ, što z vusnaŭ tvaich źlaciać

Piaščotnymi i ščaślivymi.

h.Vialejka

Ludmiła KAVALOVA

* * *

Byŭ aniołam,

Dy bolej nia mušu:

Adsiekli kryły,

Spalili dušu.

A popieł raźviejali

Pa-nad polem,

Dzie žyta pasiejali.

I tapoli.

A ŭ tych tapolach

Błukaje viecier,

Śpiavaje pieśni

Pra ŭsio na śviecie,

Pra toje, što nielha

Źjavicca kachańniu,

Kali dušu

Viaduć ŭ katavalniu.

h.Homiel

Ala KITAJOVA

* * *

Jano naradziłasia tydzień tamu.

Hłytała pavietra niaśmieła,

Spyniała pryšłaści chadu.

A potym, jak liście, źlacieła.

* * *

ty pralješsia

kisłotnym daždžom

na pavierchniu

majho śvietu

pažyvieš u maim

vymiareńni

i zabudzieš

pra heta zdareńnie

h.Vorša

Sofja MAROZAVA

Pra Luboŭ

Miž sucelnaha daždžu

Tak byvaje ciomna, prykra tak!

Ci nia čuješ praź imžu

Mocna ściataj dušy skryhatu?

Zachlipajecca žal, kryk,

Uvieś praciaty ślaźmi poźnimi,

Bo luboŭ — heta typ chandry,

A chandra — heta typ vosieni.

Plazma času paŭzie ŭhłyb.

Vosień puchnie śniažkom miakieńkim.

Sucišaje maroz uschlip,

Pulchny śviežańki dzień źviakaje,

Razburaje saboj iržu,

Kreślić źmieny i adroźnieńni…

Ale ž śnieh — heta typ daždžu,

A viasna — heta typ vosieni.

Praz chmurynački voś-voś

Patychaje ziamla vilhaćciu.

Promień sočycca naskroź,

Kamień łaščycca pušystaściu

I vurkočyć, śniučy sny…

Śviežaj chvojaj ćvituć sosien pni…

Tak. Luboŭ — heta typ Viasny,

A Viasna — heta typ Vosieni.

pas.Michanavičy Mienskaha r-nu

Nadzieja PIATRUŠYNA

* * *

Bol — heta smak tupoha laza

Heta ślozny vyklik spakoju

Bol pra mnohaje moža skazać

Ci moŭčki raźlicca rakoju

Toj, chto zhubu ŭ sabie trymaje,

Biaz bolu nia budzie pačuty

Filazofija bolu takaja:

Ŭsio adnosna praz pryzmu pakuty

h.Miensk

Alena ŚLIVINSKAJA

Płač

Mnie zdajecca

sivyja anioły

płačuć

dzieści vysoka

ŭ niabiosach

ab tvaich źniaviečanych losach

i lasach

i ab dzieciach niahiehłych

i kidajuć im promni

nadziei

apošniaj

i jašče spadziajucca

ubačyć źnianacku

abialełuju Ruś

ŭ kryvickich abdymkach

i viarnucca

šyzymi

abłokami ź nieba

tolki dzieś zabłukali

kryvickija dušy

i ahłuchli

ad šmatviečnaj pahoni

i aślepli

ad kryvi kryvickaj

i ścišeli, apali ŭ honi

«biez nadziei spadziejučysia»

Čas!

kali dakryčacca niamožna

užo nadyšoŭ

tvaich trubaŭ

BOŽA

čakaješ

čakajuć

kab z kališnich kaleń

uźniacca

i na rańni ŭklenčyŭšy niebu

i pazbyŭšysia spadčyn susiedziaŭ

palacieć

da Novaj Ziamli

dzie daŭno

dušoju

pradziedy

uzraśli kamianiami

na ŭźmiežžach.

v.Čyrvonyja Švaby

Łahojskaha r-nu

Asia JARMOLENKA

Dzieviać pacałunkaŭ

Ja idu pa načnoj vulicy j čuju kachańnie:

Jano ŭ hule chvorych pravadoŭ,

Što vybivajuć iskry;

Jano ŭ kryku čajek,

Źviedzienym da šalenstva ad žadańnia Palotu;

Jano ŭ vusnach načnoha vietru,

Jaki kranaje svaimi vusnami maje j kudłacić

maje vałasy svajoju zornaju rukoj biaz soramu,

Što jamu bolš za miljard hadoŭ,

A mnie chutka budzie 16…

…Zorki źviazanyja pamiž saboj biełymi

ad haračyni nitkami j źviniać,

Ihrajučy Trans kachańnia…

Padešvy maich tuflaŭ całujuć mokry załaty asfalt:

9 pacałunkaŭ —

9 krokaŭ da ciabie,

Kachańnie!

v.Viaźzie Asipovickaha r-nu

• 0
• 0
• 0
• 0
• 0
• 0
• 0
• 0