Pra Alimpijadu

Čym mieniej dzion zastajecca da adkryćcia Alimpijady ŭ Atenach, tym chutčej pačynaje bicca tvajo serca.

I kožnaje paviedamleńnie z Atenaŭ usprymajecca z chvalavańniem. Ci paśpiejuć hreki, asabliva paśla śviatkavańnia tryjumfu futbolnaj zbornaj na Eŭra-2004, u čas zdać usie spartovyja abjekty Hulniaŭ? Ci nie sarvuć Alimpijadu choć by hatelnyja rabotniki stalicy Hulniaŭ čatyrochhodździa, jakija nie zdavoleny svaim zarobkam i pahražajuć strajkam? I što budzie ź piatnaccaćciu tysiačami badziažnych žyvioł, jakich municypalitet Atenaŭ pastanaviŭ źniščyć, paśla čaho niekatoryja spartoŭcy Kanady pryhrazili arhanizataram Hulniaŭ bajkotam? I ci budzie naležnym čynam pastaŭlena abarona horadu ad teraktaŭ?

Adnak usie zaściarohi ŭ minułym. I siońnia pačnucca Letnija Alimpijskija hulni. Košt kvitka na cyrymoniju adkryćcia składaje 950 eŭra. Paspalitamu biełarusu trapić tudy možna, chiba vyjhraŭšy konkurs NAKu ci vypadkova adkarkavaŭšy patrebnuju butelku «Koka-koły». Noč u hateli padčas Alimpijady kaštuje 690 eŭra. Ščyra kažučy, ceny krychu kusačyja. Choć, zrešty, jość kvitki ŭsiaho pa 10 eŭra. Kvitok na mužčynskuju 100-metroŭku budzie kaštavać 90 eŭra. Hreki bajacca, što ŭsie bilety nia buduć raskupleny i daviadziecca spartoŭcam spaborničać pry paŭpustych trybunach.

Dla žycharoŭ usiaho śvietu, što nia trapiać na praradzimu Alimpijady, nie zastaniecca ničoha inšaha, jak nazirać za spabornictvam atletaŭ sa svaich televizaraŭ. Naša BT užo daŭno zaklučyła kantrakt na pakaz Alimpijady. Jak paviedamlajuć kamentatary, heta buduć pieršyja Alimpijskija hulni, pakazanyja Biełaruskim telebačańniem u poŭnym abjomie. U 2000 h. z Sydneju vialisia repartažy tolki z asobnych spartovych aren: himnastyka, dźvie baraćby, viesłavańnie, lohkaja atletyka

Cikava, ci atrymajem my znoŭ rasiejskamoŭnych kamentataraŭ «z vuźlikami ŭ rocie», jakija svaim prafesijnym uzroŭniem na dźvie-try hałavy sastupajuć polskim i rasiejskim kaleham? Kali tak, to nia dziva, kali mnohija biełarusy znoŭ zamiest svajho BT abiaruć repartažy kanałaŭ susiednich dziaržaŭ.

Sam čakaju na Alimpijadzie-2004 vystupu Ivana Ivankova, jakomu žadaju ščyraha tryjumfu paśla rasčaravańnia na Alimpijskich hułniach u Sydnei. Čakaju, ci pakaža BT vystupy ŭkrainskaha sablista Alaksandra Łukašenki i spabornictva ŭ stralbie z łuku, ci mo jaki damarosły cenzar na BT znojdzie kramołu ŭ słovie «łukadrom» — naźvie areny spabornictvaŭ u hetym vidzie sportu. Tym bolej što adzin łukadrom u krainie, u Bieraści, užo prykryli. Čakaju «zołata» ad Kaci Karsten, Natašy Cylinskaj, Vani Cichana, Eliny Źvieravaj i mo chto viedaje ad kaho jašče. Čakaju pieramohi litoŭcaŭ u baskietbole nad amerykanskaj dream-team. Čakaju suśvietnych rekordaŭ u płavańni i lohkaj atletycy, a taksama sumlennaj baraćby.

Nia treba zabyvacca, što zaŭsiody paśla asnoŭnych Alimpijskich hulniaŭ prachodziać Paralimpijskija hulni. Hulni ludziej, jakich jazyk nijak nie pavaročvajecca nazvać invalidami. Heta ludzi mocnaj voli i mocnaha charaktaru. Jany nie zamknulisia ŭ sabie, nie zastalisia sam-nasam sa svajoj chvarobaj, a, naadvarot, pačali rabić podźvihi. Mienavita podźvihi, inšaha słova tut nie padbiareš.

XXVIII Alimpijskija Hulni ŭ Atenach stanuć trecimi dla niezaležnaj Biełarusi. Na pieršych my ŭziali adzin załaty medal, na druhich — try ŭznaharody najvyšejšaj proby. Niabłaha było b praciahnuć hieametryčnuju prahresiju.

Chvarejem za našych!

Źmicier Pankaviec, Kastryca (Barysaŭščyna)

• 0
• 0
• 0
• 0
• 0
• 0
• 0
• 0