Spynieny na try miesiacy vychad «Rehijanalnaj haziety» — samaha bujnoha niezaležnaha vydańnia Paŭnočna-Zachodniaj Biełarusi, jakoje maje 10-tysiačny nakład, vychodzić całkam na biełaruskaj movie i całkam samaakupnaje.Ab prypynieńni na try miesiacy maładačanskaj «Rehijanalnaj haziety» stała viadoma ŭ aŭtorak. «RH» — znakavaja hazeta, bo heta adzinaje niedziaržaŭnaje rehijanalnaje vydańnie, jakoje vychodzić całkam na biełaruskaj movie. Dva papiaredžańni za raz vyniesieny «RH» za farmalnaści.
Maŭlaŭ, dadatak z teleprahramaj u hazecie niezarehistravany, peryjadyčnaść vychadu nie adpaviadaje zapisanaj u rehistracyjnym paśviedčańni, a hazeta zarehistravanaja jak «masava-palityčnaje vydańnie, što raspaŭsiudžvajecca ŭ ahulnanacyjanalnym maštabie», u vychodnych źviestkach abviaščaje siabie «infarmacyjna-reklamnym vydańniem» — dy raspaŭsiudžvajecca tolki ŭ maładačanskim rehijonie.
Usie sproby hałoŭnaha redaktara prypynienaj hazety Alaksandra Manceviča trapić na pryjom da ministra infarmacyi Rusakieviča zastalisia marnymi. Na prośby atrymać tłumačeńni redaktar zakrytaj hazety atrymlivaŭ ad klerkaŭ adhavorki kštałtu: «teleprahrama — heta ŭ vas asobnaje vydańnie».
Sproby apelavać da zdarovaha sensu plonu nie prynieśli, chacia j zahnali pradstaŭnika ŭładaŭ u kut. Naprykład, pytańnie sp.Manceviča, čamu, kali «RH» vypuskaje teleprahramu na arkušach nie taho farmatu, jaje vychad prypyniajuć, a kali abłasnaja dziaržaŭnaja «Minskaja praŭda» vypuskaje moładzievy dadatak, pierachodziačy dla taho z farmatu A2 na A3, to ŭ ministerstvie hetaha nie zaŭvažajuć.
U redakcyi «RH» niečakanym prypynieńniem hazety šakavany. Nijakich namiokaŭ, što takoje moža zdarycca, nie było. Što da razychodžańnia rehistracyjnych źviestak z vychodnymi, redaktar pryznaje, što niesupadzieńnie častaty vychadu sapraŭdy mieła miesca. Bolš za toje, pry rehistracyi «RH» supracoŭniki ministerstva sami paraili zasnavalnikam zapisać siamidzionny vychad: maŭlaŭ, paśla heta prydasca, kali pačniacie čaściej vydavacca. Bo raniej nichto na heta nie zvažaŭ, i takuju ž peryjadyčnaść «na vyrast» zajaŭlali mnohija vydańni. Čamu zamiest taho, kab dać mahčymaść vypravić pamyłku, ministerstva zastasavała bolš radykalny metad, zakryŭšy hazetu?
Što da parušeńnia, źviazanaha z raspaŭsiudžvańniem «RH» na terytoryi rehijonu, a nie krainy, tut uvohule łuchta. «RH» uniesiena ŭ katalohi padpiski dla ŭsioj Biełarusi. Karaciej, pryčepki.
Jak miarkujuć u redakcyi, mahčyma, sapraŭdnym šturškom da dziejańniaŭ Ministerstva infarmacyi staŭ niadaŭni artykuł, pryśviečany pieradvybarnym zmahańniam u Čyści. Ale jon nia vyklikaŭ jaskrava admoŭnaj reakcyi ŭładaŭ, i tamu peŭnaści z hetym niama. Nielha skazać, što «RH» mieła kanfliktnyja ŭzajemaadnosiny ź dziaržstrukturami.
Vosiem vertykalaŭ, kažuć supracoŭniki, — vosiem roznych typaŭ adnosin. Ad dziełavych da kanfliktnych, bo ŭsio zaležyć ad charaktaru taho ci inšaha čynoŭnika, jaki moža ŭsprymać krytyku, a moža reahavać na jaje nieadekvatna.
Voś u hazecie źjaviŭsia list čytača z krytykaj systemy medyčnaha absłuhoŭvańnia ŭ Ašmianskim rajonie dy sa stanoŭčymi charaktarystykami taje samaje systemy ŭ susiednim Smarhonskim (dzie čytača vylečyli). Ašmianskija ŭłady kryŭdujuć da hetaje pary!
Ale adnosna pryčyn prypynieńnia vychadu ŭ Maładečnie vykazvajuć takuju hipotezu. «RH» nia mieła kanfliktaŭ z uładami siońnia, ale patencyjna jana mahła pieraškadžać režymu, bo pa svajoj sutnaści nie pasavała da stvoranaj dziaržaŭnaj struktury. Biełaruskamoŭnaja, niezaležnaja, paraŭnalna paśpiachovaja kamercyjna i adnaznačna papularnaja na histaryčnaj Vilenščynie, jana nie mahła nie vyklikać padazreńniaŭ.
Redakcyja «RH» sychodzić u trochmiesiačny adpačynak. Ci zmoža «Rehijanalnaja hazieta» ačuniać ad takoha ŭdaru? Redaktar nia schilny da pesymizmu. Try miesiacy pierapynku, jak kažuć u redakcyi, daduć mahčymaść źmianić hazetu. Adnak budzie stračana suviaź z padpisčykami j reklamadaŭcami, i adnaŭlać hazetu pryjdziecca z nula.
Siarhiej Prytycki, Maładečna
