Pry hetych słovach va ŭjaŭleńni ludziej starejšaha pakaleńnia paŭstaje vobraz čałavieka ŭ płaščy i čornych akularach z kinžałam u ruce.
Ci z parasonam, u jaki ŭmanciravana ihołka z atrutaj. Zrazumieć pachodžańnie hetkaha refleksu niaciažka. Heta i ramantyzacyja ŭ savieckim mastactvie špijonaŭ realnych dy prydumanych — Zorhie, Kiłbi, pałkoŭnik Isajeŭ, heta i dobra arhanizavanaja systema padrychtoŭki kiraŭnikoŭ i šarahoŭcaŭ nacyjanalna-vyzvolnych ruchaŭ, jakija niaredka nie adroźnivalisia ad špijonaŭ i dyversantaŭ. Hetkaja palityka mieła pośpiech. U 1950-ja i 1960-ja hady XX st. dehradavali i raspalisia kalanijalnyja imperyi Francyi dy Brytanii. Ale padrychtoŭka «bajcoŭ niabačnaha frontu» na hetym nie spyniłasia, a płaŭna pieraciakła ŭ padrychtoŭku idealahičnych «misijaneraŭ». Če Hievara, Karłas Iljič, čyrvonyja bryhady. Ich dziejnaść užo praktyčna nie adroźnivałasia ad sučasnaha teraryzmu.
Cikava, što ŭsie jany rychtavalisia nie ŭ Aŭhanistanie ci Sudanie, a ŭ Maskvie ci Berlinie. Dziva što šmat jakija kiraŭniki azijackich dy afrykanskich dziaržaŭ — vychavancy vajskovych VNU Rasiei. Aŭtamat Kałašnikava — na ściahach dalokich krain, a stvaralnik hetaha cudu techniki moh by być dalaravym miljarderam, pakolki tvor jahonaha imia vyrableny i hulaje pa śviecie ŭ kolkaści bolš jak 70 młn štuk.
Adčynić «skryniu Pandory» akazałasia praściej, čym začynić. Metastazy revalucyjnaha teraryzmu pačali raspaŭzacca pa śviecie. Bujnoj pamyłkaj kramloŭskaha kiraŭnictva stała vajna ŭ Aŭhanistanie, krainie, jakaja drenna kantralujecca zavajoŭnikami z časoŭ Alaksandra Vialikaha. Masa zbroi, što pastupiła ŭ hetuju krainu za 10 hod i z SSSR, i z ZŠA, stała tryvałaju bazaju dla teraryzmu na miažy tysiačahodździaŭ. U vyniku teraryzm nabyŭ internacyjanalny charaktar, ale rodavaja pupavina, što złučaje jaho z Maskvoju, kančatkova nie razarvanaja. Filazofija i praktyka jaho lohka ŭhadvajucca ŭ biaskoncym «adnaŭleńni kanstytucyjnaha paradku» ŭ Čačni. Pryčym z abodvuch bakoŭ. Tamu ślozy kramloŭskaha kiraŭnictva pa biaźvinnych achviarach biezzakonnych akcyj bajevikoŭ Basajeva — nia bolš čym krakadziłavy ślozy.
Poŭny varyjant artukułu čytajcie ŭ hazecie "Naša Niva"
Jury Chadyka
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary