Leanid Marakoŭ

Nastaŭnica anhielskaj

Nastaŭnica anhielskaj movy Asia Iosifaŭna pryjaždžała ŭ škołu na taksi. Zaŭsiody! Na taksi viartałasia i dadomu. Hrošy, jakija jana traciła za prajezd na rabotu i z raboty, i jaje zarpłata byli pryblizna suvymiernyja, ale heta nastaŭnicu anhielskaj nia nadta turbavała. Jaje muž, kandydat navuk i zasłužany vynachodnik SSSR, pracavaŭ kali nia ŭ try, dyk u dźvie źmieny dakładna, i Asia Iosifaŭna mahła dazvolić sabie hetkuju raskošu.

Pieradvypusknuju 9 «B» jana pryniała pryblizna z takim zapasam viedaŭ: najlepšyja mahli paličyć pa-anhielsku da dvaccaci i z akcentam na miažy jasnaści skazać, jakaja ciapier hadzina i jakuju častku sušy zajmaje Soviet Union, dziaržava rabočych i sialan, apora miru i demakratyi va ŭsim śviecie (čamu mienavita hetuju temu ŭbivali vučniam u hałavu tuzin anhličanak, što źmianilisia za hetyja hady, jany zrazumieli jakraz u dziaviataj); najhoršyja — dva druhahodki, Dryžd i Ściapurka, — nia viedali pa-anhielsku ni słova. Ale, havoračy tak, Sańka trochi pałku pierahnuŭ. Adno słova jany ŭsio-taki viedali, navat dva — fuck you!

Z hetych bojkich słoŭ i pavinna było pačacca klasnaje žyćcio Asi Iosifaŭny. Pavinna było — dy nie pačałosia. Kali hetaja pryhožaja, z šykoŭnaju fryzuraj i elehantnaj postaćciu žančyna ŭ kremavym, ź sierabrystaju ablamoŭkaju kaściumie zajšła ŭ klasu, Sańku adrazu ž stuknuła ŭ hałavu: škada jaje! Miesiacy dva, moža, i pratrymajecca — maładaja ž, enerhičnaja, poŭnaja sił.

Asia Iosifaŭna pratrymałasia da vypusknoha viečara, na što anijak nie spadziavalisia dva zuchi-druhahodniki. Anhličanka ŭziała 9 «B» chard-rokam. Takoha ŭdaru pad dych nichto nie čakaŭ. Zajšła na pieršy svoj urok ź nievialičkim čamadančykam, čym vielmi ŭsich zacikaviła. Hetym svaim čamadančykam jana i zbłytała karty druhahodnikam, jakija rychtavali joj svaju sustreču. Dryždu — prydurku, istocie biez elementarnych paniaćciaŭ ab prystojnaści, sumlennaści i honary, jaki moh tak «zaazonić» klasu, što choć uciakaj, i boŭdziłu z brudna-šeraju fizijaj dy žoŭtymi ad kureńnia zubami i rukami Ściapurku, vialikamu amataru patreniravać kułaki na małodšych dy słabiejšych i pa-zaječamu bajaźlivamu pierad dužejšymi, što mahli pastajać za siabie.

Skazaŭšy zvyčajnaje «Morning», Asia Iosifaŭna pastaviła na stoł čamadančyk, adčyniła.

— Dy heta ž prajhravalnik!

Prapuściŭšy mima vušej ździŭleńnie vučniaŭ, jana vyniała z kalarovaha pakietu z reklamaj elitarnaj džynsavaj firmy «One» albom «Led Zeppelin» sa znakamitaj «Immigrant song» («Pieśniaj imihranta») i pastaviła dysk na prajhravalnik. Paśla nievialikaj paŭzy ŭ kabinet, niby hrom z małankaju, uvarvaŭsia Płant i — zastahnaŭ, zahałasiŭ ab niaščasnaj, badziažnaj doli inšaziemca, byccam schapiŭ klasu za horła — usich i adrazu:

On we sweep with threshing oar,

Our only goal will be the western shore¹.

Dobra jašče, što vučni 9 «B» tady nia viedali pierakładu. Dy nia tolki jany. Bo ništo sabie meta, dy jašče i zapavietnaja!

Poŭny varyjant čytajcie ŭ papiarovaj i pdf-versii haety "Naša Niva"

¹ Pad stukat viosłaŭ my mkniom da zapavietnaj mety — bieraha Zachadu. (anh.)

• 0
• 0
• 0
• 0
• 0
• 0
• 0
• 0