Departacyja ź Biełarusi va Ŭkrainu nia vybiła hleby z-pad noh Michaiła Padalaka. Žurnalist uznačaliŭ infarmacyjna-analityčny tydniovik «Ukrajinśka hazieta». Dyzajn vydańnia duža padobny da hazety «Vriemia», u jakoj Padalak byŭ namieśnikam hałoŭnaha redaktara, — navat komiksy na apošniaj staroncy vychodiać pad toj samaj šapkaj «Lusterka». Jość i adroźnieńnie: ukrainskaja mova tekstaŭ. Prablematyka — całkam ukrainskaja, adnak biełaruskaja tematyka na pałosach «Za miažoj» prysutničaje stała. M.Padalak adkazvaje na pytańni karespandenta «NN» Alesia Kudryckaha.
«NN»: Ci rady Vy pavarotu losu, dziakujučy jakomu apynulisia va Ŭkrainie?
Michaił Padalak: Heta vielmi cyničnaje pytańnie. Ja b nie skazaŭ, što byŭ rady, kali paśla 15 hod žyćcia ŭ Biełarusi mianie za 30 chvilin adtul vyhnali i zabaranili viartacca ciaham piaci hadoŭ. U Biełarusi zastalisia maje siabry, praca, rodnyja. Škaduju, što nie ŭdałosia, jak i mnohim inšym, chto pracavaŭ u hramadzianskaj supolnaści dy ŚMI, pamianiać ład dumak biełaruskaha nasielnictva. Ź inšaha boku, ja čałaviek dastatkova mabilny. Nielha siadzieć i pasypać hałavu popiełam. Treba pracavać, dzie b ty ni znachodziŭsia, a nie płakacca ŭ kamizelku.
«NN»: Ci nie rasčaravalisia Vy va Ŭkrainie?
MP: Ja vielmi lublu Biełaruś, jana spakojnaja i vielmi pryhožaja. U svoj čas jana taksama była j vielmi šmatabiacalnaja — ale ciapier zasnuła. Kali vy pierajedziecie paŭdniovuju miažu, dyk ubačycie, što jość inšaja kraina — taksama vielmi pryhožaja i cikavaja, ale jana raźvivajecca, jana pračnułasia. Ja rady, što trapiŭ va Ŭkrainu mienavita ŭ hety čas. Ja ŭdzielničaŭ u Aranžavaj revalucyi, zajmaŭsia infarmacyjnym składnikam kampanii Juščanki ŭ Charkavie — adnym z samych ciažkich rehijonaŭ. I ja b chacieŭ, kab Biełaruś była inšaj krainaj, kab maja praca va Ŭkrainie spryčyniłasia da taho, kab Biełaruś pazbaviłasia strašenna niezrazumiełaha mnie typu dziaržaŭnaha kiravańnia.
«NN»: Ci nie było spakusy pakinuć žurnalistyku — skažam, pajści ŭ biznes?
MP: Ja nie liču, što treba sychodzić z toj sfery, u jakoj ty siabie adčuvaješ jak ryba ŭ vadzie. U mianie nikoli nie było žadańnia kinuć pracu ŭ mas-medyja, choć praca ŭ hazetach časta vychodziła mnie bokam. Praca ŭ ŚMI ŭ hramadztvie, jakoje, jak biełaruskaje i ŭkrainskaje, jašče nia vyśpieła — vielmi hanarovaja i adkaznaja. Nam treba za jaje bracca i rabić jaje, mahčyma, navat na škodu ŭłasnym intaresam. Kali pravilna pabudavać pracu ŚMI, možna źmianić kaštoŭnaści, jakija buduć vyznačać naša žyćcio i žyćcio naščadkaŭ. Va Ŭkrainie heta ŭžo adbyvajecca, u Biełarusi — jašče nie.
Poŭny varyjant čytajcie ŭ papiarovaj i pdf-versii hazety "Naša Niva"
