Čas puskać kamiani

U niadzielu ŭ šatlandzkim Pejśli zaviaršyłasia suśvietnaje žanočaje pieršynstvo pa kiorlinhu.

Vyjhrała jaho zbornaja Švecyi. A ŭžo 2 krasavika ŭ Viktoryi (Kanada) startuje mužčynski čempijanat śvietu. Na zachodnim uźbiarežžy Kanady źbiarucca 12 najmacniejšych kamandaŭ planety — Aŭstralija, Novaja Zelandyja, Kanada, Šatlandyja, Finlandyja. Hulni budzie tranślavać kanał «Eŭrasport».

Novyja tendencyi ŭ sporcie

U śviecie raście cikavaść da ekzatyčnych vidaŭ sportu — spłavu na bajdarkach pa hornych rekach, haradzkoha alpinizmu, serfinhu, snaŭbordu abo papularnaha apošnim časam ciubinhu. Prymieta pierachodu jakoha-niebudź vidu z ekzatyčnych u masavyja — uklučeńnie ŭ alimpijskuju prahramu.

Jašče adna z apošnich tendencyj — indyvidualizacyja ci źmianšeńnie kolkaści ŭdzielnikaŭ taho ci inšaha spabornictva. Praściej amataru-pačatkoŭcu adšukać adnaho naparnika i dvuch supiernikaŭ dla plažnaha valejbołu, čym farmavać dźvie kamandy pa šeść čałaviek dla jaho klasyčnaha subrata. Abo navošta stvarać chakiejnuju kamandu z dvaccaci čałaviek, kali možna «źbić» družynu z čatyroch čałaviek dla hulni ŭ kiorlinh. Pahatoŭ i placoŭka treba mienšych pamieraŭ.

Niadobrazyčliŭcy kažuć, što kiorlinh — strašenna nudnaja hulnia. Niechta aściarožna pulaje kamień pa ladovaj placoŭcy, a inšyja apantana ŭ hetym momant šurujuć lod švabrami. Adnak varta ŭsiaho raz pahladzieć hulniu, kab zachvareć na jaje.

Svoj/čužy dom

U kiorlinh hulajuć dźvie kamandy pa piać čałaviek (čatyry asnoŭnyja i adzin zapasny) — skip (kapitan), vice-skip, lid (viadučy) i sekand (druhi). U zaležnaści ad katehoryi spabornictvaŭ hulnia składajecca z vaśmi—dziesiaci endaŭ (peryjadaŭ), u kožnym ź jakich zapuskajecca pa vosiem kamianioŭ.

Zadača kožnaj z kamand — pastavić jak maha bolej svaich kamianioŭ-bitaŭ u dom, dyjametar znadvornaj akružnaści jakoha składaje šeść futaŭ (182 sm), jak maha bližej da centru. I zaadno pa mahčymaści pavybivać adtul kamiani supiernikaŭ. Masa kamienia — 44 funty (19,95 kh). Kirujuć dziejańniami skipy — mozh i štab kamandy. Jany vyrašajuć, jak najzručniej «trapić» u dom, uvachod kudy moža być začynieny kamianiami supiernika.

Hulcy kamandy pa čarzie — lid, sekand, vice-skip, skip — puskajuć kamień. Dvoje kaleh u hety momant apantana palirujuć lod ščotkami-miotłami, stvarajučy admysłovuju darožku, kociačysia pa jakoj, kamień nia tolki pavialičvaje svoj šlach, ale navat mianiaje trajektoryju.

Z radzimy piktaŭ

Radzima kiorlinhu — Šatlandyja. Pavodle adnych źviestak, kiorlinh prydumali horcy, jakim treba było niejak bavić čas u pierapynkach pamiž vojnami z anhličanami. Pavodle druhoj versii, hulniu prydumali manachi, jakija nia viedali, kudy siabie padzieć doŭhimi kaledonskimi zimami. Pieršyja zafiksavanyja zhadki pra hulniu adnosiacca da 1511 h. Na adnoj z hraviur, datavanaj hetym hodam, i byŭ adlustravany «kamień u ruchu». Paźniej Piter Brejhiel-starejšy adlustravaŭ hulniu na karcinie, a šatlandzkija paety raz-poraz prasłaŭlali jaje ŭ vieršach.

Poŭny varyjant čytajcie ŭ papiarovaj i pdf-versii hazety "Naša Niva"

• 0
• 0
• 0
• 0
• 0
• 0
• 0
• 0