Praha adrenalinu

Pry kancy tydnia dla amataraŭ sportu pačniecca sapraŭdnaje śviata. U subotu, 30 krasavika, u Aŭstryi startuje čempijanat śvietu pa chakiei.

16 kamandaŭ raźbity na čatyry padhrupy. U žyvym etery hulni na ahulnadastupnych kanałach buduć pakazvać kanały BT i TVC. Zbornaja Biełarusi trapiła ŭ padhrupu «A». Sioj-toj užo paśpiašaŭsia nazvać jaje hrupaj śmierci, što, praŭda, niedaloka ad iściny.

U supierniki biełarusam na pieršym etapie dastalisia čempijon śvietu-2002 zbornaja Słavakija (matč ź imi 30 krasavika), zbornaja Rasiei, što tydniem raniej vyjhrała Kubak Eŭraturu, dy haspadary čempijanatu aŭstryjcy. Doma, jak viadoma, i ścieny dapamahajuć.

U biełaruskaha zaŭziatara cikavaść da suśvietnaha pieršynstva padahretaja i tym, što ŭ Vienu pavioz zbornuju zamiežny specyjalist, trener «Vašynhton Kepitałz» Hlen Chenłan. Pryznačeńnie Chenłana 11 sakavika na post №1 vyklikała šmat narakańniaŭ jak siarod zaŭziataraŭ, tak i siarod chakieistaŭ. Kazali, što, moža, nia varta mianiać koniej na pierapravie, a lepš dać mahčymaść dapracavać da kanca sezona Michaiłu Zacharavu. Ale chakiejnaje kiraŭnictva skazała važkaje słova — i kropka. Zacharava adpravili ŭ adstaŭku. Hadać, nakolki heta pravilny albo pamyłkovy krok, — sprava marnaja. Usio stanie jasna praz dva tydni, pa skančeńni pieršynstva. Voś tolki tavaryskija matčy biełarusy praviali najhoršym čynam.

Adznačym taksama, što Chenłan pryjechaŭ u našu chakiejnuju parafiju sa svaimi zvyčkami. Kardynalnym čynam pamianiaŭ systemu trenirovak, admoviŭsia ad pasłuh adnaho ź lideraŭ nacyjanalnaj družyny Alaksieja Kalužnaha i viarnuŭ u zbornuju hałkipera Andreja Miezina, jaki nia raz vyručaŭ na suśvietnych čempijanatach. Parazumiecca ź Michaiłam Zacharavym Miezinu było vielmi ciažka.

Praŭda, kolki dzion tamu łyžku dziohciu ŭ biełaruskuju bočku ź miodam dabaviŭ uschodni susied — Rasieja. Kiraŭnictva picierskaha SKA, za jaki minuły sezon vystupaŭ Miezin, namiaknuła, što naleta biełarusu daviadziecca šukać novaje miesca pracy. Psychalahičnaja vajna z supiernikami pa padhrupie ŭ rasiejcaŭ užo pačałasia. Biełaruskamu hałkiperu, abaraniajučy varoty, daviadziecca ŭ hałavie jašče trymać roznyja varyjanty pracaŭładkavańnia ŭ budučym sezonie. Pry łakaŭcie ŭ NCHŁ i lišku chakiejnaj pracoŭnaj siły na eŭrapiejskich rynkach zrabić heta budzie składana. Chiba tolki dakazać svaju prafesijnaść udałaj hulnioj na čempijanacie śvietu, a zaadno ŭ vočnaj sprečcy sa zbornaj Rasiei (4 traŭnia) adpomścić za takuju psychalahičnuju ataku.

A jašče chočacca ad budučaha suśvietnaha pieršynstva adrenalinu. Takich pieražyvańniaŭ, jakija byli ŭ 1996 h., kali zbornaja ŭ halandzkim Ejndchovenie pieršy raz pasprabavała prabicca ŭ suśvietnuju elitu. Ci paŭtareńnia Zimovaj alimpijady-1998. Kali zamiest taho, kab iści na vučobu, ź siabrami ranicaj hladzieli tranślacyi ź Japonii, pieražyvajučy za biełaruskuju zbornuju, jakaja tady prabiłasia ŭ vaśmiorku najmacniejšych zbornych śvietu. Tady heta byŭ superpośpiech ajčynnaha chakieju, jaki jadnaŭ nacyju.

Voś hetaha samaha i čakaješ ad suśvietnaha pieršynstva ŭ Aŭstryi. Kab naša zbornaja nia prosta zachavała/straciła miesca ŭ elicie. Vandravańnie pamiž vyšejšym i pieršym dyvizijonami całkam nadakučyła. Chočacca pryhožaj, hodnaj hulni. I kab kožny viečar, kali buduć hulać biełarusy, čakaŭsia ź nieciarpieńniem. Lepiej ža, kab pra našu krainu ŭ śviecie viedali sa stanoŭčaha boku, bo nienarmalna, kali ab joj miarkujuć z dakładu Sieviaryna, vystupu Rajs ci skandalnych lapaŭ prezydenta.

Apošnija hady (chiba za vyniatkam Kubku Devisa) u nas nie było značnych pośpiechaŭ u sporcie. A tak chočacca pabyvać choć na chvilinu ŭ skury siaredniestatystyčnaha słavaka ci łatyša. I adčuć, što adčuvaŭ žychar Bracisłavy ŭ traŭni 2002 h., kali zbornaja Słavakii stała čempijonam śvietu, ci chacia b ryžanin u červieni 2004 h., paśla hieraičnaha matču zbornaj Łatvii sa zbornaj Niamieččyny (0:0).

Kab pradoŭžyć zmahańnie za pucioŭku ŭ płej-of, biełarusam treba nie zaniać apošniaje miesca ŭ svajoj padhrupie «A». Tady najlepšyja try kamandy padhrupy abjadnajucca z tryma kamandami padhrupy «D» (Čechija, Niamieččyna, Švajcaryja, Kazachstan). Matčy pa vyznačeńni čatyroch čverćfinalistaŭ projduć z 6 pa 10 traŭnia.

U advarotnym vypadku biełarusam z tryma takimi ž niaŭdačnikami daviadziecca zmahacca za zachavańnie miesca ŭ elicie. Matčy taksama 6—10 traŭnia. Vybyvajuć z najvyšejšaha dyvizijonu dźvie kamandy.

• 0
• 0
• 0
• 0
• 0
• 0
• 0
• 0