Lotas Martynava

Dziejnaść MZSu nahadvaje adnu dziciačuju hulniu, dzie kinderam prapanujecca pabudavać z asobnych napisanych na kartkach słovaŭ lahičny skaz. Feljeton Lolika Uškina.

Usie našy abłomy ad taho, što my farmalna, kali nie abyjakava, stavimsia da Jahonych hienijalnych instrukcyj. Tak, dniami Jon kankretna prapisaŭ, što antybiełaruskija mesydžy lideraŭ HUUAMu treba ŭsprymać pa-filazofsku.

Takoje ŭražańnie, što klerki našaha MZSu zhadanaha prahonu ŭvohule nia čuli — ci to ŭ ich prystup sensornaj afazii, ci to padčas tranślacyi ŭsim ministerstvam pieraklučylisia z BT na spadarožnikavy kanał, dzie «Milan» viesieła apuskaŭ «Parmu».

Prynamsi, miarkujučy pa apošnich emzeešnych dakumentach, anijakich źmien u pracy biełaruskaha Kie d'Arse nie nazirajecca.

Dziejnaść rodnaha MZSu ŭsie bolš nahadvaje adnu dziciačuju hulniu, dzie kinderam prapanujecca pabudavać z asobnych napisanych na kartkach słoŭ lahičny skaz. Ličycca, što padčas hulni ŭ dziaciej afihicielna raźvivajecca aj-kju.

Padajecca, padobnaj hulnioj zabaŭlajucca i ŭ kantory Martynava, chiba što z toj roźnicaj, što słovy ŭ kartkach amal nie mianiajucca.

Zranku dyplamaty prychodziać na pracu i składajuć noty pratestu šlacham pieratasoŭvańnia adzinak svajho słoŭnikavaha hierbaryju: «dvajnyja standarty», «skažonyja linzy», «tendencyjny pohlad», «mova cisku», «prapłačanaja pravakacyja».

Jak prykład — reakcyja na zajavu hruzinskaha prezydenta i parlamentu. Jak viadoma, kaŭkazcy napiaredadni zboru prezydentaŭ HUUAM zajavili: «My ličym, što biełaruski narod maje prava na svabodu vybaru, svabodu vykazvańniaŭ, svabodu słova, svabodu vieści palityčnuju dziejnaść». Na heta našy dyplamaty chucieńka skłali čarhovuju notu pratestu.

Čytać jaje hetak ža sumna, jak hladzieć dvaccatuju častku «Skivic». Usio chadulna i, hałoŭnaje, pradkazalna: akuła paśniedaje ŭsimi, akramia hałoŭnaha hieroja.

Darahija biełaruskija Meternichi i Talejrany, kab nie było kryzisu žanru, treba bolš uvažliva słuchać rodnaha prezydenta. Kali b vy pastavilisia da słoŭ hruzinskaha lidera pa-filasofsku, usio vyhladała b inakš.

Katehoryja «mieć», ź jakoj tak nosicca Saakašvili, — heta zvyčajny maralny ŭtylitaryzm, jaki Erych From vydatna razhramiŭ u «Mieć abo isnavać».

Naturalna, adkaz Martynava pavinien być filazofskim opusam. Naprykład:

«Šanoŭny Saakašvili. Nas vielmi zacikaviła prapanavanaja Vami kancepcyja modusu byćcia, adnak jaje idyjamatyčnyja aspekty naściarožvajuć. A što kali pahladzieć na prablemu vybaru ŭ kantekście idei ekzystencyjalnaha i prac poźniaha Tamaša Akvinskaha? Čakajem adkazu. Vaš MZS RB…» — i h.d.

Vidavočna, atrymaŭšy takoje myła, viciaź u tyhravaj škury ŭ nastupny raz jašče sto razoŭ padumaje, ci źviazvacca jamu sa słavianskim vołatam.

A jašče lepiej adkazvać u farmacie japonskaha chajku:

Pravy čałavieka

Navat u žuka jość kryły

Miesiac unačy jak korak

Ź vitańniem, biełaruski MZS

• 0
• 0
• 0
• 0
• 0
• 0
• 0
• 0