Łedzi Haha, AP
Amierykanskaja śpiavačka Łedzi Haha zavajavała «Załaty hłobus» u naminacyi «Najlepšaja aktrysa mini-sieryjała abo filma dla TB» za rolu ŭ chorar-sieryjale «Amierykanskaja historyja žachaŭ». Pra heta było abvieščana ŭ chodzie 73-j cyrymonii ŭručeńnia prestyžnaj kinaŭznaharody ŭ Łos-Andželesie.
Najlepšaj dramaj nazvany film «Vyžyły». Svoj treci «Załaty hłobus» jak najlepšy dramatyčny akcior za hałoŭnuju rolu ŭ «Vyžyłym» atrymaŭ Leanarda Dzi Kaprya. «Załaty hłobus» za režysuru prysudžany režysioru karciny Alechandra Ińjarytu.
Statuetka za najlepšuju žanočuju dramatyčnuju rolu ŭručana Bry Łarsan, jakaja źniałasia ŭ filmie «Pakoj».
Pryz u naminacyi «Najlepšaja kamiedyja / miuzikł» atrymaŭ fantastyčny film «Marsijanin» brytanskaha režysiora Rydli Skota. Najlepšym kamiedyjnym akcioram pryznany Met Dejman, jaki syhraŭ u hetym filmie rolu astranaŭta NASA, kamiedyjnaj aktrysaj — Dženifier Łoŭrens za rolu ŭ karcinie «Džoj».
Pryz za najlepšy scenar atrymaŭ uładalnik «Oskara» Aaron Sorkin za film «Styŭ Džobs» pra zasnavalnika kampanii Apple. Kiejt Uinślet, jakaja źniałasia ŭ hetaj karcinie, atrymała statuetku ŭ naminacyi «Najlepšaja aktrysa druhoha płana».
Svoj pieršy ŭ karjery «Załaty hłobus» za film «Kryd: Spadčyna Roki» atrymaŭ Silviestr Stałone, jaki raniej trojčy naminavaŭsia na hetuju premiju.
Statuetku ŭ naminacyi «Najlepšaja aktrysa ŭ kamiedyjnym sieryjale» atrymała Rejčeł Blum za rolu ŭ «Čoknutaj byłoj».
«Załaty hłobus» za najlepšy animacyjny film uručany stvaralnikam multfilma «Hałavałomka».
Najlepšym kampazitaram pryznany Enia Marykone za muzyku da filma Kviencina Tarancina «Miarzotnaja vaśmiorka».
Najlepšym dramatyčnym sieryjałam nazvany «Mistar Robat» pra chakieraŭ, kamiedyjnym — «Mocart u džunhlach». Pryz za najlepšy mini-sieryjał uručany stvaralnikam «Voŭčaj zały».
U naminacyi «Najlepšy film na zamiežnaj movie» «Załaty hłobus» zavajavała vienhierskaja karcina «Syn Saŭła».
***
Premija «Załaty hłobus» uručajecca štohod z 1944 hoda. Jaje prysudžaje Asacyjacyja zamiežnaj presy, u jakuju ŭvachodziać prykładna 90 mižnarodnych žurnalistaŭ, jakija pracujuć u Halivudzie. Hetaja ŭznaharoda ličycca druhoj pa značnaści paśla «Oskara».
