Мітрапаліту Паўлу адмовілі ў зносе гістарычных дамкоў у цэнтры Мінска
Дамы 6, 6а на вуліцы Вызвалення ў Мінску не выключаныя са спісу гісторыка-культурных каштоўнасцяў. Гэта вынікае з пастановы Савета міністраў ад 2 жніўня.
Са спісу выключана больш за сто аб’ектаў, у асноўным гэта гарадзішчы і курганныя могільнікі, дзе калісьці праводзіліся раскопкі. З мінскай спадчыны выключаны толькі дом па вуліцы Гарадскі Вал, 5.
У сакавіку сёлета мітрапаліт Мінскі і Заслаўскі Павел звяртаўся да віцэ-прэм’ера Наталлі Качанавай даць дазвол на выключэнне дамоў на адрасе вул. Вызвалення, 6 і 6а са спісу гісторыка-культурнай спадчыны.
«Паколькі яны не маюць ніякага гістарычнага значэння і не ўяўляюць культурнай ці архітэктурнай значнасці», — упэўнена сцвярджаў мітрапаліт Павел.
«Пастанова Савета міністраў — гэта плёны працы нават не аднаго года, — кажа кіраўнік Беларускага добраахвотнага таварыства аховы помнікаў гісторыі і культуры Антон Астаповіч. — Мы накіроўвалі свае прапановы па ўдасканаленні спісу і ў 2012, і ў 2013, і ў 2014 гадах. Цяпер статус гісторыка-культурных каштоўнасцяў замацаваныя за 14 аб’ектамі, якія прапанавала менавіта наша Таварыства аховы помнікаў. Што тычыцца дамкоў на вуліцы Вызвалення, то, наколькі мне вядома, навукова-метадычная рада пры Мінкульце нават не разглядала магчымасць іх выключэння са спісу».
Павел не хаваў, што БПЦ збіралася знесці будынкі на вуліцы Вызвалення, а на гэтым месцы ўзвесці храм Уваскрасення, а таксама адміністрацыйныя будынкі Беларускага экзархата. Аднак пасля таго, як просьба мітрапаліта Паўла была агучаная публічна, на яе сталі рэагаваць дзяржаўныя чыноўнікі.
Начальнік упраўлення па ахове гісторыка-культурнай спадчыны і рэстаўрацыі Мінкультуры Ігар Чарняўскі яшчэ ў красавіку запэўніў, што яго ведамства разглядае магчымасць аднаўлення будынкаў.
«Тры будынкі ўяўлялі паміж сабой цікавы комплекс. Не ўяўляюць гістарычнай каштоўнасці? Але паасобныя будынкі вакол Нотр-Дам дэ Пары нібыта таксама не ўяўляюць ніякай каштоўнасці, а разам ствараюць непаўторны ансамбль. Гэтак можна зруйнаваць палову Рыма, калі ісці такой логікай. У Вільні палову дамоў можна грохнуць», — сказаў знаўца гісторыі Мінска Сяргей Харэўскі.
Як бачым, дамкі ўдалося адстаяць, цяпер пытанне за рэстаўрацыяй.
Цяпер чытаюць
У дакументах па «справе Эпштэйна» знайшлі сляды буйных грашовых пераводаў у Мінск. Зноў усплыло імя Карыны Шуляк13
Каментары