Апошнія гады клімат у Беларусі моцна пацяплеў. Растуць у нас цяпер кавуны і дыні. Мяняецца і фаўна.
Чытач «Нашай Нівы» Іван Мяжэвіч хадзіў у грыбы ў Баранавіцкім раёне і даслаў у Рэдакцыю фота вялікага павука. Піша: «Такі вялікі! Можа гэта тарантул?»
Іншы чытач «НН» даслаў фота вялізнага павука, які прыжыўся ў пад'ездзе:
Што гэта за павукі? «Наша Ніва» звярнулася да загадчыка лабараторыі Навукова-практычнага цэнтра па біярэсурсах Акадэміі навук, кандыдата біялагічных навук Алега Прышчэпчыка.
«На першым фота знаходзіцца крыжавік вуглаваты (Araneus angulatus). Ён жыве ў лясах. Сеткі размяшчаюцца высока над зямлёй між галінамі дрэў».
«У пад’ездзе ж можна распазнаць крыжавіка дыадэмавага, або звычайнага (Araneus diadematus)», — кажа Алег Прышчэпчык.
«Усе яны адносяцца да віду аранэідаў і ўваходзяць у сямейства павукоў кругапрадаў. Гэта адно з самых шматлікіх сямействаў у свеце, яно налічвае больш за 2500 разнавіднасцяў, — кажа Прышчэпчык. — Ва ўсяго гэтага сямейства ёсць спецыяльныя нарасты на пярэдняй пары канечнасцяў, дзякуючы якім яны здольныя плесці асаблівы від павуты».
Што вы кажаце, вялікія?
«Ды не, — не пагаджаецца Прышчэпчык. — Яны сярэдніх памераў, самцы прыблізна паўтара сантыметра, саміцы — два з паловай».
Крыжавікі сілкуюцца ўсімі кузуркамі, якіх яны могуць злавіць у свае сецівы — восамі, пчоламі, мухамі і матылькамі. Злоўленую ў сетку здабычу павук кусае, абмотвае ніткамі павуціння і пераварвае з дапамогай стрававальных ферментаў. За суткі крыжавікі з'ядаюць ежу, роўную ўласнай вазе.
Укус такога павука не страшны. Максімум — на месцы ўкусу можа назірацца невялікая прыпухласць некалькі дзён.
А клімат у Беларусі, сапраўды, цяплее. І доказ таму — у Рэдакцыю трапіла фота багамола, якога сын аднаго з журналістаў «Нашай Нівы» зняў у Заслаўі. Раней багамолы жылі толькі ў краінах паўднёвей за Беларусь. А цяпер і ў нас. Зірніце, які харашун.
Сваяк Віктара Лукашэнкі займае высокія пасады ў КДБ. Гэта высветлілася, калі забралі будынак дзіцячай паліклінікі7
Каментары