Наталля Эйсмант пра «канфедэрацыю»: Мы ідзём на эканамічна мэтазгодныя крокі. Але незалежнасць — святое
Прэс-сакратар Аляксандра Лукашэнкі Наталля Эйсмант пракаментавала «Нашай Ніве» інфармацыю аб магчымай праграме эканамічнай інтэграцыі Беларусі і Расіі, якую распаўсюдзіў расійскі «Камерсант».
Ці можна ацэньваць гэта як укід, а калі не, то як грамадству разумець фразы аб «больш чым канфедэрацыі»?
«Усе гучныя тэрміны, якія выкарыстоўваюцца ў прыведзеным артыкуле, — канфедэрацыя, федэрацыя і г.д. — мы б прапанавалі ацэньваць як пустыя журналісцкія штампы. У цэлым жа ў інтэграцыйнай рабоце, якая цяпер вядзецца, бакі сыходзяць з тых рэалій, якія маюць, гэта значыць з дасягнутага ўзроўню ўзаемадзеяння», — мяркуе Наталля Эйсмант.
Яна падкрэсліла, што ў аснове любых працэсаў ляжыць тэзіс аб незалежнасці Беларусі і Расіі.
«Гэта святое! Чырвоныя сцяжкі — гэта суверэнітэт і незалежнасць кожнай з краін. У інтэграцыйных працэсах мы ідзём на тыя крокі, якія эканамічна мэтазгодныя. Ніякіх сумесных органаў не ствараецца — да гэтага краіны не гатовыя», — падкрэслівае прэс-сакратар.
Яна нагадала, што на ўзроўні ведамстваў у Беларусі і Расіі выдатна наладжана работа сумесных калегій, эфектыўна працуюць Парламенцкі сход, Саюзны Саўмін, Вышэйшы дзяржсавет Саюзнай дзяржавы. «Гэта тыя органы, праз якія, паводле дамоўленасцяў прэзідэнтаў, вырашаюцца і будуць вырашацца пытанні двухбаковых адносін», — мяркуе яна.
«Што тычыцца пытання аб «укідзе» — праграма стане праграмай толькі тады, калі яе падпішуць прэзідэнты і яна будзе прынята на вышэйшым Дзяржсавеце ў снежні — зноў жа, калі бакі будуць да гэтага гатовыя. Пакуль праца працягваецца, аб усіх іншых падрабязнасцях мы прапануем звяртацца да тых, хто гэтую інфармацыю «зліў», — падсумавала Наталля Эйсмант.
Каментары