«Паводзіў сябе нахабна і абуральна». YouTube-блогера арыштавалі на 10 сутак за «перашкоду» агляду дома
37-гадовы Вадзім Ключнік вядзе YouTube-канал Vadim Key. 25 мая дадому ў Калодзішчах да мужчыны прыйшлі супрацоўнікі міліцыі, каб правесці агляд на падставе пастановы, якая была выпісаная «ў сувязі з праверкай інфармацыі аб магчымым удзеле ў крымінальнай справе», паведамляюць праваабаронцы.
28 мая справу Вадзіма па арт. 24.3 КаАП разглядзеў суддзя Мінскага раёна Вадзім Казей. Блогера абвінавацілі ў перашкодзе міліцыянтам падчас агляду ў доме і ў тым, што Вадзім «паводзіў сябе нахабна і абуральна». Сваю віну Ключнік не прызнаў.
У той час, калі да яго прыйшлі міліцыянты, мужчына касіў траву на заднім двары, таму мог адразу не пачуць. Але калі ўбачыў супрацоўнікаў, то адразу адчыніў брамку і азнаёміўся з пастановай.
Зрабіў ён гэта двойчы, бо не мог паверыць прачытанаму і думаў, што да яго прыйшлі памылкова. Са словаў Вадзіма, ён прапанаваў прайсці ім у дом і непадпарадкаванне не аказваў. Паказанні Ключніка пацвердзіла і яго жонка, якая выступіла сведкай на судзе.
У паказаннях міліцыянта «Неўскага» адсутнічае, што Ключнік «паводзіў сябе нахабна і абуральна», але менавіта гэта яму і ставілася ў віну. Таксама паводле пратакола час затрымання і час правапарушэння — аднолькавыя.
У выніку суддзя Казей прызнаў Ключніка вінаватым па арт. 24.3 КаАП і арыштаваў яго на 10 сутак.
Цяпер чытаюць
Пабіўшы рэкорд, цэны на кватэры ў Мінску пачалі прасядаць. Колькі цяпер у сярэднім просяць за метр?1
Каментары