«Пакажы, як у Беларусі людзі жывуць». Блогерка з Інданэзіі зняла ролік пра нашу вёску
Сайфа Адрыяна пачала вандраваць па свеце ў 2013 годзе. Раней яна працавала ва ўрадзе Інданэзіі, але вырашыла адкрыць для сябе свет, Сайфа падарожнічае адна і часта спыняецца ў каучсёрфераў. Яна мае больш за 300 тысяч падпісчыкаў у Youtube. Гэтай восенню дзяўчына завітала ў вёску недалёка ад Мінска і зняла пра гэта ролік.
Гаворка ідзе пра вёску Крупіца, якая знахрдзіцца на беразе ракі Пціч, у дваццаці кіламетрах ад Мінска. Наўрад ці яе можна назваць вельмі адметнай, усё ж адчуваецца блізкасць да сталіцы, але для чалавека з Інданэзіі многае выглядае нетыповым.
Так, Сайфа ўражаная прыгажосцю восені, адзначае, што ў трапічных краінах, адкуль яна паходзіць, няма выразнага пераходу паміж сезонамі. Экскурсію па вёсцы для яе праводзіць дзяўчына па імені Ірына, з якой яны пазнаёміліся па каучсёрфінгу.
У Крупіцы большасць жыхароў працуюць у Мінску. Ірына знаёміць Сайфу з працавітай суседкай, якая ад ранку да ночы завіхаецца ў агародзе. Паказвае мясцовыя крамы і супрацоўнікаў камунальных службаў, што прыбіраюць апалае лісце.
Блогерка ўражаная, што ў вёсцы ёсць дом культуры з залай для канцэртаў, тут жа праходзяць дыскатэкі. У сваім роліку Сайфа звяртае ўвагуна тое, што адукацыя для школьнікаў у Беларусі бясплатная, плаціць трэба толькі за падручнікі — дваццаць рублёў на год, але бацькі дапамагаюць з рамонтам. Асноўная праблема — не хапае настаўнікаў праз нізкія заробкі ў адукацыі.
Ірына вядзе Сайфу па вёсцы і паказвае лавы, на якіх звычайна збіраліся старыя.
«Напэўна, каб піць гарбату?» — удакладняе блогерка.
«Не, яны звычайна лускаюць семкі», — адказвае ёй сяброўка з Беларусі. Але традыцыя адмірае, паколькі ўсё менш сталых людзей.
Ірына паказвае госці старую частку вёскі, дзе можна пабачыць добра знаёмыя нам сіне-жоўтыя домікі. Насупраць жыве жанчына сталага веку, якая засталася адна. Убачыўшы турыстку, сходу абдымае яе і кажа, каб тая заставалася ў Беларусі і выходзіла тут замуж.
Гэта самая невясёлая частка роліка — у якой бачна, як сціпла жыве пенсіянерка. «Здымі і пакажы, як у Беларусі людзі жывуць», — кажа яна.
Каментары