Рэцэпт на выхадныя. Англійскія аладкі піклеты — новы варыянт смачнага сняданка
Піклеты — нешта сярэдняе паміж аладкамі, булачкамі і амерыканскімі панкейкамі. Падавайце іх на сняданак з варэннем, маслам, салодкімі сіропамі і садавіной, каб атрымаць цудоўны пачатак дня.
Фота: BBC Food
Каб прыгатаваць піклеты, вам спатрэбіцца:
- 250 грамаў мукі
- 1 чайная лыжка сухіх дрожджаў хуткага дзеяння
- 1 чайная лыжка цукровай пудры
- палова чайнай лыжкі солі
- 325 мілілітраў малака з 1,5% тлушчу
- чайная лыжка масла
- чайная лыжка алею
- Змяшайце ў місцы муку, дрожджы, цукровую пудру і соль, перамяшайце да аднароднасці і зрабіце ў цэнтры лунку.
- Нагрэйце малако ў мікрахвалёўцы ці ў рондалі на слабым агні, пакуль яно не стане цёплым, але не гарачым. Улійце цёплае малако ў сухую сумесь і ўзбівайце 1-2 хвіліны, пакуль сумесь не стане аднароднай. Ачысціце бакі міскі гумовай лапаткай, накрыйце цеста кухонным ручніком і пакіньце пры хатняй тэмпературы на 1-1,5 гадзін або пакуль сумесь не павялічыцца ў памеры ўдвая і не пакрыецца бурбалкамі.
- Разагрэйце патэльню на сярэднім агні. Прамажце яе дно маслам і алеем, вазьміце кухонную паперу і прыбярыце з патэльні лішні тлушч.
- Вазьміце вялікую лыжку і трохі перамяшайце сумесь, каб прыбраць з яе вялікія бурбалкі. Потым вазьміце сталовую лыжку, апускайце лыжкі сумесі ў патэльню і давайце ім расцякацца да дыяметра 8 сантыметраў. У вас павінна атрымоўвацца 3-4 аладкі за раз. Гатуйце піклеты на павольным агні, не пераварочваючы, 3-4 хвіліны, або пакуль бурбалкі на верхняй частцы аладкі не лопнуць і не пакінуць пасля сябе дзірачкі. На верхняй частцы аладкі не павінна заставацца сырое цеста, а ніжні бок аладкі павінен атрымаць залаціста-карычневы колер.
- Перавярніце аладкі і смажце іх з іншага боку яшчэ 1-2 хвіліны або да залаціста-карычневага колеру. Зніміце піклеты з патэльні і пакіньце іх астываць.
- Падавайце піклеты цёплымі, дзірачкамі ўверх, з маслам і варэннем.
Каментары