Мы ўсе ведаем, што каву трэба ўжываць умерана, але часам так цяжка адмовіцца ад кубачка духмянага напою. Якія наступствы вас чакаюць, калі балаваць сябе кавай у другой палове дня?
Кава мае карысныя ўласцівасці: яна танізуе і змяшчае шмат антыаксідантаў, якія абараняюць клеткі ад уздзеяння свабодных радыкалаў і, адпаведна, ад запалення і раку. Два-тры кубкі кавы на дзень паніжаюць рызыку развіцця дыябету 2 тыпу і паляпшаюць кровазварот, павышаюць ціск у асоб з паніжаным ціскам.
З другога боку, кава вымывае з арганізма кальцый і магній, а павышэнне крывянога ціску небяспечнае для тых, у каго гіпертэнзія.
Тое, як кава на нас уплывае, залежыць ад таго, калі мы яе п’ём. Калі рабіць гэта адразу пасля абуджэння, калі ў крыві яшчэ высокі ўзровень гармону стрэсу картызолу, стымулюючы эфект кавы будзе не надта выражаны. Рэч у тым, што картызол паніжае ўздзеянне кафеіну, а кава, у сваю чаргу, павялічвае выпрацоўку картызолу і ўзмацняе яго негатыўны ўплыў на арганізм. Таму лепш за ўсё піць каву не адразу калі прачнешся, а позняй раніцай.
У даследаванні 2014 года людзям за пяць гадзін да сну давалі дозу кафеіну, эквівалентную дзвюм порцыям эспрэса. У выніку паддоследныя даўжэй засыналі, часцей прачыналіся ноччу і мелі больш кароткія перыяды глыбокага сну, неабходнага для адпачынку і рэгенерацыі мозга. Некалькі гадоў таму навукоўцы высветлілі, што вячэрняя кава яшчэ і парушае працу цыркадных рытмаў чалавека — біялагічнага «гадзінніка» ўнутры чалавека, які падтрымлівае яго функцыянаванне ў 24-гадзінным рытме. Напрыклад, двайное эспрэса за тры гадзіны да сну пераводзіць гэты «гадзіннік» назад у сярэднім на 40 хвілін.
Жанчынам падчас менапаўзы варта ведаць, што ўжыванне прадуктаў з кафеінам у другой палове дня можа ўзмацніць у іх потавыдзяленне ноччу. Таксама кафеін мае мачагоннае дзеянне, то-бок калі вы п’яце яго пасля абеду ці ўвечары, то вы можаце часцей наведваць туалет ноччу, а значыць, і перабіваць сон. Ёсць даныя, што людзі, якія спажываюць шмат кафеіну, часцей пакутуюць ад нетрымання мачы, чым тыя, хто п’е каву і моцны чай умерана ці ўвогуле яе не спажывае.
Чытайце таксама:
Не кожная кава — карысная
Кафеін робіць чалавека больш схільным да трат. Вось як гэта працуе
Як пазбавіцца плямаў на зубах
Праекціроўшчыкі паказалі, як будзе выглядаць плошча Бангалор у Мінску. Ім сказалі падумаць лепш8
Праекціроўшчыкі паказалі, як будзе выглядаць плошча Бангалор у Мінску. Ім сказалі падумаць лепш
«На працягу 30 гадоў незалежнасці беларускамоўныя бюлетэні задавальнялі ўсіх». Камуністы абвінавацілі Бондараву ў распальванні варожасці на моўнай глебе1616
Каментары