Шаўчэнка: Крэмль хацеў бы замяніць Лукашэнку, і я ведаю на каго
Народны дэпутат Украіны Яўген Шаўчэнка, які мае сувязі з вышэйшым кіраўніцтвам Беларусі, расказаў, чаму Лукашэнка нязручны Пуціну і якую для яго замену знайшлі ў Маскве.
У інтэрв'ю ютуб-каналу «Фабрика новин» народны дэпутат Украіны Яўген Шаўчэнка выказаў думку, што Масква зацікаўленая ў тым, каб Лукашэнка не быў на чале Беларусі. Акрамя гэтага, ён выказаўся аб тым, што ведае аб планах Крамля замяніць Лукашэнку на іншага чалавека.
«На каго дакладна, я не буду цяпер называць. Але гэта багаты чалавек, бізнэсмен. Ён родам з Беларусі. Гэты чалавек выконваў бы ўсе капрызы Пуціна па першай камандзе».
Шаўчэнка адзначыў, што для Пуціна Лукашэнка — не вельмі зручная фігура, бо не будзе проста так выконваць нейкія загады. Дэпутат лічыць, што не трэба сурʼёзна ўспрымаць і заявы Лукашэнкі адносна вайны з Украінай і яго дачыненне да яе пачатку.
«Усе яго дзеянні, калі прааналізаваць лагічна, а не праз эмоцыі, нават калі ён Пуціну казаў: «Правільна, што напалі. Яны б напалі на нас. Гэта прэвентыўныя меры». Гэтыя словы сведчаць толькі аб тым, што ён не быў далучаны да гэтага працэсу. І гэты яго званок а 5-й ранку Пуціну. Калі ты «ў тэме» з імі, чаму ты яму звоніш а пятай ранку?
Я ведаю псіхатып Лукашэнкі і ўпэўнены, што ён не быў далучаны да гэтай тэмы наўпрост. Яго выкарысталі».
На пытанне, як магло так стацца, што ўварванне адбылося і з тэрыторыі Беларусі без ведама Лукашэнкі, народны дэпутат адказаў:
«Вы ж памятаеце, што ў той час гулялі ў ваенныя вучэнні, ганялі туды-сюды войскі. А потым Лукашэнка апраўдваўся: «Я свой, я з вамі». Магчыма, ён думаў, што атрымаецца за тры дні, і тады яны будуць разам дзяліць ахвяру».
А заява Лукашэнкі «Я вам пакажу, адкуль рыхтавалася нападзенне», на думку Шаўчэнкі, адрасавалася Пуціну. Такім чынам ён сябе і праявіў. Ён раіць поўнасцю паглядзець запіс, дзе гучаць гэтыя словы. Тады можна ўбачыць, што ў канцы Лукашэнка гаворыць «І правільна зрабілі. Каб вы гэтага не зрабілі, на нас бы напалі». «Такім чынам, ён падыгрываў», — лічыць палітык.
Калі вядоўца нагадаў словы Лукашэнкі ў інтэрвʼю Салаўёву за некалькі дзён да пачатку вайны: «З кім там ваяваць. На чатыры дні. Там ваяваць няма з кім», то Шаўчэнка адказаў:
«Давайце будзем шчырымі. У нас шмат хто ва Украіне з комплексам заніжанай самаацэнкі лічыў, што наша армія слабая. А я заўсёды казаў, што ўкраінцы заўсёды, нават у савецкі час, былі найлепшымі вайскоўцамі. Гэта прыроднае. Я заўсёды казаў, што Беларусь не пра вайну.
А ўкраінцы — народ, які ўмее ваяваць. І сваёй гісторыяй ён гэта пацвердзіў. Гэта ваяўнічы народ, і з ім ваяваць няварта. Гэта была памылка расіян. На жаль, палітычнае кіраўніцтва Крамля і цяпер гэтага не зразумела. Яны не разумеюць, што ваююць не з Зяленскім ці з Буданавым. Яны ваююць з украінскім народам. А народ перамагчы немагчыма».
Раней кіраўнік украінскай вайсковай выведкі Кірыла Буданаў заявіў, што яны выкарыстоўвалі Яўгена Шаўчэнку для камунікацыі з Аляксандрам Лукашэнкам.
Чытайце яшчэ:
Памятаеце дэпутата Рады Яўгена Шаўчэнку, які ездзіў некалькі разоў да Лукашэнкі? Яго затрымалі
Каментары
Алексін? можа быць. гэтая пракладка вельмі блізкая да 'сям'і', кантралюе многа іхных фінансавых плыняў. праз свае бізнэсы і захапленне байкінгам ён блізкі і да пуцінскіх колаў - ад 'начных ваўкоў' да вайскоўцаў.