Суд пакараў штрафам хулігана, які разбіў шыбы ў магілёўскім касцёле. Але плаціць ён не будзе
Храм лічыцца адной з найбольш гістарычна важных каталіцкіх святыняў Беларусі.
![](http://nnexpictures.fra1.digitaloceanspaces.com/img/w732d4webp1/photos/z_2023_06/47a72cdb-faa9-4566-8608-c7b668196b17_w1023_r1_s-5bgad.jpg.webp)
Мужчына сёлета ў студзені разбіў шыбы ў магілёўскім кафедральным касцёле Унебаўзяцця Найсвяцейшай Панны Марыі і Святога Станіслава. У красавіку суд Ленінскага раёна Магілёва прызнаў яго вінаватым паводле артыкула аб хуліганстве і прызначыў штраф. Але плаціць абвінавачанаму не давядзецца, мяркуючы па выраку, апублікаваным у банку судовых рашэнняў, паведамляе «Радыё Свабода».
Згодна з матэрыяламі справы, увечары 19 студзеня мужчына быў п'яны і знаходзіўся каля касцёла. Ён наўмысна і без прычыны кінуў не менш за пяць разоў камяні і плітку ў пяць вокнаў. Такое парушэнне грамадскага парадку, паводле пастановы суда, «выявілася ў відавочным для яго самога і для навакольных дэманстратыўным грэбаванні агульнапрынятай культурай паводзін людзей, у агрэсіўным супрацьпастаўленні сваёй асобы інтарэсам грамадства, навакольным і нормам маральнасці, якія вызначаюць добрапрыстойныя паводзіны».
Чалавек разбіў шэсць шыбаў і тры шклопакеты, пашкодзіў пяць аконных рамаў, чым нанёс маёмасную шкоду на суму 496,49 рубля.
Вінаватым на судзе ён сябе прызнаў, шкоду кампенсаваў і раскаяўся. Праз тыдзень пасля хуліганства ён пацвердзіў свае паказанні на месцы, «прадэманстраваў, якім чынам ім былі пашкоджаны шыбы касцёла».
Паводле заключэння эксперта, падчас злачынства мужчына пакутаваў ад двух псіхічных расстройстваў, але ён мог усведамляць фактычны характар і грамадскую небяспеку сваіх дзеянняў. На момант суда абвінавачаны пакутаваў толькі ад аднаго захворвання. Ён быў не здольны самастойна абараняць свае правы і законныя інтарэсы ў крымінальным працэсе, але быў прызнаны судом разумным. Ні на алкагалізм, ні наркаманію ён не хворы, па месцы жыхарства характарызуецца адмоўна, раней не судзімы.
Згодна з часткай 1 артыкула 339 (хуліганства) КК Беларусі, суд пакараў яго штрафам памерам 3700 рублёў.
Але, улічваючы ягонае ўтрыманне пад вартай, было вырашана мужчыну «цалкам вызваліць ад адбывання прызначанага пакарання ў выглядзе штрафу». Асуджанага адпусцілі ў зале суда.
Пашкоджанні касцёл Унебаўзяцця Найсвяцейшай Панны Марыі і Святога Станіслава атрымаў ноччу на 20 студзеня. Гэты храм, пабудаваны ў XVIII стагоддзі, — помнік архітэктуры ў стылі барока, ён лічыцца адной з найбольш гістарычна важных каталіцкіх святыняў у Беларусі.
Каментары