У Мінску і Гродне попыт на кватэры б'е рэкорды. Чаму так адбываецца?
З надыходам лета ў Мінску назіраецца павышаны попыт на жыллё. Паглядзелі, што адбываецца на рынку сталічнай нерухомасці і якая сітуацыя ў рэгіёнах.
Мінск б'е рэкорды?
Па даных рэестра цэн на нерухомасць, за чэрвень у Мінску было зарэгістравана 1815 здзелак куплі-продажу кватэр з улікам доляў і пакояў. Для параўнання, у маі гэты паказчык склаў 1642 здзелкі. Агулам попыт на кватэры ў сталіцы за першае паўгоддзе 2023 года аказаўся найбольшым за ўсю гісторыю назіранняў.
Расце колькасць здзелак і ў Мінскім раёне. За чэрвень было зарэгістравана 502 здзелкі, тады калі ў маі 450. У два першыя месяцы вясны было 413 і 403 здзелкі адпаведна.
Як рэагуюць цэны
Пры гэтым, цана «квадрата» застаецца амаль нязменнай. Сярэдні кошт метра ў прададзеных у Мінску кватэрах за чэрвень 2023 года раўняўся $1366.
Такім чынам, сярэдні кошт квадратнага метра ў сталіцы ўпершыню ад пачатку вайны перасягнуў даваенны ўзровень, калі «квадрат» у сярэднім каштаваў $1353.
Мінімальная цана за ваенны перыяд была на ўзроўні 1242 $/м².
Сітуацыя ў рэгіёнах
Апроч Мінска, значнае павелічэнне попыту на нерухомасць назіраецца ў Гродне. Згодна з данымі Нацыянальнага кадастравага агенцтва, за першы месяц лета ў гэтым абласным цэнтры было зарэгістравана 434 здзелкі з жылой нерухомасцю, калі ў маі такіх было ўсяго 265, а ў красавіку — 258. Для параўнання, у чэрвені 2022 года ў Гродне было зафіксавана 284 здзелкі.
У іншых абласных цэнтрах такога ўсплеску не заўважана. Аднак пэўны прырост таксама назіраецца ў Гомелі. Там у мінулым месяцы было зарэгістравана 325 здзелак. У маі такіх было 307, а ў красавіку — 252.
Прычын некалькі
Пра магчымыя прычыны такіх паводзін насельніцтва мы пацікавіліся ў эксперта BEROC Анастасіі Лузгіной. На думку эканамісткі, адной з найважнейшых прычын з'яўляюцца змены ў грашова-крэдытнай палітыцы.
«Стаўкі па крэдытах паступова зніжаюцца, што робіць куплю жылля больш даступнай. Паралельна з гэтым зніжаюцца стаўкі па рублёвых укладах. Усё гэта падштурхоўвае людзей да куплі нерухомасці, паколькі цяпер таксама значна звузіліся магчымасці выдаткаваць грошы куды-небудзь яшчэ», — лічыць экспертка.
Эканамістка адзначае, што, нягледзячы на тое, што рызыкі і некаторая нявызначанасць захоўваюцца, людзі прывыклі да іх, а паколькі нічога новага не адбываецца, то далей будуюць планы на жыццё.
«У дадатак да гэтага аднаўляюцца даходы ў адносінах да мінулага года, а інструментаў, куды можна інвеставаць грошы, не так ужо шмат. Стаўкі па рублёвых і тым больш па валютных укладах невысокія, таму тыя, у каго ёсць нейкія назапашванні, могуць задумвацца аб набыцці нерухомасці. А калі на куплю грошай не хапае, то можна ўзяць адносна танны крэдыт», — разважае Лузгіна.
Сярод іншага, экспертка звяртае ўвагу на пэўны адкладзены попыт, калі ў першы час пасля пачатку поўнамаштабнай вайны многія перанеслі куплю жылля на больш стабільны час.
«Таксама на рост попыту на жыллё ў Мінску могуць уплываць жыхары рэгіёнаў, якія на фоне ўсё тых жа патаннелых крэдытаў і адносна невысокіх цэнаў на нерухомасць у сталіцы сталі аддаваць перавагу куплі кватэры менавіта ў Мінску», — лічыць Анастасія Лузгіна.
«Наша Нiва» — бастыён беларушчыны
ПАДТРЫМАЦЬУ Мінску прадаецца неблагая кватэра за $31 000. Што не так
У мінскім Уруччы нарэшце зносяць нічыйны катэдж, які стаяў закінуты 20 гадоў
Каментары