Ілан Маск уступае ў гульню са штучным інтэлектам. Яго новая кампанія пачынае працу над стварэннем ШІ
Ілан Маск абвясціў пра стварэнне кампаніі Х.Al, якая зоймецца пытаннямі штучнага інтэлекту з мэтай «пазнання рэальнасці», як сказана ў паведамленні Маска. Кампанія была зарэгістраваная ў Невадзе яшчэ ў красавіку, але афіцыйна прыступіла да працы толькі цяпер.
Х.Al стане трэцім гульцом на рынку ШІ нароўні з кампаніяй Open AI, якая стварыла першы чат-бот ChatGPT, і Google, якая запусціла ў сакавіку свой аналаг пад назвай Bard, як піша Бі-бі-сі.
У заяве X.Al гаворыцца, што яе мэта — спазнаць сапраўдную прыроду Сусвету. Хоць раней Маск называў штучны інтэлект экзістэнцыяльнай пагрозай, а даследаванні, што хутка прагрэсуюць у гэтай галіне, — небяспечнымі.
У сакавіку ён падпісаў адкрыты ліст, у якім многія важныя фігуры ў галіне тэхналогій заклікалі калег зрабіць паўзу ў развіцці ШІ. Аднак ужо ў красавіку стала вядома, што Маск зарэгістраваў кампанію x.AI Corp., назва якой красамоўна паказвае на кірунак яе дзейнасці.
Эксклюзіўная каманда
Паведамляецца, што Х.Al будзе кіравацца асобна і незалежна ад іншых кампаній імперыі Маска, куды ўваходзяць Tesla, SpaceX, Twitter, Neuralink і Boring Co.
На прэзентаваным у сераду сайце Х.Al гаворыцца, што аснову кампаніі складаюць 12 спецыялістаў у галіне камп'ютарных распрацовак, уключаючы ШІ, некаторыя з іх у мінулым працавалі ў Google, Microsoft і розных універсітэтах, у прыватнасці ва ўніверсітэце Таронта.
Узначаліў каманду сам Ілан Маск, які ў мінулым браў удзел у стварэнні першага чат-бота ChatGPT, але ў 2018 годзе пакінуў раду дырэктараў Open AI і з тых часоў скептычна выказваўся з нагоды распрацовак ШІ-тэхналогій.
Пра памер інвестыцый у новы праект Маска пакуль не паведамляецца, але можна меркаваць, што гаворка ідзе пра мільярды даляраў. Для параўнання: распрацоўкі Open AI абышліся інвестарам у 13 млрд даляраў.
У красавіку Financial Times паведамляла са спасылкай на свае крыніцы, што Маск вёў перамовы з інвестарамі іншых сваіх кампаній — Tesla і SpaceX — на прадмет іх фінансавай падтрымкі новага праекта, але вынікі кансультацый невядомыя.
Непрыгожы манеўр?
Эфектнае з'яўленне Маска на рынку ШІ-тэхналогій прыцягнула павышаную ўвагу канкурэнтаў і спецыялістаў хайтэку.
«Ілан — адзін з найвялікшых прадпрымальнікаў нашага часу», — сказаў Рыд Хофман, сузаснавальнік LinkedIn і стартапу Inflection AI.
Паводле яго слоў, у Маска ёсць усе падставы і магчымасці заняць сваё месца ў галіне стварэння штучнага інтэлекту.
Пры гэтым ён крытычна адгукнуўся пра сакавіцкі заклік Маска да індустрыі аб увядзенні паўгадавога мараторыя на распрацоўкі.
«Я коса гляджу на манеўр, пры якім ты заклікаеш усіх спыніцца на шэсць месяцаў, а сам у гэты час падвойваеш уласныя намаганні», — сказаў Хофман.
Ён таксама сказаў, што галіне неабходна імкнуцца да інклюзіўнасці, у адказ на каментар журналістаў пра тое, што новая кампанія Маска амаль цалкам складаецца з мужчын.
Каментары
адказ на каментар журналістаў аб тым, што ў новая кампанія Маска амаль
цалкам складаецца з мужчын.