Беларусы стварылі бот, які дапаможа адшукаць паведамленні ў чатах. Вось як ён працуе і чаму гэта важна для бяспекі
Сёння група гродзенскіх праваабаронцаў прэзентавала бот, які шукае вашы каментары ў розных чатах і падказвае, як іх выдаліць.
Што гэта за бот і для чаго ён створаны?
Тэлеграм-бот «Мае паведамленні ў чатах» знаходзіць вашы паведамленні ў розных чатах і прапануе вам, як іх можна выдаліць. Паведамленні шукаюцца па «пратэсных» чатах, якія стваральнікі бота ўнеслі ў сваю базу. Калі запусціць бот, можна адшукаць паведамленні толькі свайго акаўнта.
Праваабаронцы з ініцыятывы «Суды і затрыманні. Гродна і вобласць» расказваюць, як узнікла ідэя з ботам.
«Мы збіраем даныя аб палітычна матываваных судах і вывучаем, за што судзяць. У нейкі момант нам стала цікава, як шмат у чатах людзей са скампраметаванымі акаўнтамі — і мы прасканавалі адзін з гарадскіх чатаў, дзе адразу знайшлі больш за сотню падобных акаўнтаў. Мы знайшлі спосаб атрымліваць паведамленні практычна з усіх пратэсных чатаў і суполак з каментарамі на каналах, асабліва з тых, што ўнесеныя ў спісы «экстрэмісцкіх», а з часам падумалі, што можам даць усім ахвотным магчымасць знаходзіць свае паведамленні для ачысткі.
Мы таксама думалі, ці ёсць рызыкі ад публічнасці такога бота, але вырашылі, што можна зрабіць яго публічным, бо ў сілавікоў і так ужо ёсць некаторыя падобныя прылады (напрыклад, свая база назапашаных паведамленняў і боты накшталт «Магніта», з якімі яны глядзяць id акаўнтаў затрыманых)».
Як карыстацца ботам?
Калі вы актывуеце бот, ён пакажа вам чаты, у якіх ён заўважыў вашы паведамленні, а таксама іхнюю колькасць.
Пасля з'явіцца інструкцыя таго, як выдаліць паведамленні і спіс чатаў, у якія трэба перайсці. А таксама спіс чатаў каналаў.
Пакажам, як гэта працуе на прыкладзе канала «Беларусь галаўнога мозгу». Нельга перайсці ў чат адразу — спачатку націсніце на спасылку на канал і націсніце на назву зверху. Пасля адкрыецца меню канала, націсніце там на іконку дыялогу.
Пасля таго, як вы перайшлі ў чат, націсніце на тры кропкі ў правым верхнім куце.
Абярыце ў меню, якое выпадзе, «Пошук». Далей абярыце значок з чалавекам і лупай.
Пасля ўвядзіце ваш нікнэйм (пры пошуку ён адлюструецца першым — можна проста на яго націснуць). Вам пакажуць усе вашы паведамленні.
Націсніце на кожнае доўгім націсканнем. Пасля націсніце значок «Сметніцы». Пацвердзіце выдаленне.
У боце працуюць таксама функцыі паўторнага пошуку паведамленняў і прагляду іх унутры браўзера.
Пасля выдалення ўсіх каментароў стваральнікі раяць выдаліць акаўнт (бо каментары, напрыклад, могуць быць раней захаваныя сілавікамі). Мы ўжо распавядалі, як зарэгістраваць новы ананімны акаўнт.
Ад чаго гэта не дапаможа?
Магчымая сітуацыя, калі ваш акаўнт быў ідэнтыфікаваны раней спецслужбамі.
Таксама не факт, что чат-бот захапіў усе чаты, у якія вы пісалі, асабліва закрытыя. Вы можаце экспартаваць вашы паведамленні ў закрытых чатах, калі яны не былі выдаленыя раней. Калі група была выдаленая або стала закрытай пасля таго, як вы выйшлі, а таксама калі вы ў ёй забаненыя, то выдаліць каментары не атрымаецца. Таму важна выдаляць пасля акаўнт.
«Наша Нiва» — бастыён беларушчыны
ПАДТРЫМАЦЬДзмітрыеў расказаў немцам, чаго Лукашэнка можа хацець ад Еўропы3
Каментары
Мне интересно знать, кто тот бот написал, вопрос не праздный в свете последних сливов
Мы сделали бота по принципу, что каждый может смотреть только сообщения с собственного аккаунта. Мы тоже задумывались, а что, если силовики будут отбирать телефоны и затем запускать наш бот с аккаунтов задержанных. Но здесь не появляется никакой новой угрозы, поскольку силовики и так имеют свои собственные базы сообщений, а также используют боты наподобие Магнита, с помощью которых смотрят ID аккаунта для последующей проверки в своих базах.