Французская Рыўера больш не ў трэндзе. Колькі каштуе адпачынак на топ пяці курортах, дзе бавяць час рэальна багатыя і знакамітыя
Зоркі, бізнэсмены і простыя аматары экзотыкі шукаюць новыя нестандартныя месцы для адпачынку — аўтэнтычныя куткі дзікай прыроды далёка ад натоўпаў турыстаў. Сабралі для вас самыя цікавыя з iх.
Пра адпачынак на Браслаўскіх азёрах многія беларусы сёння могуць толькі марыць, таму мы вырашылі зрабіць падборку і прапанаваць іншыя кірункі для адпачынку. Хутчэй за ўсё, гэтыя месцы вам не па кішэні, але падстаў для турыстычных мараў стане значна больш.
Сен-Бартэлемі, Карыбскі басейн
Гэты невялікі востраў у Карыбскім басейне жартаўліва называюць «запаведнікам мільянераў». Дабрацца сюды можна толькі двума спосабамі: уплаў ці на невялікім прыватным самалёце. Але выдаткі на трансфер стануць не самым балючым ударам па бюджэце вандроўнiка. Цэны на востраве таксама здзіўляюць. Мясцовыя таксісты нават жартуюць: «Тое, што вам хапіла грошай на дарогу сюды, не гарантуе, што вам хопіць тут на таксі».
Гатэляў на Сен-Бартэлемі вельмі мала, таму i каштуюць яны адпаведна: за суткі ў самым танным прыйдзецца выкласці амаль 600 еўра, а кошт нумара ў гатэлi сярэдняй катэгорыi абыдзецца больш за 7,5 тысячы еўра.
Але сустрэць мільянераў у iх калідорах вы наўрад ці зможаце: частка прыбярэжнай лініі вострава аддадзеная пад прычалы, ля якіх швартуюцца элітныя яхты. У адной з такiх летась спыняўся акцёр Леанарда Ды Капрыа.
Каба-Сан-Лукас, Мексіка
Курорт, якi размешчаны на паўднёвым ускрайку паўвострава Каліфорнія, вабіць турыстаў сваімі пляжамі і шумнымі тусоўкамі. Праз асаблівасці геаграфічнага размяшчэння тут практычна заўсёды добрае надвор'е, а воды Ціхага акіяна ў гэтым рэгіёне спакойныя і цёплыя. Акрамя таго, турысты адзначаюць ашаламляльныя захады сонца і цудоўную прыроду.
Нядзіўна, што «жамчужына Бахі» — так мясцовыя жыхары завуць гэты райскі куток — палюбiлася і найбагацейшым людзям планеты. Сустрэць мільярдэраў, мільянераў і зорак тут можна на шматлікіх палях для гольфа, у клубах і рэстаранах. Напрыклад, асабліва часта на гэтым курорце адпачывае актрыса Джэніфер Эністан.
Цікава, што паназіраць за шчаслівымі ўладальнікамі вялікіх банкаўскіх рахункаў тут можа кожны: нумар эканамкласа ў самым просценькім гатэлі каштуе ўсяго 30 еўра. Што датычыць багатых і знакамітых, то яны аддаюць перавагу прыватным яхтам або шыкоўным гатэлям накшталт Thompson Hotel. Правесці суткі ў такім можна за чатыры тысячы еўра.
Батсвана, Афрыка
Гэта краіна на поўдні Афрыкі доўгі час заставалася па-за полем зроку турыстаў. Не маючы выхаду да мора, яна адчувальна прайгравала Кеніі і Танзаніі з іх залацістымі пляжамі, якія атачаюць Індыйскі акіян. Але цяпер атрымаць асалоду ад афрыканскага каларыту воддаль ад турыстычных груп там стала няпроста, і ў гульню ўступіла Батсвана — рэдкі прыклад краіны з устойлівай дэмакратыяй на афрыканскім кантыненце.
Некалькі гадоў таму мясцовы ўрад узяў палітычны курс, які абмяжоўвае масавы турызм. Каб заехаць у гэтую краіну, госцю давядзецца даказаць свой матэрыяльны дабрабыт і выкласці кругленькую суму на гатэлі, экскурсіі і ежу. Так, ноч у самай таннай гасцініцы абыдзецца падарожніку мінімум 100 еўра. За гатэль сярэдняга класа трэба будзе заплаціць ад 200 да 700 еўра.
Аднак абсалютны трэнд сярод забяспечаных турыстаў — арэнда дамоў і невялікіх гасцініц цалкам. Так, арэнда 12-пакаёвай вілы абыдзецца ў 174 тысячы еўра. Па словах гідаў, якія працуюць з віп-кліентамі, такая вялікая сума ніколькі не палохае заможных турыстаў, і чэргі на такія аб'екты часта распісаныя на сезон наперад. Але выдаткаваныя грошы адпавядаюць прыгажосці гэтай краіны. Недарма прынц Гары і Меган Маркл пакахалі адно аднаго менавіта ў гэтай краіне.
Парас, Грэцыя
Тым, хто стаміўся ад экзотыкі, спадабаецца на грэчаскіх астравах. Не здзіўляйцеся — звыклае месца адпачынку зноў набірае папулярнасць. Праўда, на першы план выходзяць ужо іншыя, менш разрэкламаваныя гарады-курорты. Так, востраў Міканас, які раней быў своеасаблівай Меккай для турыстаў, аддаў пальму першынства цішэйшаму Парасу.
Востраў прываблівае турыстаў, у лiку якiх i знакамiтая актрыса Монiка Белучы, мілымі будынкамі, пабудаванымі з беласнежнага мармуру, старадаўнiмi статуямі і найчысцейшымі пляжамі. Гасцініцы гэтага вострава гатовыя прыняць самых пераборлівых гасцей і забяспечыць ім высокі ўзровень камфорту.
Як вядома, камфорт каштуе грошай. І ў выпадку Параса — не маленькіх. Так, ноч у мясцовым «Марыёце» — менавіта гэты гатэль рэкамендуюць заможным пастаяльцам — абыдзецца мінімум у 1400 еўра. Суткi ў іншай папулярнай гасцініцы — Parilio — будуць каштаваць значна танней — усяго 900 еўра.
Востраў Гамільтан, Аўстралія
З сярэдзіны сямідзясятых гадоў мінулага стагоддзя востраў Гамільтан цалкам знаходзіцца ў прыватнай уласнасці і выкарыстоўваецца выключна як турыстычны курорт. Яго першым уладальнікам, Кіту Уільямсу і Браяну Брыту, спатрэбілася 10 гадоў, каб ператварыць гэты бязлюдны кавалачак зямлі ў турыстычны рай. Аднак большая частка пабудаваных iмi гатэляў не захавалася: яны згарэлі падчас страшнага пажару ў 1985 годзе.
Гамільтан знаходзіцца ў коле Вялікага Бар'ернага рыфа і да нядаўняга часу прыцягваў увагу выключна аматараў дайвінгу. Шырокая папулярнасць курорту прыйшла адносна нядаўна — толькі ў 2018 годзе, пасля выхаду ў эфір рэаліці-шоу «Найлепшая праца ў свеце» вытворчасці канала National Geographic. У абавязкі героя шоу, якому дасталася праца наглядчыка за востравам, уваходзіла вядзенне відэаблога. Сюжэты спадабаліся гледачам, i на Гамільтан пацягнуліся чароды турыстаў, у тым ліку і забяспечаных.
Сёння Гамільтан — элітны курорт з гатэлямі ўзроўню 4—5 зорак. Стандартныя нумары тут каштуюць ад 270 да 1105 еўра за дзень. Затое на востраве ёсць прыемныя бонусы: многія мясцовыя рэстараны бясплатна кормяць дзяцей да 14-ці гадоў, а некаторыя дайвінг-клубы бясплатна навучаюць дарослых асновам глыбакаводных апусканняў. Зрэшты, дайвінг — не адзіная забаўка, даступная наведвальнікам вострава. Напрыклад, спявачка Тэйлар Свіфт прыязджае сюды назіраць за сезоннай міграцыяй кітоў.
Калі ваш бюджэт пакуль не дазваляе адпачыць на гэтых курортах, не губляйце надзеі. На нашай планеце, у тым ліку і ў Беларусі, шмат прыгожых месцаў, ад наведвання якіх у вас застануцца незабыўныя ўражанні і прыемныя ўспаміны.
«Тут ёсць увогуле ўсё — і наогул нічога не трэба». Беларуска пераехала ў Тайланд і расказвае, як казачна там жывецца
«Эпоха гарачых тураў скончылася». У турагенцтвах расказалі, дзе сёлета адпачываюць беларусы і за якія грошы
«Добры варыянт паляцець на Кіпр — набыць квіток ад 70 да 100 еўра». Як правесці адпачынак на Міжземным моры і не пайсці з торбай
«Азначэнне Беларусі як выпаленай зямлі мне не падабаецца». Маналог беларуса, які нядаўна з’ехаў з краіны15
Каментары
- “ты там быў?”
- “не, але ўчора таксама хацелась!”