«Добры варыянт паляцець на Кіпр — набыць квіток ад 70 да 100 еўра». Як правесці адпачынак на Міжземным моры і не пайсці з торбай
Алёна з Магілёва любіць адпачываць на Кіпры, у Лімасоле, яна лётае туды да сяброў некалькі разоў на год. Выданне Magilev.by даведалася, як і на чым можна ашчадзіць, пачынаючы з куплі квіткоў на самалёт. І на чым ашчадзіць не выйдзе.
«Ляцець трэба да мая або ў канцы верасня»
«Лімасол — гэта айцішны горад, таму бюджэтны адпачынак тут ніяк не атрымаецца, лепш разглядаць іншыя гарады, — расказвае Алёна. — Цэны значна ніжэйшыя, у тым ліку на жыллё, будуць у Пафасе і Ларнаку. У турыстычнай Ая Напе ўжо будзе даражэй, але не так дорага, як у Лімасоле.
А пачынаць трэба з квіткоў на самалёт. Калі ёсць шэнген, танней спачатку дабрацца на аўтобусе з Беларусі ў Шэнген-зону. На аўтобусе Ecolines даехаць можна за 100 рублёў. Добры варыянт паляцець на Кіпр — гэта купіць квіток з багажом ад 70 да 100 еўра. За гэтыя грошы можна паляцець кампаніямі Ryanair або Wizz Аіг, у залежнасці ад краіны вылету.
Ляцець трэба да мая, але можа быць яшчэ халодным мора, ці — яшчэ лепш — у канцы верасня. У кастрычніку яшчэ цёпла, можна загарэць і пакупацца, не будзе вялікай плыні турыстаў.
Калі браць толькі заплечнік і падарожнічаць без багажу, то з Еўропы ў гэты час можна паляцець за 50 еўра. Калі няма шэнгена, ёсць два варыянты — праз Грузію ці Арменію, другі выйдзе танней. Да Ерэвана летам самалётам «Белавія» можна паляцець за 130 даляраў. З Ерэвана білет будзе каштаваць 50 еўра, калі ляцець улегцы. Калі з чамаданам — то 80-90 еўра.
Трэба звяртаць увагу на дні тыдня, самыя прывабныя цэны на квіткі — у аўторак. А калі ўключыць VPN, атрымаецца яшчэ танней, не больш за 200 еўра ў адзін бок».
«Сярэдняя цана за арэнду машыны — 50 еўра ў дзень»
У гатэлях жыць будзе дорага, кажа Алёна. Можна паспрабаваць зняць жыллё ў якой-небудзь вёсачцы або на airbnb. Або ў сацыяльных сетках пашукаць людзей, якія жывуць на Кіпры, але збіраюцца кудысьці ў адпачынак. Знаёмыя Алёны, якія з'язджаюць дадому на некалькі тыдняў ці на месяц, здаюць сваю кватэру за сімвалічную плату.
Грамадскі транспарт у Лімасоле каштуе 1,5 еўра. Але пажадана зняць машыну. У сезон машыны каштуюць досыць дорага, летам сярэдняя цана 50 еўра ў дзень. Можна дамовіцца з уладальнікам на зніжку, і заплаціць за 10 дзён не 500, а 400 еўра.
Увогуле, можна машыну за 400 еўра зняць і на месяц, па факце пасля 10 дзён адна і тая ж цана. Каршэрынг абыдзецца танней, але нельга будзе ездзіць паміж гарадамі.
Машына патрэбна, па-першае, таму, што на Кіпры вельмі шмат прыгожых месцаў, куды захочацца з'ездзіць. Па-другое, гэта дае магчымасць жыць далей ад горада і ашчадзіць. Тым больш, што цяпер зняць жыллё ў Лімасоле за адэкватныя грошы практычна нерэальна.
Самая простая кватэра, еўрааднушка ў старым доме, каштуе 1000 еўра ў месяц, калі здымаць на доўгі тэрмін. Яшчэ 100 еўра трэба заплаціць за ваду і электрычнасць. Людзі з добрымі заробкамі разглядаюць кватэры мінімум ад 2000 еўра і вышэй, дзе ёсць басейн, лазневы комплекс і паркоўка», — распавядае Алёна.
«Беларускі лён лепшы па якасці, чым кіпрскі»
За два тыдні на Кіпры можна паглядзець усё, упэўненая Алёна, і ёсць магчымасць размежаваць адпачынак:
«Пабываць і на паўднёвым Кіпры, і на турэцкай яго частцы, паўночным. Каб з'ездзіць на турэцкую частку, трэба абавязкова мець шэнген, каб пусцілі назад. Патрэбная і страхоўка на машыну, каштуе прыкладна 15-20 еўра, у залежнасці ад часу арэнды.
У паўночнай частцы цэны значна ніжэйшыя, жыллё можна зняць у тры разы танней, чым у Лімасоле. Інфраструктуры толькі практычна ніякай. Калі кажуць, што Кіпр — вёска, то там вёска-вёска.
Варта пабываць у маленькіх вёсачках, якія вельмі папулярныя сярод турыстаў. Яны старыя, казачныя, у кожнай захаваны свой уласны стыль. Праходзячы міма вокнаў, можна ўбачыць, як распісваюць талеркі, лепяць з гліны або робяць яшчэ нешта іншае. У адной вёсцы можна купіць срэбра, у іншай — лён. Наш беларускі лён, дарэчы, лепшы па якасці, чым кіпрскі.
Для аматараў водных відаў спорту ёсць дзе разгарнуцца. Мабыць, на Кіпры прадстаўленыя практычна ўсе яны: вейкборд, вейксерф, кайтынг.
На розных тэрыторыях вострава вада адрозніваецца па колеры. У Ая Напе, напрыклад, яна неверагодна бірузовая.
Пляжы ёсць бясплатныя, дзе можна ляжаць на сваім ручніку. Калі хочаш больш камфортных умоў, трэба заплаціць 2 еўра за шэзлонг і 3 за парасон. Ёсць вельмі прыгожыя пляжы з белымі камянямі, уваход каштуе 5 еўра. На гэтыя 5 еўра ты маеш права замовіць нешта з ежы або напояў.
«Лімасол ужо даганяе Дубай»
Цэны на прадукты ў крамах, адзначае Алена, падобныя да беларускіх:
«У кавярнях харчавацца па нашых мерках дорага. Салата ў добрым рэстаране каштуе ад 9 еўра. Вельмі папулярныя ва ўстановах так званыя мезе, рыбнае або мясное. Туды, акрамя бульбы фры, салаты, намазкі накшталт хумусу і смачных аладак, уваходзіць штук з шэсць найменняў чагосьці мяснога або рыбнага. Напрыклад, шашлык свіны і курыны, каўбаскі свіныя і ялавічына, катлеткі, бараніна ў збанку, грудзінка грыль. Страва каштуе 50 еўра, яе звычайна заказваюць на 3-4 чалавекі».
Кіпрскія гарады, кажа Алёна, можна падзяліць па настроі:
«Ая Напа — турыстычны, клубны варыянт, тусовачны. У Пафасе больш цэняць цішыню і спакой, ён добры для жыцця або для дач, многія так і робяць, жывуць там, а працаваць едуць у буйны горад, Лімасол альбо Ларнаку.
Ларнака — гэта як другі Лімасол, там таксама ўжо хапае айцішных кампаній. Яна дзесьці паміж Пафасам і Лімасолам, там можна зняць жыллё па адэкватнай цане і атрымаць інфраструктуру.
Кажуць, што Лімасол ужо даганяе Дубай. Будаўніцтва тут яшчэ не такое крутое, але ўжо ёсць вышынныя дамы, у адрозненне ад іншых буйных гарадоў. 80% айцішных кампаній знаходзіцца менавіта ў Лімасоле, таму тут вельмі дарагая нерухомасць, як і арэнда.
Ад статусу горада залежыць і памер заробкаў. У Лімасоле яны самыя высокія, потым ідуць Ларнака, Пафас і Нікасія. Беларусам, якія прыехалі сюды жыць і працаваць, кампанія для легалізацыі павінна плаціць заробак мінімум 2500 да вылічвання падаткаў. Падаткі складаюць 280-300 еўра ад гэтай сумы. Для камфортнага жыцця трэба зарабляць 2000-3000 у месяц.
Адпачыць на Кіпры танна не атрымаецца. Але выдатна ашчадзіць можна, калі зрабіць усё слушна: паехаць у патрэбны перыяд, каб квіткі былі таннейшыя; зняць пакой альбо папытаць у знаёмых кватэру не даражэй за 300 еўра; знайсці людзей у чатах, каб з імі ў складчыну ездзіць на экскурсіі, самастойна гатаваць і г.д. На два тыдні цалкам хопіць тысячы еўра. У гэтую суму я заўсёды ўкладаюся».
Чытайце таксама:
Каб вандроўка не ператварылася ў сваркі: як паводзіць сябе, калі падарожнічаеш у кампаніі
Дзевяць ідэй для захапляльных ці карысных выхадных. Як правесці адпачынак, не губляючы шмат грошай
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»22
Каментары