Астрафізік (і па сумяшчальніцтве гітарыст Queen) Браян Мэй стаў суаўтарам першага ў свеце 3D-атласа паверхні астэроіда
Легендарны рокер, які свайго часу пакінуў навуку, каб стаць адным з заснавальнікаў Queen, апублікаваў даведнік пра астэроід Бэну — калязямны камень вагой 85 мільёнаў тон, які круціцца побач з намі вакол Сонца.
76-гадовы Мэй з'яўляецца суаўтарам атласа разам з Дантэ Лаўрэатам (Dante Lauretta), навукоўцам-планетолагам з Універсітэта Арызоны і галоўным даследчыкам NASA ў місіі OSIRIS-REx. Атлас называецца Bennu 3-D: Anatomy of an Asteroid і прадаецца як «першы ў свеце поўны (і стэрэаскапічны) атлас астэроіда».
Яшчэ ў 2019-м Браян Мэй далучыўся да каманды, якая вывучае Бэну. Хоць астэроід мае невялікі шанец сутыкнуцца з Зямлёй цягам наступных 300 гадоў, ён з'яўляецца калязямным — і таму патэнцыйна небяспечным — аб’ектам. З прычыны таго, што Бэну мае ненулявы шанец сутыкнуцца з Зямлёй, ён пастаянна знаходзіцца пад наглядам Цэнтра вывучэння калязямных аб'ектаў NASA.
Як піша The Universe Space Tech, некалькі гадоў таму OSIRIS-Rex ажыццявіла пасадку касмічнага апарата на паверхню гэтага нябеснага цела, які ўзяў узор і цяпер вязе яго на нашу планету. Чакаецца, што карабель вернецца на Зямлю з узорамі 24 верасня гэтага года. Дарэчы, гэта не першы матэрыял астэроіда, які мае патрапіць на Зямлю. Раней узоры ўжо даставілі японскія апараты «Хаябуса-1» і «Хаябуса-2». Аднак капсулу OSIRIS-Rex навукоўцы ўсё роўна чакаюць з нецярпеннем.
Мэй даўно цікавіцца стэрэаскапічнай фатаграфіяй і нядаўна апублікаваў кнігу Stereoscopy Is Good For You: Life in 3-D. Як распавядае Amateur Photographer, Мэй цягаў з сабой сваю ўласную стэрэакамеру ў турах Queen, ствараючы 3D-выявы момантаў гурта на сцэне і за кулісамі. Цяпер такая ж тэхналогія прымяняецца для далёкага астэроіда. Друкаванае выданне атласа будзе ўключаць 120 ілюстрацый, 50 мап і 80 стэрэаскапічных здымкаў аб'екта.
Як вядома, Браян Мэй рабіў перапынак у вывучэнні фізікі ў Imperial College London, каб стварыць гурт Queen разам з Фрэдзі Мэрк'юры і Роджэрам Тэйларам. Сярод іншых Мэй напісаў для гурта такія сусветна вядомыя хіты, як « We Will Rock You», «I Want It All» і «Hammer to Fall». У 2006 годзе рокер вярнуўся ў вышэйшую школу, каб завяршыць сваю доктарскую дысертацыю па міжпланетным пыле.
Gizmodo распавядае, што Мэй часткова прысвяціў сваю дысертацыю Queen і адзначыў, што даныя, сабраныя інфрачырвоным астранамічным спадарожнікам (IRAS) падчас падарожжа Queen па Паўднёвай Амерыцы ў 1983 годзе, значна палепшылі разуменне астраномамі Задыякальнага (або Міжпланетнага) воблака пылу. Міжпланетнае воблака пылу складаецца з касмічнага пылу — дробных часціц, якія пранізваюць прастору паміж планетамі ў планетных сістэмах, падобных да Сонечнай. Гэтая сістэма часціц вывучалася на працягу многіх гадоў з мэтай зразумець яе прыроду, паходжанне і сувязь з буйнейшымі касмічнымі целамі.
Сын Пяткевіч вярнуўся з ЗША, займаецца кансультацыямі па крыптавалюце. І заадно падпрацоўвае стажорам у БДУ11
Каментары