Суд ЕС пацвердзіў санкцыі супраць Гуцарыева, які трапіў у чорны спіс за падтрымку Лукашэнкі
Цяпер разглядаецца каля 80 пазоваў ад беларусаў і расіянаў.
Суд Еўрапейскага саюза ў сераду адхіліў пазовы шэрагу буйных расійскіх прадпрымальнікаў і іх сямейнікаў, супраць якіх былі ўведзеныя персанальныя еўрапейскія санкцыі, піша Deutsche Welle.
У прыватнасці, адхіленыя пазовы прадпрымальніка Міхаіла Гуцарыева, які трапіў у санкцыйны спіс ЕС супраць Беларусі за падтрымку Аляксандра Лукашэнкі; былога ўладальніка Трубнай металургічнай кампаніі (ТМК) Дзмітрыя Пумпянскага (пасля ўнясення ў санкцыйны спіс ён выйшаў з бенефіцыяраў і рады дырэктараў ТМК), яго жонкі Галіны Пумпянскай і сына Аляксандра Пумпянскага (таксама пакінуў раду дырэктараў ТМК).
Санкцыі ў дачыненні да гэтых асоб Рада ЕС абгрунтавала падтрымкай палітыкі, якая падрывае тэрытарыяльную цэласнасць Украіны. Расіяне палічылі, што іх унеслі ў санкцыйныя спісы незаконна, і звярнуліся ў суд у індывідуальным парадку з патрабаваннем скасаваць абмежавальныя меры.
Хоць Дзмітрый Пумпянскі не ўдзельнічаў у ваенных дзеяннях непасрэдна, ён займаецца дзейнасцю ў галінах эканомікі, якія служаць для ўрада Расійскай Федэрацыі важнай крыніцай даходаў, растлумачылі DW у судзе ЕС. У сваю чаргу Галіна Пумпянская звязаная з мужам дзелавымі адносінамі, паколькі яна ўзначальвае фонд, які належыць яго ж кампаніі.
Каля 80 пазоваў ад расійцаў і беларусаў
Цяпер Суд ЕС у Люксембургу разглядае блізу 80 пазоваў ад фізічных і юрыдычных асоб з РФ і Беларусі, якія аспрэчваюць пастановы аб санкцыях, паведаміў DW афіцыйны прадстаўнік суда Хартмут Ост.
Большасць спраў распачатая расійскімі бізнэсоўцамі, у дачыненні да якіх дзейнічаюць такія захады, як замарожванне актываў і забароны на ўезд у Еўрасаюз, аднак выйграць суд дагэтуль удалося толькі маці кіраўніка ПВК «Вагнер» Яўгена Прыгожына.
Працэс разгляду такіх пазоваў звычайна займае год. Большасць пазоваў расійскіх алігархаў да Рады ЕС была пададзеная ў 2022 годзе.
Цяпер чытаюць
23‑гадовага афіцэра брыгады спецназа асудзілі на 19 гадоў за «здраду дзяржаве»15
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары