Зяленскі ці Залужны — каму ўкраінцы давяраюць больш? Вынікі сацапытання
Давер грамадзян Украіны да прэзідэнта Уладзіміра Зяленскага знізіўся з 84% у снежні 2022 года да 62% у снежні 2023-га. Кіеўскі міжнародны інстытут сацыялогіі апублікаваў вынікі апытання, праведзенага з 29 лістапада да 9 снежня 2023 года, піша «УП».
Па выніках апытання, Уладзімір Зяленскі, нягледзячы на некаторае падзенне рэйтынгу, захоўвае пераважны давер сярод украінскай грамадскасці.
Так, цяпер 62% апытаных давяраюць прэзідэнту Украіны, а не давяраюць — 18%. У снежні 2022 года 84% давяралі яму, не давяралі — 5%. Адпаведна, калі баланс даверу-недаверу ў снежні 2022 года для прэзідэнта складаў +80%, то цяпер ён складае +42%.
«Гэта значыць, з аднаго боку, бачым істотнае зніжэнне, але, з другога боку, ён застаецца адназначна станоўчым са значнай перавагай тых, хто давярае прэзідэнту, у параўнанні з тымі, хто яму не давярае», — паказваюць сацыёлагі.
Абсалютны давер у грамадстве захоўваюць Узброеныя сілы Украіны — як і ў снежні 2022 года, так і цяпер 96% давяраюць УСУ.
Акрамя гэтага, 88% украінцаў давяраюць галоўнакамандуючаму Валерыю Залужнаму (не давяраюць — толькі 4%).
Таксама сацыёлагі паказваюць на тое, што ў бягучай сітуацыі важна разумець, як «перасякаюцца» палі даверу да прэзідэнта і галоўнакамандуючага. Большасць украінцаў, або 59%, адначасова давяраюць і прэзідэнту Украіны, і галоўнакамандуючаму.
Доля ўкраінцаў, якія маюць палярызаваныя погляды, зʼяўляецца дастаткова невялікай. Толькі 14% давяраюць галоўнакамандуючаму і пры гэтым не давяраюць прэзідэнту, і толькі 1% давярае прэзідэнту, але не давярае галоўнакамандуючаму.
Цяпер чытаюць
Бабарыка зоймецца бізнэсам — ужо адкрыў кампанію ў Германіі20
Бабарыка зоймецца бізнэсам — ужо адкрыў кампанію ў Германіі
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу1313
Каментары